Paglawig nga Luwas sa Pagpauli
Bisan og ang mga kadagatan sa kinabuhi usahay baluron, ang mga Santos sa Ulahing Adlaw sa Visakhapatnam, India, nasayud nga ang pantalan sa panimalay mao ang dapit sa kalinaw.
Matag adlaw ang mga mananagat sa Visakhapatnam, India, molawig ngadto sa dagat. Sa kasagarang mga adlaw ang mga balud inanay ra, ang dagat nindot, ug ang mga sakayan puno sa isda inig pauli. Usahay, hinoon, ang tubig baluron. Ang mga kalangitan magdag-om, mahulgaon nga mga balud motumaw, ug malipay ang mga mananagat basta lamang makapauli sila nga luwas ngadto sa ilang pantalan.
Matag adlaw ang mga Santos sa Ulahing mga Adlaw sa Visakhapatnam manggawas ngadto sa kalibutan. Sa kasagaran ang kinabuhi mobulig kanila. Makaangkon sila og kahibalo, makakaplag og mga higala, ug mamauli nga puno sa kalipay sa kinabuhi. Panagsa, hinoon, ang kalibutan dili linaw. Ang pagkasagmuyo mobanlas sama sa mga balud, ang tintasyon daw tag-as, ug ang mga pagduha-duha mopangit-ngit sa espirituhanong kalangitan. Niana nga mga adlaw malipay sila samtang makapauli nga luwas ngadto sa ilang dapit sa kalinaw, sa pantalan nga ilang gitawag og panimalay.
Mga Litrato nga anaa sa Bong-bong
Duha adto nga batan-ong mga Santos sa Ulahing Adlaw, sila si Naga Bushan Ratnam ug si Pavani Kotala Ratnam, nagpuyo uban sa ilang mga ginikanan sa usa ka gamay nga apartment nga layo sa lungsod apan duol sa galingan sa puthaw diin nagtrabaho ang ilang papa. Imong mahibaloan pinaagi sa mga litrato nga naa sa ilang apartment kon unsa ang ilang mga prayoridad. Mga litrato sa pamilya mipuno sa butanganan sa libro duol sa atubangang pultahan, ug sa dapit nga katulganan, mga litrato sa Manluluwas, sa templo, ug sa Unang Kapangulohan midayan-dayan sa mga bong-bong.
“Sa akong pagbangon, kadto nga mga litrato mao ang unang mga butang nga akong makita,” miingon si Pavani. “Inig katulog nako sa gabii, mao sab kini ang katapusang mga butang nga akong makita.”
Si Pavani mituo nga kitang tanan makamugna og dapit sa kalinaw diha sa atong mga panimalay. “Mao nga gihimo nakong limpyo kanunay ang mga butang,” miingon siya. “Usa kana ka paagi sa paghimo nga komportable sa Espiritu nga moadto didto.” Ug sa eskwelahan, “ako kanunay nga adunay Alang sa Kalig-on sa mga Kabatan-onan sa akong bag, mao nga sa matag kuha nako og libro, kanunay ko kini nga makita.”
Si Naga nakamatikod nga ang pagpakigsulti sa iyang igsoon naghatag kaniya og kalinaw. “Dayag lang nga kami makig-istorya sa among mga ginikanan ug magtinguha sa ilang tambag sa daghang butang,” miingon siya. “Presidente sa district ang among papa, mao nga makig-istorya kami kaniya sa tanang higayon opisyal man nga pag-istorya og dili opisyal. Ug ganahan kaming makig-istorya sa among mama. Apan adunay butang nga espesyal mahitungod sa pagpakig-istorya sa akong igsoong babaye.” Kon si Naga saputon si Pavani mohupay kaniya. Si Naga maingon og dili kaayo matinagdanon, mao nga si Pavani mitabang kaniya nga mas mahigalaon.
“Apan labaw sa tanan, among gilig-on ang usag usa sa pagtuman sa mga sumbanan,” miingon si Naga. Sama pananglit, si Pavani mangayo kang Naga og tambag mahitungod sa tarung nga sininaan. “Kon sa iyang hunahuna wala kini mauyon sa mga sumbanan sa Simbahan, dili ko kini isul-ob,” miingon siya. Ug sa kasagaran maghisgot sila mahitungod sa pagserbisyo, sa Simbahan ug sa komunidad. Ang ingon nga diskusyon may kabahin sa pangandoy ni Naga nga ugma damlag mamahimong usa ka cardiologist (doktor sa kasingkasing). “Gusto ko nga ang akong trabaho mahimo nga laing paagi sa pagserbisyo,” miingon siya.
Ang mga batan-ong Ratnam mipasabut nga ang pag-angkon og priesthood diha sa ilang panimalay nakadugang usab sa maayong relasyon sa ilang pamilya. Ilang nahandum kon giunsa silang tanan paggiya sa ilang amahan ngadto sa Simbahan walo ka tuig na ang milabay, bisan kinahanglan pa silang magbiyahe—silang upat—og 40 ka kilometros (25 ka milya) sa pagpadulong sakay sa single nga motor aron lamang makaabut sa ilang mga miting. Naghisgot sila mahitungod sa pag-ampo sa hugot nga pagtuo alang kang Pavani dihang siya nagkasakit sa adlaw nga ang ilang Papa gibunyagan, mahitungod sa panalangin sa priesthood nga gihatag sa Papa ngadto sa grabe og sakit nga si Naga panahon sa mga eksamin sa eskwelahan, ug mahitungod sa mga paagi kon giunsa sa kanunay nga pagtambag sa iyang Papa kauban sa iyang Mama, uban kanila, ug sa pag-ampo ngadto sa Langitnong Amahan kon maghimo og mga dagkong desisyon.
“Akong nakita ang positibong mga kausaban samtang ang among pamilya mitubo sa ebanghelyo,“si Pavani miingon. “Ang ehemplo sa akong mga ginikanan ug sa akong igsoon nga lalaki migiya kanako isip kinamanghuran sa pamilya. Nasayud ako nga si Jesukristo mitabang kanako sa tanang bahin sa akong kinabuhi. Ania ang mga tawo libut kanako kinsa nakatabang kanako ug nahigugma kanako, ug anaa kanako ang gugma sa Manluluwas. Kana nga gugma mas labaw ka importante alang kanako kay sa bisan unsa pang butang.”
Ang ingon nga paghigugma makita dihang ang pamilya mibiyahe sa Templo sa Hong Kong China aron ma-sealed. Dinhi sa yuta, si Naga miingon, ang templo mao ang pinakaluwas nga dapit sa tanan: “Usa kini ka dapit sa kabalaan. Ang paghunahuna lang gani niini nagdala na og kabalaan sa among panimalay.” Ug naghimo kana sa apartment sa mga Ratnam nga usa ka makalipay nga dapit nga puy-an.
Kasiguroan pinaagi sa Kasulatan
Sila si Hepsiba, Sandeep, ug Sujith Batha, nga nagpuyo kauban sa ilang mga ginikanan sa downtown sa Visak (nga maoy tawag sa mga tawo sa maong siyudad), miingon nga ang mga kasulatan mao ang mga angkla sa ilang pantalan sa kalinaw. “Pinaagi sa pagbasa sa mga kasulatan, atong gidapit ang Espiritu sa paggiya kanato sa husto nga dalan, sa paghimo og maayong mga desisyon sa atong kinabuhi, ” miingon si Hepsiba. “Gidapit usab nato ang Espiritu sulod sa atong panimalay kon kita dunay family home evening ug pamilya nga pag-ampo.”
Sa pagkatinuod, si Sandeep miingon, ang iyang mama mopahinumdom kanila “sa pag-ampo matag adlaw inig panggawas ug inig abut. Kon siya moingon nga, ‘Palihug pagmapasalamaton,’ naghimo kana kanako nga magmapasalamaton sa tanang butang.”
Si Sujith miingon nga agi og dugang sa ilang panimalay, lain usab nga dapit sa kalinaw mao ang mga miting sa branch, diin ang mga miyembro kauban nga magkat-on sa ebanghelyo ug diin ang tanan welcome sa pagsimba, ug diha sa mga kalihokan diin ang mga kabatan-onan nga sama og mga sumbanan makalig-on ug makahatag og kasiguroan sa usag usa. “Ang Ginoo miingon nga kita ang kahayag sa kalibutan,” si Sujith miingon (tan-awa sa Mateo 5:14). “Samtang kami nagtigom, among gipasiga kanunay kana nga suga ug labawng mibati sa kakomportable sa pagpaambit niini.”
Malipayon nga Nakauli
Kana mao ang matang sa pagpaambit nga nagdala sa ebanghelyo ngadto sa pamilyang Butty. Sila si Sister Sandhya ug si Sudha Butty ug ang ilang mama ug papa ingon og dili makahunong sa pagpahiyom—matinguhaon sila nga mosulti kon sa unsang paagi sila napaila sa Simbahan.
“Mipasakop kami sa Simbahan nga usa ka pamilya,” si Sandhya mipasabut. “Dugay na kaming nagpangita sa husto nga simbahan. Nasayud kami nga kinahanglan kaming magpabunyag. Dayon usa ka adlaw ang among papa nakakita og duha ka elder. Ang ilang mga name tag nag-ingon nga, ‘Ang Simbahan ni Jesukristo,’ ug nahibalo siya nga kinahanglan siyang makigsulti kanila.”
Ang mga panaghisgut gisugdan sa kahinangop. “Among nakat-unan nga, aron sa pagbuhat sa kabubut-on sa Amahan, si Jesukristo nag-antus alang kanato, milampos sa Pag-ula ug naghimong posible alang kanato sa pagbalik ngadto sa Langitnong Amahan pinaagi sa pagsunod Kaniya,” si Sudha miingon. Uban niana nga pagpamatuod nga lig-on gayud, ang pagpasakop sa Simbahan maingon nga daw hapsay nga paglawig sa mahigalaong kadagatan paingon sa panimalay, ug ang mga Butty malipayon sa ilang desisyon sukad niadto.
Sa matag adlaw ang sakayan nga pangisda molawig gikan sa Visakhapatnam. Sa matag adlaw ang kabatan-onan sa mga branch sa Visakhapatnam First, Second, ug Gajuwaka manggawas bisan asa. Tanan sila makauli nga luwas sa pamilyar nga paulianan. Apan sa kahimtang sa mga Santos sa Ulahing mga Adlaw, usa kini ka dapit nga dili lamang luwas sa pagkakaron apan sigurado usab alang sa kahangturan.
Mga litrato pinaagi ni Richard M. Romney
Ang Simbahan ug ang pamilya naghatag og luwas nga dapit alang sa pamilyang Ratnam (sa nag-una nga pahina) ug (padulong sa tuo gikan sa wala sa ibabaw) si Sujith, Sandeep, ug Hepsiba Batha; Pavani ug Naga Ratnam; ang Butty family; ug ubang mga kabatan-onan sa Visakhapatnam, nga adunay tulo ka branch.