Savali a Faiaoga Asiasi
Afai Tatou Te Le Masalosalo
Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua • Aiga • Toomaga
Ua tatou faitau i le Tusi a Mamona e uiga i ni alii talavou maoae o e na matua totoa, lototetele, ma malolosi. “Ioe, o tagata faamaoni ma le faautauta i latou, aua ua aoaoina i latou e tausi i poloaiga a le Atua, ma savavali ma le amio sao i ona luma” (Alema 53:21). Na saafi nei alii talavou faatuatua i o latou tina—i a latou faataitaiga ma aoaoga.
Na soifua mai ia tina o le au tau a Helamana i ni taimi e le tutusa ma o tatou foi taimi. Sa faigata ma lamatia o latou tulaga, ma sa valaaulia ia talavou e puipuia le saolotoga faaletino ma le faaleagaga. Ua tatou ola i lenei vaitaimi i se lalolagi lea e “tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi” (Efeso 6:12).
Na valaau mai taimi faigata mo ni matua malolosi ma ni faataitaiga o e aoao atu le upu moni lea na iloa e le autau a Helamana: “Afai latou te le masalosalo, e laveaiina i latou e le Atua” (Alema 56:47). O le aoaoina atu ma le ola ai i lenei upu moni i le asō e manaomia ai le mataalia. Ae peitai, tatou te le manaomia le fefefe. Afai tatou te iloa pe o ai i tatou ma pe o ai le Atua ma ua uma ona tatou osifeagaiga ma Ia, o le a tatou—faapei ai o nei tina o le autau—ma o le a maoae se uunaiga mo le lelei.
E foliga mai, na uunaia taitasi le autau e 2,060 a Helamana e se tina. Ae e lei faatinoina toatasi na o nei tina. Atonu sa tutu faatasi nei tina ma nisi alii ma tamaitai amiotonu, ma tuufaatasi o latou faatuatua ma faataitaiga e aoao atu ai le mana o feagaiga. Na malamalama le autalavou o na taimi i le feagaiga na osia e o latou matua e lē toe tau lava. Ma na oo lava i le taimi ua foliga ai e le mafai, ae na tatalaina e se Tama Faalelagi alofa le ala ina ia tausia pea ai e nei matua a latou feagaiga—ma faasaoina lo latou saolotoga (tagai i le Alema 56:5–9). E tatau foi ona tatou faamamaluina faapena a tatou feagaiga ina ia mafai ai e fanau ma le autalavou—a tatou lava fanau ma tagata o a tatou uarota, paranesi, tuaoi, ma nuu—ona malamalama ma lagolagoina le tausiga o feagaiga.
Afai tatou te faamamaluina a tatou feagaiga, o le a saunia e le Tama Faalelagi le ala mo i tatou. E tatau ona tatou ola ma le sa’o atoatoa i a tatou feagaiga. Mo se faataitaiga, e mafai ona tuusa’o atu a tatou tatalo, suesueina o tusitusiga paia, umiaina o se pepa faataga o le malumalu, faia o laei talafeagai, ma faamamaluina le Sapati. A tatou faia faapea, o le a iloa ma faapea mai a tatou fanau, “Matou te le masalosalo lava na iloa e o matou tina” (Alema 56:48).
E le faavaivai i taimi faigata ma faavaivai loto ia tamaitai o le Au Paia o Aso e Gata Ai o e iloaina o lo latou malosi e sau mai le Togiola a le Alii. I le avea ma ni tagata tausi feagaiga, tatou te matua lelei lava i le tausia, faafaileleina, ma le puipuia o fanau ma le autalavou ma o le a i ai se aso tatou te faapea atu ai i lenei tupulaga faiae, “Ou te lei iloa i sa Nifae uma se loto tele e faapena ona tele” (Alema 56:45).
Julie B. Beck, peresitene aoao o le Aualofa.
Mai Tusitusiga Paia
Ata na saunia e Robert Casey