Mga Pangutana ug mga Tubag
“Unsaon nako pagkahibalo kon ang akong mga pagsulay gituyo ba sa pagtabang kanako nga mahimong mas maayo o kon kini paagi ba sa Langitnong Amahan sa pagpasidaan kanako nga nagpadulong ako ngadto sa sayop nga dalan?”
Ang mga pagsulay makatabang kanimo nga mahimong mas maayo—bisan unsa pa man ang hinungdan niini—kon gamiton nimo kini sa paglambo sa espirituhanong paagi.
Ang imong konsensya mopahibalo kanimo kon ikaw nagpadulong sa sayop nga dalan. Kon ikaw mobati og dili maayo sa usa ka butang nga imong gibuhat, pag-ampo ngadto sa Langitnong Amahan ug paghangyo sa Iyang pagpasaylo. Paningkamuti nga masulbad ang bisan unsang mga problema nga ikaw ang nakaingon. Mahimo usab kang magpatambag sa imong mga ginikanan ug mga lider sa priesthood. Kini nga mga lakang makatabang kanimo nga mobati nga mas maayo ug makapabilin kanimo sa saktong direksyon.
Ang mga pagsulay nga dili resulta sa sala makatabang usab kanimo nga mahimong mas maayo. Kini nga mga matang sa pagsulay makasulay sa imong hugot nga pagtuo o pasensya o makatudlo kanimo kabahin sa imong kaugalingon. Aron sa paggamit niining mga pagsulay alang sa imong kalamboan, pangutan-a ang imong kaugalingon kon unsa ang imong makat-unan gikan niini ug unsaon nimo nga mahimong mas maayo.
Ang imong pagtuo malig-on atol sa mga pagsulay kon ikaw mohangyo og tabang sa Langitnong Amahan. Sama sa gibuhat sa Manluluwas sa dihang Siya nag-antus, ikaw makaampo nga “labi pa ka mainiton” (tan-awa sa Lucas 22:44). Ang Langitnong Amahan mahimong motangtang sa pagsulay, o Iyaha kang lig-unon aron ikaw makaluhatay niini (tan-awa sa Mosiah 24:14–15).
Ang mga Higala ug Pamilya Makatabang
Usa sa mga paagi nga ang Langitnong Amahan mopasidaan kanako kon ako padulong na sa sayop nga dalan mao nga Siya modasig og mga higala o mga sakop sa pamilya sa pagpakigbahin sa ilang mga pagpamatuod o personal nga mga kasinatian ngari kanako. Kon ako mobati nga sad-an o may tinguha sa pag-usab samtang sila mopakigbahin sa ilang mga pagbati, nasayud ko nga kinahanglan kong maghinulsol ug maghimo og mga kausaban sa akong kinabuhi.
Luis S., 17 anyos, Florida, USA
Hunahunaa Kini
Mibati ko nga ang labing maayo nga paagi sa pagkasayud sa katuyoan sa pagsulay mao ang pagpuasa ug pag-ampo kabahin niini sa kinasingkasing. Usab sulayi sa paghunahuna kabahin niini. Kon imong mabuntog ang pagsulay, mamahimo ba ikaw nga mas maayong tawo o magpabilin ka nga dili mausab? Kon ikaw naghunahuna nga ang pagbuntog sa pagsulay makahimo kanimo nga mas maayo ug mas malipayon, nan ikaw anaa sa saktong dalan.
Ammon K., 16 anyos, Utah, USA
Pabilin sa Hustong Agianan
Kinahanglan kita nga magbasa sa atong mga kasulatan ug mag-ampo matag adlaw, ug kon kita nagbuhat niadtong mga butanga ug mahimong takus uban sa Espiritu Santo, ang Dios mopadayag kanato unsa nga mga pagpili ang angayan ug dili angayan natong buhaton. Kon sa imong hunahuna ang dalan nga imong gisubay dili mao ang gusto sa imong Amahan sa Langit alang kanimo, balik. Kanunay nga magpabilin diha sa higpit ug pig-ot nga dalan.
Elizabeth P., 15 anyos, Pennsylvania, USA
Pag-ampo aron Makat-on gikan sa mga Pagsulay
Ang atong Langitnong Amahan kanunay naghatag kanato og mga pagsulay sa atong kinabuhi, ug kini anaa aron sa paglig-on kanato sa Iyang ebanghelyo ug sa atong hugot nga pagtuo. Kon kita anaa sa dili maayo nga dalan, kana mao ang sangputanan sa dili maayo nga mga pagpili nga atong gihimo. Kanunay mag-ampo aron ang Dios molig-on ug motabang kanimo sa pag-ila unsa ang kaayohan gikan niana nga pagsulay. Aduna akoy lig-on nga pagpamatuod nga ang mga pagsulay nga gibutang sa Langitnong Amahan sa atong dalan makapalig-on kanato, sa pagpalambo sa atong pagpamatuod, sa pagtabang kanato nga makat-on nga dili na malaglag pag-usab, o sa pagtabang sa uban pinaagi sa atong kasinatian.
Ruddy R., 17 anyos, Guayas, Ecuador
Pamalandong sa Imong Kasingkasing
Pamalandunga sa imong kasingkasing kon ang imong mga gipangbuhat maoy butang nga gusto sa atong Amahan sa Langit nga imong buhaton. Anaa kanato ang Espiritu Santo sa atong kinabuhi sa pagtudlo kanato sa maayo gikan sa dautan. Kon ikaw magtinguha sa Dios ug mangutana, ang Espiritu Santo mopakita kanimo unsa ang imong kinahanglang buhaton. Kon ang pagsulay motudlo man o mopasidaan, kini makasilbi sa sama nga katuyoan: sa pagtabang kanimo nga molambo ug mahingpit diha kang Kristo kon ikaw motubag uban sa hugot nga pagtuo ug pagsalig sa Ginoo.
Emily B., 18 anyos, California, USA
Ang Ginoo Mohupay Kanimo
Gituyo sa Langitnong Amahan ang tanang mga pagsulay aron mahimong mga kasinatian nga makapalig-on ug makahulma kanimo nga mahimong mas maayo nga tawo. Nag-agad kini kon unsaon nimo sa pagdala niini. Nasayud ko nga ang pipila sa mga pagsulay daw lisud kaayo para kanato nga sulbaron, apan moabut ang panahon nga kini mopanalangin kanato kon kita adunay hugot nga pagtuo. Kanunay kong naningkamot sa paghinumdom kon unsa ang gitudlo sa Ginoo kanato: “Dili Ko kamo pagabiyaan nga daw mga ilo: Ako mobalik ra kaninyo” (Juan 14:18). Uban niining kaalam makabuntog ka sa bisan unsang pagsulay nga imong atubangon, ug ikaw mas malig-on. Kon ikaw mobati nga ang Langitnong Amahan mipasidaan kanimo nga ikaw padulong na sa sayop nga dalan, pagbaton og hugot nga pagtuo ug paminaw sa mga aghat sa Espiritu aron ikaw makahupot sa puthaw nga gunitanan. Siya nahigugma kanimo ug sa kanunay nagtinguha nga ikaw mamahimo sa imong labing maayo samtang Siya motabang kanimo sa kinabuhi.
Olivia B., 18 anyos, Minnesota, USA
Ang mga Pagsulay Makapasidaan
Sa akong hunahuna ang tanang mga pagsulay gituyo aron sa pagpalig-on kanato, bisan kon usahay kon tan-awon daw dili. Sa dihang 14 anyos pa ko, nasakit ako ug wala makaeskwela sulod sa walo ka bulan ug nagtuon diha sa balay. Kini nga pagsulay nakatabang kanako nga mahimong mas maayo, mas lig-on nga tawo. Kini nakatabang kanako nga magpasalamat unsay anaa kanako. Usahay ang mga pagsulay makapatimbang-timbang nato pag-usab kon asa kita paingon niining kinabuhi, mao nga kini mahimong maayo nga kampana sa pagpasidaan.
Jennifer P., 17 anyos, North Island, New Zealand
Pagmapailubon
Kon ang mga pagsulay resulta sa pagsupak sa sugo, nan kini tingali usa ka pasidaan. Apan kon kini gawas na sa imong kontrol, kini tingali anaa aron sa pagtabang kanimo nga molambo. Ako mag-ampo ug maghangyo sa Langitnong Amahan kon aduna bay usa ka butang nga imong kinahanglang usbon o makat-unan niining kasinatian, ug kon mao, pangutana Kaniya aron imong mahibaloan unsa kini. Pag-ampo alang sa kalig-on ug kahupay. Ug pagmapailubon; ang tubag tingali duol na.
Michaela P., 17 anyos, Idaho, USA