O Se Afi e Mu i totonu ia te A’u
O le aso lava na ia iloa ai faitau, o le aso foi lena sa maua ai e Eduardo se molimau i le Tusi a Mamona ma lona mana.
“Sa masani ona fai mai lo’u tamamatua, ‘Afai tatou te fia avea ma se tagata maoae, e tatau ona tatou iloa faitautusi,” o le tala lea a Eduardo Contreras. “Na sa’o lava lo’u tamamatua.”
Ae peitai, mo Eduardo, o le ala i le iloa faitautusi o se ala umi. I le avea ai ma se tasi o se fanau e toalima sa tausia e se tina ua maliu lana tane i le aai o Córdoba, Atenitina, sa nofo ai o ia mai le a’oga ina ua valu ona tausaga ae alu e faigaluega e fesoasoani i le tausiga o lona aiga.
“Sa matou matuai matitiva lava,” o lana tala lea. Ina ia fesoasoani ia a’ua’u le faasoa, sa faaiila ai e Eduardo seevae, fai piliki, piki pateta, faatau nusipepa, ma faia isi galuega e le masani ai, seia oo ina avea o ia ma se alii talavou, lea na maua ai sana galuega tumau i le malo.
A o mavae atu tausaga, sa faaipoipo Eduardo ma amataina lona lava aiga. E oo ane i le taimi na tuua ai e le toatele o lana fanau e toalima lo latou aiga, sa le’i mafai lava ona faitau o ia ma sa itiiti foi se faamoemoe e mafai ona ia iloa faitau. Sa suia lena mea i se tasi o aso ina ua ia tuliesea nisi o tamaiti o le nuu o e sa taufaalilili i ni faifeautalai se toalua o le Au Paia o Aso e Gata Ai i luma o lona fale. Sa ia valaaulia ia faifeautalai i totonu o lona fale, ma e lei leva ae fai loa a la lesona ma lona toalua o Maria.
“Sa faigata ia te au ona malamalama i se mea sa laua fai mai ai, ona sa laitiiti se faa-Sipaniolo sa la tautatala ai,” o le tala lea a Eduardo, “ae sa la faaali mai ia te au se tamaitusi sa i ai ni ata o le Faaola ma le Perofeta o Iosefa Samita i le Vao Paia. Sa ou faapea sa mananaia ata sa la faaali mai ia i maua ma mea sa la aoaoina mai.”
E lei leva ae sui mai isi faifeautalai ia i laua, e aofia ai se faifeautalai o lana gagana autu o le faa-Sipaniolo. Sa faagaeetia Eduardo ma Maria, o e na maliu se la afafine pepe i nai tausaga na muamua atu, i le ata tifaga a le Ekalesia E Faavavau Aiga. E lei leva, ae papatiso loa i laua ma lo la atalii laitiiti o Osvaldo.
O le papatisoga o Eduardo i le 1987, na oo mai ai se manao e faamalosia lana molimau e ala i le faitauina o le Tusi a Mamona. “O le a faapefea ona ou iloa faitau?” sa ia fesili ai i lona toalua. Sa tau atu e Maria e tilotilo i mataitusi, ona tuufaatasi lea i lona mafaufau, ma taumafai e faaleo ia upu, ona taumafai lea e ta’u leotele. Faatasi ai ma le faataitai soo, sa ia faamautinoa atu ai ia te ia, o le a iu lava ina iloa faitau.
O le taimi lena ua 45 tausaga o Eduardo, sa ia iloa faaleo le tele o mataitusi, ae sa lei taumafai o ia e faitau talu ona ia tuua le a’oga lea ua toeitiiti atoa le fasefulu tausaga talu ai.
Sa Ou Lagonaina se Afi
Faatasi ai ma se tatalo i lona loto, sa saofai ai Eduardo i lalo o se paolo i tuafale i se tasi aso vevela o le taumafanafana. “O iina,” sa ia fai mai ai, “sa ou naunau ai loa e fai le taumafaiga.”
Fai mai Maria, na te lei mafaufauina lava le mea na tupu na sosoo ai. A o gaoioi o ia i le umukuka, sa fai lava ma faalogologo atu ia Eduardo o taumafai e faaleo ia mataitusi ma upu. “Sa faafuasei ona ou faalogo atu ua topetope lana tautala,” sa ia fai mai ai. “Sa ou faalogo ma iloa ai sa faitau—lelei lava o ia. Sa le’i sili atu i le itula ma le afa le taimi ua te’a, ae o lea ua faitau!”
Sa matuai maelega Eduardo i lana taumafaiga o lea sa na le matauina ai o loo faitau o ia. Ae a o faitau o ia, o lana tala lea, “sa ou lagonaina se afi ua mu i totonu ia te au.” O le fefe ma le te’i, sa valaau atu ai Eduardo i lona toalua, “Mami, o le a lenei mea ua tupu ia te a’u?”
“O le Agaga o le Alii,” na tali atu ai María. “O lena ua lelei lau faitau!”
A o ia faamatalaina le aafiaga, na fai mai Maria, “O se mea e le mafai ona ma faafitia.”
Na faaopoopo mai Eduardo, “O le aso na ou iloa ai faitau, o le aso foi lena na maua ai la’u molimau i le Tusi a Mamona ma lona mana.”
Talu mai lena taimi, na amata ai ona ala Eduardo i le 4:00 i le vaveao e faitau le Tusi a Mamona a o lei alu e faigaluega. Ona ia faitauina lea o le Mataupu Faavae ma Feagaiga, sosoo ai ma le Tusi Paia. Ua i ai nei se fatatusi o loo teuina ai le fale o le aiga o Contrera, o loo maua ai ma ni tusi o tausaga e i luma atu o le 1987.
A o tuputupu ae le malamalama o Eduardo ma Maria i le talalelei, sa faapena foi a laua molimau. Ina ua maliu le la tama o Osvaldo i se faalavelave tautaavale i le 2001, o a laua molimau—faapea ma ni aafiaga faaleagaga mamana i taimi o tatalo ma i totonu o le Malumalu o Buenos Aires Atenitina, lea sa faamauina ai i latou ma Osvaldo—sa fesoasoani ia i laua e taulima ai le maliu o lo la atalii.
“Ana o nisi o matua semanu ua fememea’i,” o le tala lea a Eduardo, “ae sa ma lagonaina se toafilemu na faapea mai, ‘O loo manuia lo oulua atalii.’ Ioe sa ma fetagisi. O ia o se atalii lelei, ma ma te misia o ia. Ae ua faamauina i matou i le malumalu, ma ua ma iloa le mea o loo i ai o ia.”
O Le Malamalama o le Iloa Faitau ma Tusitusi
E faafetai i se a’oga mai se tagata o lana uarota, ua iloa ai foi e Eduardo tusitusi. “O le taimi muamua,” sa ia fai mai ai, “sa le mafai foi ona ou sainia lo’u igoa.”
Faatasi ai ma le malamalama o le iloa faitau ma tusitusi, ua iloa ai e Eduardo le moni o upu a lona tamamatua.
“Ua tatou i ai iinei i le lalolagi ina ia mafai ona tatou alualu i luma i nai vaega itiiti i aso taitasi,” o lana tala lea. O le aoao e faitau ma tusitusi, sa ia faaopoopo mai ai, ua ia ta’u atu ai i lana fanau ma fanau a lana fanau, e le tuai lava ona aoao, faalelei atili, ma avea ma le ituaiga tagata ua finagalo le Atua e avea ai i tatou. “Ona ua mafai ona ou faitau, ou te aoaoina ai se mea fou i aso uma lava,” o lana tala lea.
O le taimi nei ua mafai e Uso Contrera ona faitau soo se mea e manao e faitau, e aofia ai nusipepa ia sa masani ona ia faatauina atu a o avea ma se tamaitiiti e lei iloa faitautusi. O loo tumau pea ona avea tusitusiga paia ma tusi e sili ona fiafia i ai o ia, aemaise lava o le Tusi a Mamona. Ua ia faitauina faavalu mai le isi faavaa i le isi.
“Mo a’u lava ia o le Tusi a Mamona o le faitotoa lea,” o lana tala lea, ma faafetai pea i le ala ua suia ai lona olaga e le iloa faitau ma le talalelei. “O le Tusi a Mamona sa avea ma mea uma ia te au. O loo avea ma mea uma ia te au. Ou te lagona le Agaga i taimi uma ou te susueina ai e faitau.”
Mo Eduardo Contreras, o loo faaalia i luga ma lona faletua, o Maria, o le Tusi a Mamona o le faitotoa lea i le iloa faitau ma tusitusi. “Ou te lagona le Agaga i taimi uma ou te susueina ai e faitau,” o lana tala lea.
Ata na pueina e Michael R. Morris