Ang Paghimo sa mga Baruganan sa Welfare nga Kabahin sa Inyong Kinabuhi
Ang pagsunod sa mga baruganan sa welfare mao ang kabahin sa pagpahimo sa atong hugot nga pagtuo kang Jesukristo ngadto sa buhat—pinaagi sa pagwagtang sa wala kinahanglana nga utang, magpakabuhi sulod sa atong kinitaan, ug sa pag-establisar og balay tipiganan sa pamilya ug pinansyal nga mga reserba, sama pananglit. Ang atong hugot nga pagtuo modala kanato sa pag-edukar sa atong mga hunahuna ug atong mga kamot ug sa pagtrabaho matag adlaw sa atong mga kinabuhi aron mahimong mapaningkamuton sa kaugalingon. Sa pag-atiman sa atong kaugalingong panginahanglan, kita mas makasangkap sa atong mga kaugalingon ug makaserbisyo sa uban. Hinaut nga kita makasunod sa tambag dili lamang sa pagbuhat og maayo kondili maningkamot nga mahimong maayo, dili lamang sa pagbuhat sa labing maayo kondili nga mahimong labing maayo.1 Ang pagkamasulundon sa tambag sa Ginoo makahatag og temporal ug espirituhanong mga panalangin. Kini nagtugot kanato sa pag-atubang sa mga hagit sa kinabuhi nga gisangkapan sa kaisug ug pagsalig kay sa kahadlok ug pagduhaduha.
Si Presidente Thomas S. Monson nagpahinumdom kanato sa atong katungdanan sa pagbayaw ug pagpanalangin sa uban:
“Akong mga kaigsoonan, unta pangutan-on nato ang atong mga kaugalingon sa pangutana … : ‘Unsay akong nabuhat alang sa usa ka tawo karon?’ Unta ang mga pulong sa usa ka pamilyar nga himno molagbas sa atong mga kalag ug makakaplag og kapahulayan sa atong mga kasingkasing:
“Nakabuhat ba ako og bisan unsang maayo Karon?
Nakatabang ba ako sa usa nga nagkinahanglan?
Nakapasaya ba ako sa nagsubo ug nakapalipay ba ako og usa usa ka tawo?
Kon wala, napakyas gyud ako.
May palas-anon ba nga napagaan karon
Tungod kay mauyunon kong makigbahin?
Ang masakiton ug naluya natabangan ba sa ilang pagpanaw?
Sa nagkinahanglan sila sa akong tabang didto ba ko?
“Kana nga serbisyo diin kitang tanan gitawag mao ang serbisyo sa Ginoong Jesukristo.”2
Paghulagway sa litrato pinaagi ni Jerry Garns