Ang Priesthood Mao ang Awtoridad aron sa Paglihok sa Ngalan sa Dios

Ang atong Amahan sa Langit nagdumala sa kalangitan ug sa kayutaan. Pinaagi sa Iyang mahangturon nga gahum ang kalibutan nagpabilin sa perpekto nga pagkahan-ay. Sa pagdumala sa Iyang Simbahan dinhi sa yuta, Iyang gidelegar ang usa ka porsyon sa Iyang gahum ug awtoridad ngadto sa takus nga mga miyembro nga mga lalaki sa Simbahan. Kini nga gidelegar nga awtoridad gitawag og priesthood. Atong makita kini nga pattern sa gidelegar nga responsibilidad diha sa Bag-ong Tugon, dihang gihatag ni Jesukristo ngadto sa mga Apostoles ang awtoridad aron sa paglihok sa Iyang pangalan (tan-awa sa Mateo 16:19).

Mao kini ang sumbanan sa Dios sa iyang panggobyerno. Mao kana dinhi sa yuta karon. Kadtong nanaghupot sa priesthood gitugutan sa paglihok sa ngalan sa Dios sa pagpangulo sa Iyang Simbahan ug sa pagpangalagad sa sagradong mga ordinansa nga gikinahanglan alang sa kaluwasan, sama sa pagbunyag, kumpirma, pagpangalagad sa sakrament, ug pagminyo sulod sa templo. Ang matag matinud-anon nga Santos sa Ulahing Adlaw nga lalaki, babaye, ug bata nagkinahanglan og mga ordinansa sa priesthood ug mapanalanginan pinaagi sa pagdawat niini.

Mga Office sa Priesthood

Adunay duha ka dibisyon sa priesthood: ang Melchizedek ug Aaronic. Ang Melchizedek Priesthood naglangkob og mas dako nga awtoridad kay sa Aaronic Priesthood.

Sa duha niini nga dibisyon mao ang piho nga mga office, o mga dapit sa responsibilidad. Ang mga office sa Aaronic Priesthood mao ang deacon, teacher, priest, ug bishop. Sa Melchizedek Priesthood, ang mga office mao ang elder, high priest, patriarch, Seventy, ug Apostol. Kadto nga naghupot niini nga mga office giorganisar ngadto sa mga korum, o mga grupo. Ang matag office adunay piho nga mga katungdanan nga naka-assign niini.

Mga yawe sa Priesthood

Ang termino nga mga yawe nagpasabut sa awtoridad sa pagpangulo sa piho nga mga unit sa Simbahan o hurisdiksyon. Sa mga stake ug mga ward, sama pananglit, ang presidente sa stake lamang, ang bishop, ug ang mga presidente sa korum ang naghupot sa mga yawe sa priesthood. Ang mga yawe ihatag pinaagi sa pagpandong sa mga kamot sa usa ka naghupot sa priesthood nga awtorisado sa pagtugyan niini.

Ang mga Presidente sa korum sa Melchizedek Priesthood makadawat sa mga yawe sa presidency ug sa pagpangalagad sa espirituhanong mga butang (tan-awa sa D&P 107:10, 18–19).
Ang mga Presidente sa korum sa Aaronic Priesthood makadawat sa mga yawe sa pagpangalagad sa mga anghel ug sa pagpahigayon sa mga ordinansa sama sa bunyag ug sa sakrament (tan-awa sa D&P 107:20).
Ang Presidente sa Simbahan naghupot sa tanang yawe sa priesthood alang sa kinatibuk-ang Simbahan (tan-awa sa D&P 81:1–2).

Mga office ug pipila ka mga katungdanan sa Melchizedek Priesthood:

Ang mga Elder “mokumpirma niadto kinsa mga nabunyagan diha sa simbahan, pinaagi sa pagpandong sa mga kamot alang sa bunyag sa kalayo ug sa Espiritu Santo” (D&P 20:41).
Ang mga High priest “mangalagad sa espirituhanon nga mga butang”, ug “adunay katungod sa pagdumala” sa mga office sa mga elder, priest, teacher, ug deacon (D&P 107:12).
Ang mga Patriarch mohatag og patriyarkal nga mga panalangin (tan-awa sa D&P 107:53; 124:91–93).
Ang mga Seventy magsangyaw sa ebanghelyo ug talagsaon nga mga saksi ni Jesukristo ubos sa pagdumala sa Korum sa Napulog Duha ka mga Apostoles (tan-awa sa D&P 107:25, 34).
Ang mga Apostoles magsilbi nga mga “talagsaon nga mga saksi sa ngalan ni Kristo sa tibuok kalibutan” (D&P 107:23).

Ang mga office ug pipila ka mga katungdanan sa Aaronic Priesthood:

Ang mga deacon mopaambit sa sakrament.
Ang mga Teacher “magbantay diha sa simbahan sa kanunay, ug magpaduol ug maglig-on kanila ” (D&P 20:53).
Ang mga Priest “magtudlo, … magbunyag, mangalagad sa sakrament, ug moduaw sa balay sa matag miyembro” (D&P 20:46–47).
Ang mga Bishop mao ang presidente sa korum sa mga priest ug, isip high priest, mangulo sa tanang miyembro sa ward (tan-awa sa D&P 107:87–88).

Mga paghulagway sa litrato pinaagi ni Hyun-Gyu Lee, Welden C. Andersen, Matthew Reier, Ruth Sipus, Craig Dimond, ug John Luke