I Gagana ma Tagata Uma
Ina ua tuuina atu e Alema le perofeta o le Tusi a Mamona ia faamaumauga o lona nuu i lona atalii o Helamana, sa ia faatonuina lona atalii e manatua ua i ai i le Alii se “faautautaga poto” mo le faasaosaoina o tusitusiga paia (Alema 37:12). Fai mai a ia e uiga i faamaumauga, “E tausia ai ma tuufaasoloina mai i lea tupulaga ma lea tupulaga … seia oo atu ai i atunuu uma, ma ituaiga, ma gagana eseese, ma nuu” (Alema 37:4).
I le 1827 na maua ai e Iosefa Samita ia na faamaumauga, ma o le 1829 na uma ai ona ia faaliliuina i le gagana Peretania e ala i le meaalofa ma le mana o le Atua. O le tusi, sa lolomiina i le 1830, o se meafaigaluega mamana faafaifeautalai mo le faatalitonuina o le aufaitau i le moni o le talalelei a Iesu Keriso. Ae peitai, faatasi ai ma le uluai lomiaina o kopi e 5,000, o le auina atu o le Tusi a Mamona i “atunuu uma, ituaiga, gagana, ma nuu” e foliga mai e umi lava.
Ae, sa faamautu mai lava e le Alii lenei valoaga ia Iosefa Samita i le 1833, i le muai ta’uina mai “e oo ina faalogo [i lena aso] tagata taitoatasi i le faaatoatoaga o le tala lelei i lana lava tautala, ma lana lava gagana” (MFF 90:11). O le Tusi a Mamona, lea “e aofia ai … le atoatoa o le tala lelei a Iesu Keriso” (MFF 20:9), o loo faia se saofaga autu i le faataunuuina o lenei valoaga.
I le ogatotonu o le vaitaimi o le 1800, na aveina atu ai e faifeautalai le talalelei i Europa. Sa lolomiina le Tusi a Mamona i le gagana Tenimaka i le 1851, sosoo ai ma lomiga i le gagana Farani, Siamani, Italia, ma Uelese i le 1852. O le taimi nei, ua maua le Tusi a Mamona atoa i gagana e 82, faatasi ai ma ni mataupu filifilia i isi gagana e 25. O le valoaga o le a faalogo tagata uma i le talalelei i lana lava gagana, ua faataunuuina i lea tausaga ma lea tausaga a o agai i luma le galuega faaliliu ma le galuega faafaifeautalai.
O Le Galuega o le Faaliliuga
O le faagasologa o le faaliliuga o le Tusi a Mamona mai le gagana Peretania i se gagana fou, o nisi taimi e tele ni tausaga e faamaeaina ai. Sei iloga lava e faamaonia mai e le Au Peresitene Sili ma le Korama a Aposetolo e Toasefululua ona faatoa amata lea o le faagasologa o le galuega, ma o loo lava tagatanuu moni o ia gagana e avea o ni tagata faaliliu. E tuuina atu i tagata faaliliu ma tagata e iloiloina ni taiala patino ma faatonuina ia mafuta pea i le Agaga a o latou faia faaliliuga. A uma le faaliliuga, e auina atu ia anotusi mo se isi faagasologa e iloilo ai e taitai faale-Ekalesia.
A uma ona lolomi, e mafai e tagata ona oka le lomiga fou mai i Faletusi a le Ekalesia. O le toatele o nei tagata sa i ai na o ni mataupu filifilia o le Tusi a Mamona i la latou gagana po o le, i nisi o tulaga, e na o molimau lava a faifeautalai.
O Le Tusi a Mamona ma le Galuega Faafaifeautalai
A tatalaina se eria i le taimi muamua mo le galuega faafaifeautalai, o faafitauli o le gagana e mafai ona avea ma luitau tele. Faatasi ai ma le leai o ni tusi ua lolomiina a le Ekalesia i le gagana a lena eria, o lea e tatau ai i faifeautalai ona aoao le gagana ma molimau atu i le Agaga. I nisi itu o le lalolagi, e toatele tagata e tautatala i se gagana lona lua, ma e mafai e faifeautalai ona tuu atu ia i latou se Tusi a Mamona i lena gagana. Mo se faataitaiga, a o lei faaliliuina le Tusi a Mamona i le gagana Monokolia, e toatele tagata o le Ekalesia i Monokolia sa suesue i le lomiga faa-Rusia.
Ae peitai, e sili atu ona malamalama le talalelei i le iloa lelei ma le manino i le gagana moni a se tagata. O Eric Gemmel, o le sa auauna atu i le Misiona a Slovenia Ljubljana mai le 2001 i le 2003, sa ia iloaina lelei le eseesega e faia mo tagata o le ekalesia ma tagata sailiili i le i ai o le Tusi a Mamona i la latou lava gagana. Sa auauna atu o ia i le 18 masina muamua o lana misiona a o le’i maua le Tusi a Mamona i le gagana Solevenia.
Sa faigata le galuega. O le paranesi muamua a le Ekalesia sa na o le sefulu tausaga talu ona faatuina iina. Sa le’i leva foi ona tutoatasi Solevenia, ma sa i ai i le faagasologa o le faate’ate’a malie ese o le gagana sa faaaogaina muamua e le setete o Sepo-Kalaotia. Sa feaveai e faifeautalai ni kopi o le Tusi a Mamona i le gagana Sepo-Kalaotia ma le gagana Peretania, lea sa aoaoina e le toatele o tagata talavou i aoga. Peitai e tele atu taimi e tetee ai e tagata le tusi ona latou te le malamalama i ia gagana uma. E manatua e Eric le lagona o le leai o se aoga o le tuuina atu o le molimau i tagata e uiga i le maoae ma le taua o le Tusi a Mamona—ae toe fai atu ia i latou e le o ia te ia se kopi i le latou gagana.
O le ono masina a o lei foi atu Eric i le fale, na taunuu ai le uta muamua o kopi o le Tusi a Mamona i le faa-Solevenia. Sa faia e le paranesi se fonotaga lea na maua ai e tagata taitasi o le au paia se kopi. “Sa i ai se agaga faapitoa i lena taimi,” na manatua ai e Eric. Sa ia tusia i lana api talaaga le lagona sa i ai i le uuina o se tusi faapelepele ua loa ona faatalitali i ai. “Sa pei lava o le uuina o papatusi auro lava ia,” sa ia tusia ai. Ina ua uma le fonotaga, sa ave e faifeautalai ia tusi na totoe e faaaoga mo le galuega faafaifeautalai. Sa matuai fiafia Eric ma lana soa, ma ina ua taunuu atu i lo la falemautotogi, sa la talaia atigipusa, folafola ia tusi, ma pue ni ata e manatua ai lea mea na tupu. Sa le mafai ona faatali i laua e faasoa atu i tagata ia tusi. Faatasi ai ma le umiaina o le Tusi a Mamona faa-Solevenia, sa le gata ina manuia taumafaiga a faifeautalai i le faafesootaia o tagata, ae sa maua foi se auala e toe uunaia ai molimau a tagata lē toaaga o le ekalesia o e ua tele tausaga e le o toe o atu i le lotu.
I le ono masina mulimuli o lana misiona, sa vaaia ai e Eric le faatupulaia o molimau o le au paia Solevenia. Fai mai a ia, “o le taimi lava na maua ai le Tusi a Mamona i le latou gagana, sa latou malamalama lelei i ai. Sa magoto ifo i o latou loto.” O le taimi muamua, o failauga ma faiaoga i fonotaga a le Ekalesia, na tatau ona latou faitauina tusitusiga paia i le gagana Sepo-Kalaotia, ona tuu lea i se tagata e faaliliuina ma faamalamalama nisi upu. “Sa pei lava na matou setusetu i upu e nono mai i se isi gagana,” o le tala lea a Eric. Ina ua amata faitau e tagata o le au paia le Tusi a Mamona i la latou lava gagana, “o le taimi lava lena na faateleina ai lo latou malamalamaaga i le talalelei,” na fai mai ai Eric.
I La Latou Lava Gagana
O Mojca Sheleznikar o se tasi o na tagata na auai i le Ekalesia i Solevenia a o lei maua le Tusi a Mamona faa-Solevenia. Na maua lana molimau i le moni o le talalelei i lona faalogologo i faifeautalai ma suesue le Tusi a Mamona i le gagana Kalaotia ma le gagana Peretania. Ina ua uma le faaliliuga i le faa-Solevenia, sa faitau e Mojca tusiga na faaliliuina ma lagona ai le mana o upu i lana lava gagana. “Sa ou lagonaina le faalauteleina o le upumoni i o’u luma i le manino ma le faigofie ma le mama a’ia’i,” na ia toe tomanatu ai. “Na pei lava o le siufofoga o lo’u Foafoa o talanoa mai ia te au i la’u lava gagana, le gagana na tautala mai ai lo’u tina ia te a’u.”
E maua e tagata o le ekalesia i le lalolagi atoa ni lagona faapena pe a latou maua le Tusi a Mamona i a latou lava gagana. I le 2003, ina ua uma ona faaliliu le Tusi a Mamona i le gagana Kekchi, o se gagana e tautatala ai tagata Maya i Kuatemala ma Pelisi, sa iloilo ai e tagata faaliliu ma ni vaega o tagata o le ekalesia i le lotoifale le faaliliuga.Na toe taua e se tasi o tagata faaliliu, “Na matou faapotopoto maia se vaega o tagata paionia i le falelotu i Senahú e fai le faitauga, ma a o matou faamaeaina ia tusiga taitasi, na oo mai se filemu ma le migao i totonu o le potu. Sa atoa le malamalama, ma sa mamana tele le i ai o le Agaga iina. O se aafiaga paia.”
O se tasi sa i ai i lena fonotaga, o Elvira Tzí, ua faafetai mo le faaliliuga faa-Kekchi o le Tusi a Mamona, ona o faamanuiaga o le a aumaia i le tupulaga faiae. Fai mai a ia, o le faaliliuga o le a mafai ai e tagata talavou ifo o le ekalesia ona “maua se malamalama atoatoa i le afioga a le Alii ma ava ai ma migao i mea e finagalo i ai le Alii.”
Mo tagata o le Ekalesia, o le suesueina o le Tusi a Mamona i a latou lava gagana o se punavai o faamanuiaga e le mafaitaulia. Na saunoa mai le Au Peresitene Sili, a o “aoaoina ma aoao atu ma le agaga tatalo tagata o le ekalesia mai tusitusiga paia, o le a tuputupu ae a latou molimau, o le a faateleina lo latou malamalama, o le a faalauteleina lo latou alolofa i aiga ma isi, o le a faateleina foi lo latou mafai ona auauna atu i isi, ma o le a latou maua le malosi sili atu e tetee ai i faaosoosoga ma puipuia le upumoni ma le amiotonu.”1
Faamanuiaga Taua
O faamanuiaga sili e aumai e le Tusi a Mamona i olaga o i latou e suesue i ai, e taunuu ai i se naunautaiga malosi e faasoa atu le tusi i isi, ma saga faataunuuina ai le valoaga. O tausaga uma lava e tusa ma le fa miliona kopi o le Tusi a Mamona e tufatufaina atu i le lalolagi atoa i le silia i le 100 gagana, a o faasoa atu taitoatasi e tagata o le ekalesia ma faifeautalai a latou molimau ia Iesu Keriso. O le “faautautaga poto” na tautala i ai Alema i aso anamua, ua faaalia mai i le oo atu o le Tusi a Mamona i le lalolagi atoa ma i olaga taitasi e suia ai.
O le uluai lomiga o le Tusi a Mamona e 5,000 tusi na lolomiina ai.
A o agai i luma le galuega faaliliu, ua faapea ona maua e tagata o le ekalesia i le lalolagi atoa, e pei o Lea ma Flora Lotrič i Solevenia, le olioli i le uuina mo le taimi muamua o se kopi o le Tusi a Mamona i la latou lava gagana.
Ata na pueina e Eric Gemmell
A uma se faaliliuga, e talosagaina ia tagata o le Ekalesia e tautatala i le gagana latou te iloiloina le faaliliuga. Mai le agavale: Walter Barillas Soto, Mike Peck, Sulenny Ruby Cucul Sierra, John Bringhurst, ma Josefina Cucul Tiul o loo iloiloina le Tusi a Mamona i le gagana Kekchi i Cobán, Kuatemala.
Agavale pito i luga: ata na pueina e le Busath Photography; lalo: ata na pueina e Tod Harris