O Le Tusi a Mamona:
O Se Molimau faatasi ma le Tusi Paia
Ina ia ogatasi ma tulafono faatusipaia faapea “e mautu upu uma i le mau a le toalua po o le toatolu” (2 Korinito 13:1), o loo molimau uma mai le Tusi a Mamona ma le Tusi Paia e uiga ia Iesu Keriso ma aoao mai ia mataupu faavae o Lana talalelei. Na aoao mai e Elder Russell M. Nelson o le Korama a Aposetolo e Toasefululua e faapea “o molimau faatusipaia e faamaonia e le tasi le moni o le isi. O lenei manatu sa faamalamalamaina mai i aso ua leva ina ua tusia e se perofeta e faapea o le Tusi a Mamona sa ‘tusia ina ia outou talitonu [i le Tusi Paia]; tou te talitonu foi i [le Tusi a Mamona]’ [Mamona 7:9]. E faasino le tasi tusi i le isi tusi. O tusi taitasi e taufai avea ma molimau faapea o loo soifua le Atua ma o loo fetalai mai i Ana fanau e ala i faaaliga i Ana perofeta.”1
O loo i lalo se lisi o aoaoga faavae autu na aoaoina mai i le Tusi Paia lea e faaopoopo atu i ai e le Tusi a Mamona se molimau faaopoopo.
O Le Misiona a Iesu Keriso
O loo molimau le Tusi Paia ma le Tusi a Mamona ia Iesu Keriso, le Alo o le Atua, ma Lana Togiola. O loo aoao mai ai le tauaveina e le Faaola i Ona Lava luga o a tatou agasala ma le faatoilaloina o le oti.
O Le Alo e Toatasi na Fanaua e le Tama
Tusi Paia: “Aua na faapea lava ona alofa mai o le Atua i le lalolagi, na Ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16; tagai foi i le Mataio 16:16; Ioane 6:69).
Tusi a Mamona: “Ou te iloa e afio mai Iesu Keriso, ioe, o le Alo e Toatasi Ua Fanauina e le Tama, ua tumu i le alofa tunoa, ma le alofa, ma le upu moni” (Alema 5:48; tagai foi i le 1 Nifae 11:16–21; Mosaea 3:5–8).
Togiola mo a Tatou Agasala
Tusi Paia: “Aua o lo’u toto lenei, o le toto o le feagaiga fou, ua faamaligiina mo tagata e toatele e faamagalo ai agasala” (Mataio 26:28; tagai foi i le Eperu 9:28; 1 Peteru 3:18).
Tusi a Mamona: “Faauta, e avae o ia e ia lava e fai ma taulaga ona o agasala, e faaatoatoa ai iuga o le tulafono, ia te i latou uma o e o i ai le loto momomo ma le agaga salamo” (2 Nifae 2:7; tagai foi i le 1 Nifae 11:33; Alema 34:8–10; 3 Nifae 11:14).
Tauave o Tatou Faanoanoa
Tusi Paia: “E moni, ua na tauave o tatou tiga, ma na tauave o tatou faanoanoa” (Isaia 53:4; tagai foi i le Eperu 2:18).
Tusi a Mamona: “E maliu foi o ia, e onosai i mea tiga, ma puapuaga ma tofotofoga uiga eseese; … ina ia silafia e ia e tusa ma le tino le ala e tausi a’i lona nuu e tusa ma o latou vaivai” (Alema 7:11–12; tagai foi i le Mosaea 14:3–5).
Manumalo i le Oti
Tusi Paia: “A o lenei, ua toe faatuina mai Keriso i e ua oti, ua avea ma faapolopolo o e ua momoe” (1 Korinito 15:20; tagai foi i le Ioane 14:19; Galuega 26:23).
Tusi a Mamona: “Faatuatua ia Iesu Keriso, o ia o le Alo o le Atua, na fasiotia foi o ia e tagata Iutaia, ma ua toe tu mai o ia i le mana o le Tama, o lea ua ia manumalo ai i le tuugamau” (Mamona 7:5; tagai foi i le Mosaea 16:7–8; Helamana 14:17).
O Le Fuafuaga a le Atua mo i Tatou
E aoao mai e le Tusi Paia ma le Tusi a Mamona o le Atua o lo tatou Tama Faalelagi lea. Ma e pei, ona Ia saunia se “ala o le olataga” (Alema 24:14) lea e mafai ona faasaoina ai i tatou e ala i le Togiola a Iesu Keriso.
Tama Alofa o i le Lagi
Tusi Paia: “Aua o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Aua o lana fanau i tatou” (Galuega 17:28; tagai foi i le Salamo 82:6; Eperu 12:9).
Tusi a Mamona: “Ua ou iloa e alofa o ia [Atua] i ana fanau” (1 Nifae 11:17; tagai foi i le 1 Nifae 17:36).
Oti ma le Lalolagi o Agaga
Tusi Paia: “Ma toe foi atu le efuefu i le eleele e pei ona i ai ia, ma toe foi atu le agaga i le Atua o le na foaiina mai ai” (Failauga 12:7; tagai foi i le 1 Peteru 3:19–20; 4:6).
Tusi a Mamona: “O agaga o tagata uma, pe lelei i latou pe leaga, ua aveina atu i latou e nonofo i le maota o le Atua, o Le na foai mai le ola ia te i latou” (Alema 40:11; tagai foi i fuaiupu 12–14).
Toetu
Tusi Paia: “E ui lava foi ina faaumatia lenei tino pe a mavae atu lo’u pa’u, a e ou te iloa atu le Atua i lo’u tino” (Iopu 19:26; tagai foi i le Esekielu 37:12; 1 Korinito 6:14; 15:54).
Tusi a Mamona: “Ou te iloa ai ua iloa foi e outou e vaivai ma oti o tatou tino; a e ui lava i lea, tatou te iloa atu le Atua i o tatou tino” (2 Nifae 9:4; tagai foi i le 2 Nifae 9:12; Alema 11:43–45; 40:23).
E Tuuina mai e Poloaiga se Taiala
Ua aoao mai le Tusi Paia ua tuuina mai e le Atua ni poloaiga ma o le a faamanuiaina i tatou pe a tatou usiusitai. Sa faamaumauina foi ma mulimuli ia perofeta o le Tusi a Mamona i poloaiga.
Faamanuiaga o le Usiusitai
Tusi Paia: “Na poloai mai foi Ieova ia te i tatou ia faia nei tulafono uma lava, ia matatau ia Ieova lo tatou Atua, ina ia manuia ai tatou i aso uma, ina ia na faaolaina i tatou. … E avea foi ma amiotonu ia te i tatou, pe afai tatou te anaana ia faia ia poloaiga uma” (Teuteronome 6:24–25; tagai foi i le Faataoto 4:4; Ioane 14:21).
Tusi a Mamona: “Ua ia folafola mai foi ia te outou, afai tou te tausi i ana poloaiga, e manuia outou i le laueleele, ma ua le liliu lava o ia i mea ua ia fetalaia mai. O le mea lea, afai ua outou tausi i ana poloaiga, ua ia faamanuiaina ma faauluolaina ai outou” (Mosaea 2:22; tagai foi i le 2 Nifae 1:20).
O Tulafono e Sefulu
Tusi Paia: Ua faaalia mai e le Alii ia Poloaiga e Sefulu ia Mose (tagai i le Esoto 20:1–17).
Tusi a Mamona: Na aoao atu e Apinati ia Poloaiga e Sefulu i faitaulaga a le Tupu o Noa (tagai Mosaea 12:33–36; 13:12–24).
Sefuluai
Tusi Paia: “Ina aumaia mea e sefulu a’i a outou mea uma lava i le fale e tuu ai mea, ina ia i ai mea e ‘ai i lo’u fale” (Malaki 3:10; tagai foi i le Levitiko 27:30).
Tusi a Mamona: “O lea lava Mekisateko foi na avatu i ai e Aperaamo o mea e sefuluai mea; ioe, o lo tatou tama lava o Aperaamo na avatu mea e sefuluai mea, o lona sefulu lava o mea uma lava sa ia te ia” (Alema 13:15; tagai foi i le 3 Nifae 24:8–10).
Papatisoga ma le Agaga Paia
Tusi Paia: “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5; tagai foi i le Mareko 16:16; Galuega 2:36–38).
Tusi a Mamona: “Ina salamo ia outou tuluiga uma o le lalolagi ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i o’u luma i le aso gataaga” (3 Nifae 27:20; tagai foi i le 2 Nifae 9:23; 31:5–9).
O Le Ekalesia A Iesu Keriso I Ona Po Anamua
Na faavaeina e le Alii Lana Ekalesia i Ierusalema ma Amerika. O Le Tusi Paia ma le Tusi a Mamona o ni molimau ia o loo Ia faatulagaina ma taitaiina Lona nuu e ala atu i perofeta ma aposetolo.
Perofeta
Tusi Paia: “E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7; tagai foi i le Ieremia 1:7; 7:25).
Tusi a Mamona: “O le Agaga ua faaalia ai i le au perofeta mea uma” (1 Nifae 22:2; tagai foi i le Iakopo 4:4–6).
O Le Toasefululua
Tusi Paia: “Ona valaau atu lea o ia i ona soo, ua filifilia e ia ni o latou e toasefulu ma le toalua, ua faaigoa foi i latou e ia o aposetolo” (Luka 6:13; tagai foi i le Efeso 2:19–20; 4:11–14).
Tusi a Mamona: “Amuia outou pe afai tou te tausi i upu a lenei toasefulu ma le toalua, o e ua ou filifilia mai ia te outou e auauna atu ia te outou” (3 Nifae 12:1; tagai foi i le 1 Nifae 11:29).
Taitai Perisitua
Tusi Paia: “Ua le filifilia a’u e outou a ua filifilia outou e a’u; ua ou tuuina atu foi outou, ia outou o ma ia outou fua mai ni fua, ma ia tumau o outou fua” (Ioane 15:16; tagai foi i le Mataio 16:19; Luka 9:1–2; Eperu 5:4).
Tusi a Mamona: “ua ia [Alema] tofia faitaulaga ma toeaina i le faaee atu o ona lima, e tusa ma le tofiga paia mai le Atua, e pule ma leoleo i le ekalesia” (Alema 6:1; tagai foi i le 2 Nifae 6:2; Moronae 3).
Suesuega Faaopoopo
O lenei siata e le o se lisi ua atoatoa. I le avea ai ma se vaega o suesuega o tusitusiga paia faaletagata lava ia pe faaleaiga, e mafai ona e faaopoopoina ni mau faasino i lenei siata ma saili mo nisi mataupu faavae o loo aoaoina i le Tusi a Mamona ma le Tusi Paia e faaaoga ai le Taiala mo Autu po o le Taiala i Tusitusiga Paia ma punaoa suesue i luga o le initoneti i le scriptures.lds.org.
Ata o Harold B. Lee saunia e Doyle Shaw, faaaloaloga a le Falemataaga o Talafaasolopito a le Ekalesia