Setenta y Singko ka Tuig nga Pagpuyo sa Madaginuton nga Paagi
Bisan tuod kon ang plano sa welfare sa Simbahan wala pa gipatuman, ang unang mga Santos miila na sa kaimportante sa pagpuyo og kinabuhi nga mapaningkamuton sa kaugalingon, pag-atiman sa mga kabus ug timawa, ug pagserbisyo sa uban. Ang Propeta Joseph Smith mipahayag, “Ang usa ka tawo nga puno sa gugma sa Dios, dili kontento nga mopanalangin sa iyang pamilya lamang, apan molakip sa tibuok kalibutan, naghinamhinam sa pagpanalangin sa tibuok kaliwatan sa tawo.”1
Wala madugay human ang Simbahan natukod, gagmay nga mga balay tipiganan sa bishop [bishop’s storehouse] ug mga opisina sa ikapulo gipabarug aron pagtabang sa nanginahanglan. Si Joseph Smith mipasiugda sa pagpangulekta og mga halad sa puasa sa Kirtland, Ohio, panahon sa mga 1830.2 Ang baruganan sa ikapulo gipaila usab niining panahona (tan-awa sa D&P 119). Ang ikapulo ug mga halad sa puasa gibayad pinaagi sa pagtrabaho, produkto, ug ubang mga kagamitan. Ang mga bishop ug mga presidente sa branch ang midumala sa pagpang-apud-apud niini nga mga kapanguhaan sama sa gihimo karon.3
Daghan sa unang mga Santos nakigbisog sa pagsuporta sa ilang mga kaugalingon. Aron pagbatok sa katapulan, ang mga lider ug mga miyembro sa Simbahan naghiusa sa pagpangita og mga paagi aron sa pagmugna og matunhayon nga mga panginabuhian. Ang pipila nakakaplag og trabaho sa pagtukod og mga bilding sa Simbahan ug pagkompleto sa pangpublikong proyekto nga mga trabaho. Ang uban nag-uma ug mibaligya og mga manggad aron sa pagsangkap sa ilang mga kaugalingon ug sa ilang mga pamilya. Samtang naghiusa sila sa pagbudlay, ang mga Santos napanalanginan og daghan aron pagtagbaw sa ilang mga panginahanglan.Samtang
ang mga hagit sa atong panahon lahi, ang mga Santos sa Unang mga adlaw nagpadayon sa pagsangkap sa ilang mga kaugalingon ug nag-atiman sa mga kabus ug timawa pinaagi sa pagsunod sa mga pagtulun-an sa Manluluwas ug sa mga ehemplo nga gihan-ay sa nangaging mga henerasyon.
Ang mga Santos sa Central Valley, California ang naghatag og trabaho alang sa gipanag-iya sa Simbahan nga ubasan sa Madera, California, USA. Ang ubasan namunga og gatusan ka mga tonelada nga mga pasas nga paggagamiton sa mga kabus sa tibuok kalibutan.
Wala, sa itaas: Ang mga Santos nga Dutch nag-ani ug nagkarga ug mga patatas alang sa mga Santos nga German niadtong 1947. Itaas: Ang pagbansay sa produksyon sa pagkaon didto sa Ecuador nakatabang sa mga miyembro nga mopatubo og mas mabungahon nga mga tanaman.
Itaas, gikan sa wala: mga litrato pinaagi ni Cornelius Zappey, sa maayong kabubut-on sa Church History Archives; Howard Collett; ug Peter Evans