Unsay Natudlo sa Paglangoy ngari Kanako
Ang paglangoy nagtudlo kanako nga ang tanang pagpamugos gikan sa mga higala dili ngil-ad. Usahay makatabang kini kanimo nga molampos.
Pito pa lamang ang akong edad, ug dili kahibalong molangoy, mao nga gi-enroll ko ni mama sa panghapon nga leksyon sa paglangoy kauban sa akong higala nga si Angie. Sa katapusan sa matag leksyon, ang among magtutudlo modala kanamo ngadto sa tunga sa langoyanan [pool] aron sa pagpraktis sa among paglangoy. Kanunay kaming luwas sa tunga tungod kay ang among magtutudlo nagsangga sa among mga tiyan ug nagsul-ob kami og “pangpalutaw” sa among buko-buko.
Pagpamugos sa mga Higala diha sa Langoyanan
Usa ka adlaw si Angie ug ako wala makadala sa among pangpalutaw, mao nga nagkapyot lang kami sa kilid sa langoyanan. Si Angie nakahukom nga mosulay og langoy tabok sa pikas kilid sa bong-bong, mga upat ka pye (1.2 ka metros) ang gilay-on. Nagpanuko ako sa sinugdanan, apan iya kong gihagit. Mao nga bisan og nahadlok ko, nagpundo ko og daghang hangin kutob sa mahimo ug mihunat ngadto sa tubig, nanghinaot nga makaabut sa pikas kilid. Imbis nga sayon ra ang paglutaw sama sa akong nahimo kaniadto samtang naa ang palutaw sa akong luyo, nagsugod ako sa pag-unlod. Nataranta ako. Nahibalo ko nga malumos na ko. Dayon akong nahinumduman ang gisulti sa akong magtutudlo sa nag-unang pipila ka semana: “Kon mawad-an sa kontrol samtang naglangoy, ipataas lang ang usa sa imong mga kamot gawas sa tubig, ug adunay motabang kanimo.”
Sa paghunahuna niini, akong gipataas ang akong kamot sa direksyon nga sa akong hunahuna pataas. Wala koy nabatyagan nga hangin. Akong gituyhad ang akong kamot sa bisan unsang direksyon, nga wala gayud makit-i asa ang ibabaw. Hangtud nalang nga ang akong ulo nabangga sa kilid sa pool. Si Angie didto naghulat kanako. Sa akong tan-aw wala gyud siya masayud nga hapit na ko “malumos.”
Pipila ka semana human niadto didto ako sa linaw kauban sa akong pamilya. Dili gihapon kahibalong molangoy didto ra ko nagkapakapa sa mabaw nga tubig. Didto ra ko sulod sa 10 minutos dihang akong nakita ang akong higala nga nagpadulong sa linaw. Nakalitan ko. “Unsa kaha kon mahibaloan ni Stepahnie nga dili ko kahibalong molangoy?” Naghunahuna ko. Maulaw gyud ko. Busa mikamang ko og nagpakaaron-ingnon nga naglangoy—milakaw ko gamit ang akong mga kamot samtang nagsikad-sikad sa akong mga tiil. Si Stephanie miambak sa tubig ug misugod sa paglangoy. Nagdugang lamang kini sa akong kaulaw. Pagkataud-taud miduol siya ug nakig-istorya kanako. Dayon mi-dive siya sa lain nga direksyon, mibiya kanako nga nadasig sa iyang perpekto, dungan kaayo nga lihok sa paglangoy. Nagpadayon ako sa akong pagpakaaron ingnon nga paglangoy, mibati nga daw buangon.
Human sa pipila ka minutos mihukom ako sa paghunong nga nahadlok kaayo ug misulay sa paglangoy. Diha ra ko sa mabaw, mao nga akong giisa ang akong mga kamot gikan sa ubos ug misugod sa paglangoy nga sama sa iro. Nagsilbi kini. Milutaw ako. Pipila lamang kadto ka segundo, apan milutaw ako. Kini akong gibalik-balik sa paghimo sa tibuok gabii. Sa dihang namauli kami, makalangoy na ko sama sa iro tabok sa tibuok nga linaw.
Ang Pagpamugos sa mga Higala Gamhanan
Kon maghunahuna ko niining duha ka mga kasinatian, natingala ako sa gahum sa pagpamugos sa mga higala. Usa ka adlaw kini hapit molumos kanako; sa laing adlaw nagdasig kini kanako sa pagkat-on nga makalangoy. Ingon niana uban sa pagpamugos sa mga higala—mahimo nga negatibo kini og positibo, apan sa kanunay gamhanan kini.
Ang pagpamugos sa mga higala maoy usa ka rason nganong ang mga Pariseo dili motuo sa mga pulong ni Kristo: “Kay labi pa man ugod nilang gihigugma ang pagdalayeg gikan sa mga tawo kay sa pagdalayeg gikan sa Dios” (Juan 12:43). Sa iyang damgo si Lehi nakakita og mga tawo nga gikaulaw ang Ginoo tungod sa mga tawo nga mibiay-biay ug nagtulisok sa ilang mga tudlo gikan sa usa ka dako og lapad nga gambalay (tan-awa sa 1 Nephi 8:26–28).
Pamilyar ako niining negatibo nga bahin sa pagpamugos sa mga higala—ang bahin nga naghimo sa mga tawo nga motalikod gikan sa ilang nahibaloan nga husto. Gibiay-biay ako tungod sa akong mga sumbanan sa Simbahan. Duna koy mga higala nga gustong mangawat og mga sinina, manikas atol sa eksamin, ug bangis ngadto sa ubang tawo. Imbis magtinguha nga molutaw ko ug molampus, maingon hinoon og sila mga angkla nga nagbira kanako patidlom, nga naningkamot sa paglumos kanako.
Apan may mga higala sab ko nga midasig kanako sa paghimo og maayong mga butang—mga butang nga naghimo sa akong kinabuhi nga mas maayo, dili mas ngil-ad. Sa dihang naa ko sa ikawalo nga grado, ang akong higala nga si Ali mikombinser kanako sa pag-try out sa drill team alang sa sunod nga abli sa ting-eskwela. Dili kini usa ka sayon nga buluhaton, tungod kay ang paghunahuna nga mo-try out alang sa usa ka kalihokan isip bag-ong freshman sa usa ka dako nga high school nakalisang kanako. Si Ali mikombinser kanako sa paghimo og butang nga makahuluganon nga dili gayud unta nako mabuhat kon walay pagdasig gikan sa usa ka higala. Ug tungod niini nga mahigalaong pagpamugos, ang akong pag-adjust sa high school nga kinabuhi nahimong mas sayon.
Maayong mga higala ang midasig kanako sa tibuok high school ug sa college, naghatag kanako sa kaisug nga molansar alang sa student council, maningkamot alang sa maayo nga grado, ug sa pag-alima sa akong pagpamatuod sa ebanghelyo. Kini nga mga higala mga positibong impluwensya sa akong kinabuhi. Gusto nilang magmalampuson ako, ug gitabangan ko nila nga motubo.
Kini nga mga kasinatian nagtudlo kanako nga dili tanang pagpamugos sa mga higala ngil-ad, sigon sa hunahuna sa kadaghanan. Nagdepende kini sa matang sa pagpamugos ug kon diin man kini gikan. Akong nakat-unan nga kon akong mapalibutan ang akong kaugalingon sa husto nga matang sa mga impluwensya, mas layo kanako ang pagkatidlom ngadto sa mga pamaagi sa kalibutan. Ang positibo nga pagpamugos gikan sa Simbahan ug gikan sa mga higala nga may taas nga mga sumbanan mao ang kusog nga naglihok sama sa palutaw nga naa sa luyo sa akong kinabuhi, nga nagpalutaw kanako.
Mga paghulagway pinaagi ni Steve Kropp