O Fea e Mafai Ona Ou Maua Ai Tali?

Olga Ovcharenko, Sverdlovsk Oblast, Rusia

Ina ua 21 ou tausaga, sa aoaoina ai e faifeautalai mai Le Ekalesia a Iesu Keriso o le Au Paia o Aso e Gata Ai ni vasega o le gagana Peretania i le matou eria i Rusia. Sa ou auai muamua i ai mo ni lesona i le gagana, ae sa lei umi ae ou nofonofo teisi ai mo mafaufauga faaleagaga sa faasoa mai e alii faifeautalai ina ua mae’a le vasega ma fai atu ia i laua ni fesili.

Sa ou ola ae i le tapuaiga autu a le matou atunuu, ae sa tele ni a’u fesili faalelotu sa le’i taliina. Sa i ai i faifeautalai ma tagata o la latou Ekalesia ia tali i fesili sa leai se tagata i tausaga ua mavae na mafai ona tuuina mai e faamalieina ai au.

O le lagonaina faapitoa o le lototele ina ua uma se tasi o vasega Igilisi, sa ou fesili atu ai i faifeautalai mo se kopi o le la tusi, le Tusi a Mamona. Ae ina ua ou oo i le fale, sa ou tuuina i luga o se fata e aunoa ma se faitauina.

Peitai, sa lei umi o taatia ai iina. Sa ou faalogo i tagata o le Ekalesia na auai i le vasega Igilisi fai mai, e i ai i tusitusiga paia tali i faafitauli. O lea ina ua ou oo i ni luitau faaletagata lava ia po o faafitauli, sa ou aumaia le Tusi a Mamona mai le fata ma amata loa ona faitau. O taimi uma lava, na ou maua ai tali—o ituaiga tali na tauina mai mea tonu sa manaomia ona ou iloa.

O le taimi lena, sa amata ona ou lagonaina e le mafai ona ou ola e aunoa ma le Ekalesia. O le nofoaga lea sa ou fia i ai. O le nofoaga lea sa ou lagona e tatau ona ou i ai.

Ae, sa ou fia mautinoa lava e ala i le fesili atu i le Atua. Ae o le faafitauli, sa ou nofo i se falemautotogi laitiiti e tasi le potu sa ma nonofo ai ma le e ana le fale, o se olomatua matua, ma sa leai se nofoaga faapitoa mo a’u lava ou te tatalo ai. Ae i se tasi afiafi, sa ou me’i atu ai i le umukuka—e motuese teisi mai le fale atoa—ma ole atu i le Tama Faalelagi pe moni le Ekalesia. O le tali, sa ou lagonaina se lagona malosi, lea na ou iloa ai le mea na manaomia ona ou faia.

Sa ou papatiso i se taimi e le’i mamao, ma o lo’u taimi i le avea ai ma se tagata o le Ekalesia ua avea ma se taimi sili ona fiafia o lo’u olaga. O le mea sa i ai muamua sa i ai a’u fesili, ae o le taimi nei ua ou maua tali. O le mea sa i ai muamua sa ou lagonaina le gaogao, ae o lenei ua ou lagonaina le taumasuasua.

Ou te faafetai ona e le o tuuaunoaina i tatou e le Tama Faalelagi ia aunoa ma ni tali. Ua ou iloa o le a fetalai mai o Ia ia i tatou, e ala i le tatalo ma e ala mai i tusitusiga paia.