Salig sa Ginoo
“Sumalig sa Ginoo sa bug-os mong kasingkasing” (Mga Proverbio 3:5).
Isip usa ka batan-ong babaye mikuyog ko sa akong amahan bisan asa siya paingon. Nakadayeg gyud ko kon unsa siya ka mapahinunguron ngadto sa Ginoo. Siya naghan-ay og taas nga sumbanan alang kanako nga magserbisyo nga dili maghunahuna sa kaugalingon. Siya dili motrabaho og usa ka semana matag tuig. Hinoon, imbis nga mobiyahe, iyang gihangyo ang akong pamilya sa pagtabang kaniya sa pagpamintal sa balay sa among silingan nga biyuda. Kini usa lang ka ehemplo sa daghang mga buhat sa pagserbisyo. Siya kanunay naghunahuna sa uban.
Sa dihang anaa ko sa high school, ang akong amahan nagkasakit pag-ayo. Kanunay akong nag-ampo ug naghangyo sa Langitnong Amahan sa pagpanalangin sa akong amahan nga mamaayo. Anaa siya sa ospital sulod sa usa ka bulan, ug dayon siya mitaliwan.
Kini usa ka trahedya alang sa among pamilya. Alang kanamo kini walay kahulugan tungod kay gikinahanglan namo ang among amahan. Nag-ampo ko aron makasabut nganong kini nahitabo ug nganong ang Langitnong Amahan dili motubag sa akong mga pag-ampo. Akong gibati nga daw ang mga kalangitan nagpakahilum. Wala ko makakuha og tubag sa akong mga pag-ampo. Mibati ko nga ang Langitnong Amahan gipasagdan akong mag-inusara. Apan ako nagpadayon sa pag-ampo.
Usa ka tuig ang milabay mitambong ko og miting sa sakrament diin ang mamumulong nagbasa og kasulatan gikan sa Mga Proverbio:
“Sumalig ka sa Ginoo sa bug-os mong kasingkasing, ug ayaw pagsalig sa imong kaugalingong salabutan.
“Sa tanan nimong mga dalan ilha siya, ug siya magamando sa imong mga alagianan” (Mga Proverbio 3:5–6).
Ang Espiritu mipamatuod kanako nga kini mao ang tubag sa akong pag-ampo! Kinahanglan ko nga mosalig sa Ginoo. Milungtad og dugay nga panahon aron sa pagdawat niana nga tubag, ug kana dili mao ang akong gusto, apan kini mao ang labing nindot nga tubag sa akong pag-ampo. Dili gayud unta nakong angay sabtun nganong nahitabo kini. Unta misalig lang ko sa Ginoo.
Kon kamo mosalig sa Ginoo, mabuhat ninyo ang bisan unsang butang—bisan kon kini lisud kaayo—tungod kay Siya modirekta sa inyong agianan. Siya maglakaw diha sa inyong kiliran. Siya mogunit sa inyong kamot. Siya mopadala sa Iyang mga anghel sa paglibut kaninyo. Kana mao ang akong pagpamatuod. Ug kini mahitabo kanatong tanan.
Litrato ni Sister Dalton pinaagi sa Busath Photography; litrato sa kulintas pinaagi ni Robert Casey; litrato sa pamilya sa maayong kabubut-on ni Sister Dalton