Pa, Nagkinahanglan Ko Nimo
Michael K. Hewett, Utah, USA
Nagbalhin ko og mga sprinkler pipe sa usa ka bahin sa among umahan sa northern California, USA. Kini nga adlaw makalipay [treat] tungod kay naa si Papa aron sa pagtabang kanako. Sa dihang nahuman nami, kami misakay sa among all-terrain vehicles (ATVs) ug mipaingon na sa balay nga naghunahuna sa panihapon. Si Papa ang migiya sa agianan.
Ang usa ka bahin sa among umahan gisikbitan sa Pit River. Kami nagdrayb sa kilid sa umahan aron dili namo maligsan ang alfalfa sa dagkong mga ligid sa among ATVs. Ang umahan anaa sa among tuo, ug ang sapa, nga anaa sa ubos sa usa ka lawum nga paril, anaa sa among wala. Dili kami makakita og tarung tungod kay gabunon kadto.
Kami nagpadagan nga igo gayud ang gikusgon sa dihang nasimang ko sa agianan ug nabanggan ang pundok sa sagebrush sa tuong ligid sa luyo. Ang bangga nakapugos kanako nga iliko sa wala ang ATV paingon sa sapa ug sa paril. Naningkamot ko sa pagpahunong, apan ang kilid sa sapa hilabihan ka lawum ug kusog na kaayo akong dagan. Nagtuo ko nga siguradong madiretso ko sa sapa. Swerte lang, adunay kahoy sa kilid sa sapa diha sa akong giagian. Ang akoa nalang nabantayan, nagtan-aw ko sa ATV sa ubos—gikan sa kahoy! Ang akong kahadlok sukad walay sama.
Mibati ko nga duol nako sa kamatayon, apan gawas sa pipila ka mga garas ug mga bun-og, wala ra ko maunsa. Human ako nakalma ug miginhawa, nakaamgo ko nga walay paagi nga mahimo nako nga mapasaka ang ATV og balik nga ako ra. Kanunay kong nagpaabut nga mogimaw ang ulo sa akong papa diha sa tumoy sa paril, mangita kanako, apan wala. Kana mas nakapakulba kanako.
Nakasaka ko sa ibabaw nga bahin diha sa kilid sa sapa, apan wala nako makit-i ang akong papa. Nag-ampo ko sa hilum ngadto sa akong Amahan sa Langit, naghangyo Kaniya sa pagpabalik ni Papa aron kuhaon ko. Dayon nagsugod ko sa paglakaw.
Sa samang higayon, si Papa hapit na moabut sa balay sa dihang siya nagtuo nga nakadungog siya nako nga nanawag kaniya. Siya milingi sa luyo sa unang higayon sukad nga kami mibiya sa umahan. Diha lang niya nabantayan nga wala nako sa luyo niya. Siya nasayud nga adunay problema ug mibalik nangita kanako hangtud nga iya kong nakit-an.
Si Papa sa wala madugay miingon kanako nga siya nakadungog kanako nga miingon, “Pa, nagkinahanglan ko nimo!” Nianang higayona, siya sobra na sa duha ka milya (3 km) kalayo. Diha dayon akong nasayran nga usa ka mahigugmaong Amahan sa Langit nakadungog sa akong pag-ampo ug mipahibalo sa akong amahan nga nagkinahanglan ko sa iyang tabang.
Mapasalamaton ko sa Espiritu Santo ug sa mga paghunghong sa kamatuoran ug paggiya nga atong madawat gikan Kaniya. Mapasalamaton usab ko sa usa ka mahigugmaong amahan kinsa nagpuyo sa iyang kinabuhi sa paagi nga ang Espiritu Santo makahunghong kaniya ug madungog.