Sa Ou Faataitaia le Folafolaga a Moronae

Francesco Ferraresi, Lombardy, Italia

O ni nai tausaga ua mavae, sa ou i ai i se fale o sa’u uo ma na ou feiloai ai i ni alii talavou se toalua na lavalava lelei o e na faailoa mai i laua lava o faifeautalai o le Au Paia o Aso e Gata Ai. Sa ou mafaufau o se mea ese lo laua o mai mamao i Italia e faaliliu tagata ua leva ona talitonu i le Faaola.

Mulimuli ane, na ou valaaulia i laua e o mai i lo’u fale. “Afai lua te mananao i ai, e mafai ona oulua o mai ia te au mo se fetufaaiga faaleaganuu,” o la’u tala lea. “Ae aua nei oulua mafaufau o le a sui ai la’u tapuaiga.”

Ina ua matou feiloai i le po na sosoo ai, sa talanoa mai faifeautalai e uiga i le Tusi a Mamona. Sa ou faapea, e ese lava aua ou te lei faalogo muamua i ai. Sa ou valaauliaina i laua e toe o mai, ae ina ua uma le asiasiga lona lua, sa manatu loa lo’u toalua o Ana Maria, e leaga o laua ulu ma sa aluese mai le fale i le taimi o a matou lesona. Sa foliga ese teisi foi ia faifeautalai ia te a’u, ae sa ou fia iloa pe o le a se la tala ma faaauau ai ona matou feiloai pea.

I se tasi afiafi ina ua sau Ana Maria i le fale, sa faalogo mai o matou talanoa e uiga i le faaipoipoga e faavavau. Sa matuai fiafia o ia i lenei mataupu, ma sa tonu loa o le a toe amata faatasi a maua lesona. Sa maoae lona malamalama i tusitusiga paia ma sa masani ona i ai sana lisi umi o fesili. Sa tali e alii faifeautalai nisi o ia fesili i le taimi lava lea, ae o isi sa o i le fale ma sailiili i ai. O vaiaso taitasi e aunoa ma se faaletonu, e foi mai ai i laua ma ni tali, ae o vaiaso taitasi foi e i ai lava se isi lisi o fesili a Ana Maria.

E lei leva ona uma a maua lesona, ae faateia a’u i le talosaga mai o Ana Maria mo la’u faatagaga e papatiso ai. Sa ou fai atu i ai, e leai se afaina ia te a’u pe afai ua liua moni o ia. Sa ou auai i lona papatisoga i le aso 5 o Mati, 1995, ma olioli ai i se lagona matagofie i le taimi o le sauniga.

Sa faaauau ona ou faitauina ni tusi se tele e uiga i le Ekalesia, ma sa faaauau foi ona faamalosiau mai faifeautalai ia te au. Mulimuli ane, sa ou filifili loa e faataitai le folafolaga a Moronae (tagai i le Moronae 10:4–5). Sa ou fia iloa pe o le Tusi a Mamona e mai le Atua pe ua na o se tusi faitau manaia.

I se tasi aso ia Iuni 1995 a o na o au le fale, sa ou tootuli ai i vae o lo’u moega ma ole atu i le Tama Faalelagi, “Pe moni le Tusi a Mamona, ma afai e moni, o afea e tatau ai ona ou papatiso?” Sa faafuasei ona ou lagonaina i lo’u loto ma lo’u mafaufau se leo manino na fai mai, “E moni le Tusi a Mamona.” Ona oo mai lea o se lagona mautinoa o le aso ou te papatiso ai. O le vaiaso mulimuli ane, sa ou toe tatalo ai ma maua mai ai lea tali e tasi. Sa matuai tumu lo’u loto i le olioli. Ua ou iloaina nei na fetalai mai le Atua ia te a’u: o le Tusi a Mamona sa musuia e le Atua ma o Iosefa Samita o se perofeta moni.

Mulimuli ane, o le aso 17 o Setema, 1995, na ou ui ifo ai i le vai o le papatisoga, i le tasi ma le afa tausaga talu mai ona matou feiloai ma faifeautalai. E lei umi, ae faaalia le fiafia o le ma tama teine o Aba Chiara i le Ekalesia ma faapea ona papatiso ai. O Ianuari 1997 na faamau ai lo matou aiga i le Malumalu o Bern Suitiselani.

Ua matou iloa o le Ekalesia moni lenei, o loo taitaia e Iesu Keriso e ala mai i se perofeta ma le perisitua. Matou te faafetai i le Alii mo Lona alofa, mo le taitaiina atu o i matou i faifeautalai, ma lo matou malamalama i le talalelei.