Afai E te Fia Iloaina Moni, O Le A E Iloaina

Saunia e Elder Walter F. González

O Le Au Peresitene o Fitugafulu

E faavavau ona ou faafetai mo le Tusi a Mamona. Ua suia ai lo’u olaga e faavavau, ma ou te iloa e mafai foi ona suia ai lou olaga.

Sa avea au ma se tagata o le Ekalesia i le 18 o ou tausaga. Sa i ai se sao taua o le Tusi a Mamona i lo’u liliu mai. O le taimi lena, sa ou sailiili ai mo ni manatu fou e mafai ona faamalamalama mai ai le lalolagi ua siomia ai au. Ou te manatua o’u polofesa i le kolisi i lo latou matuai faalelalolagi i a latou aoaoga. Sa amata ona ou lilifa atu i manatu le talitonu i le i ai o se Atua.

I se tasi aso na ou vaaia ai se tusi lanumoana vaivai na tuu e se ulugalii faamisiona i lo matou fale i le pe a ma le ono tausaga talu ai. O le Tusi a Mamona. Sa la tuuina faatasi ma le tusi se tamaitusi e uiga i le Perofeta o Iosefa Samita faapea ai ma ni aoaoga i le ala e tatalo ai i le Atua.

Sa amata ona ou faitauina le Tusi a Mamona. Sa na o ni nai fuaiupu na oo i ai la’u faitau, i le 1 Nifae, ae ua ese lava ou faalogona. Sa amata ona fai se finauga i le va o ou lagona ma lo’u malamalama. O lea na ou filifili ai e ole atu i le Atua i le tatalo.

O le taimi muamua lena o lou olaga na ou tootuli ai ma tatalo. O le aafiaga na sosoo ai na avea ma se tasi o aafiaga ua sili ona paia i lo’u olaga. Na faatumulia au i se lagona o le fiafia tele, na faapea ona ou iloa ai i lo’u loto o le Tusi a Mamona sa sili atu nai lo na o se tusi. O se tusi e paia lona afuaga. O le afioga lava lea a le Atua. Na ou malamalama mulimuli ane, o le lagona o le Agaga lea na molimau mai i lona moni.

E ui o nisi e i ai ni aafiaga talitutusa, ae e eseese auala e mafai ona iloa ai e se tasi e moni le Tusi a Mamona.

O Le A Faapefea Ona E Iloa?

1. O nisi o le a iloa e ala i le faalogo. Atonu o oe o le a pei o isi e iloa i le faalogo i mea ua aoao mai i le tusi. O loo tau mai i le Tusi a Mamona i le faitau afe o i latou na faalogo o aoao atu e atalii o Mosaea le talalelei a Iesu Keriso ma “na liliu mai ai i le Alii” (tagai i le Alema 23:5–6). O loo aoao atu e faifeautalai i aso nei lena lava talalelei o loo maua i le Tusi a Mamona. O nisi o le a iloa o le Tusi a Mamona o le afioga a le Atua, i le faalogo atu i isi o faasoa mai ona aoaoga.

2. O nisi o le a iloa e ala i le faitau. Atonu o oe o le a pei o i latou o le a iloa i le faitauina o le Tusi a Mamona ma se naunautaiga moni ia iloa le mea moni. Na faapena le mea na oo i lo’u toalua. O le 12 o ona tausaga na ia teufatuina ai le aoaoga e faitau le tusi mai le tasi faavaa e oo i le isi. A o ia faia lenei mea, sa ia iloaina le moni. Sa matuai malosi le lagona, a o ia faitau, sa filifili o ia e mulimuli i le Faaola e faavavau. Sa tumau faamaoni o ia i le mea sa ia lagonaina.

3. O nisi o le a iloa e ala i le faia. Atonu o oe o le a pei o i latou o le a iloa e ala i le faia o mea o loo aoao mai i le tusi. O nisi tagata e maua a latou molimau e ala i le faia (tagai i le Ioane 7:17). Na malamalama lelei Nifae, o se perofeta i le Tusi a Mamona, i lenei mataupu faavae. Sa ia tusia, ina ia mafai ona “faaoleole atili ia te i latou ia talitonu i le Alii, lo latou Togiola … Na ou faatatau tusi paia uma ia te i matou, ina ia aoga e aoaoina ai i matou” (1 Nifae 19:23; faaopoopo le faamamafa). O le faatatau, po o le faaaoga, o aoaoga o le Tusi a Mamona i lou lava olaga, o le a faaoleole ai foi oe i lona afuaga paia.

4. O nisi o le a iloa e ala i le ole atu i le Atua. Atonu o oe o le a pei o i latou o le a iloa e ala i le faitau mai le Tusi a Mamona ona ole atu lea i le Tama Faalelagi i le tatalo pe moni le tusi. O le mea lenei sa ou oo i ai. O le folafolaga musuia na tuuina mai e se isi perofeta o le Tusi a Mamona, o Moronae, i tagata faamaoni uma o loo sailia le upu moni: “Faauta, ou te apoapoai atu ia te outou, pe a outou faitau nei mea … ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:3–4). Ou te molimau atu afai e te faitau ma tatalo e uiga i le Tusi a Mamona, ma mulimuli i faatonuga a Moronae, o le a e iloa lona moni.

Na Folafola Mai le Atua O Le A E Iloa

Afai e te fia iloa moni lava, o le a e iloa e moni le Tusi a Mamona. Ua folafola mai e le Atua e tuuina mai lenei malamalama i e saili ma le faamaoni, ma o Ia “o le Atua o le faamaoni, ma ua le mafai ona pepelo” (Eteru 3:12).

Na aoao atu e se isi perofeta o le Tusi a Mamona, o Alema, ia lona atalii e faapea, na folafola mai e le Atua o le a Ia “taofia [lenei tusi] ona o le faautautaga poto ia te ia, ina ia faaali atu ai e ia lona mana i tupulaga amuli. O lenei foi, faauta, ua faataunuuina e ia le faautautaga e tasi, o le toe faatuina lea o afe e tele … i le malamalama o le upu moni; ua ia faaalia mai ai foi lona mana. Na te faaali atu pea lona mana i tupulaga amuli; o le mea lea e faasaoina ai [lenei tusi]” (Alema 37:18–19).

O lena lava mana faatalitonuina o loo maua i aso nei i lenei lomiga maoae o tusitusiga paia, ma o le a faaali mai e le Alii i soo se tasi e saili faamaoni ia iloa. E mafai ona ou fai atu ma le mautinoa lenei faamatalaga a o ou toe tepa i na aso a o ou sailiili i le Ekalesia. O le aso, ona o le mana faatalitonuina o le Tusi a Mamona, ou te molimau atu ai o le Tusi a Mamona o le afioga lea a le Atua, o loo aoao mai o Iesu o le Keriso, le Mesia Paia. O le tusi o se faamaoniga vaaia ua tupu le Toefuataiga o Lana talalelei ma o Iosefa Samita o se perofeta a le Atua.

Afai o oe o se tasi o i latou o loo saili ma le faamaoni mo le upu moni, ua folafola mai le Alii o le a e iloa. O le a e iloa e ala i le faalogo i aoaoga a le tusi, i le faitauina o le tusi, i le faia o mea o loo aoao mai i le tusi, i le tatalo ia iloa ai lona moni, pe e ala i se tuufaatasiga o nei mea. Ae o le a e iloa lava.

Ua Molimau Mai Se Perofeta

“O le Tusi a Mamona o le afioga a le Atua. Matou te valaaulia outou e faitau i lenei tusi matagofie. O se tusi aupito mataina ua i ai i le lalolagi i aso nei. Faitau i ai ma le totoa ma le agaga tatalo, ma a o e faia, o le a tuuina atu e le Atua ia te oe se molimau i lona moni e pei ona folafolaina mai e Moronae (tagai i le Moronae 10:4).”

Peresitene Howard W. Hunter (1907–95), The Teachings of Howard W. Hunter, ed. Clyde J. Williams (1997), 54.

Ua Molimau Mai Se Perofeta

“O a’u o se tasi na maua mai i le Alii se faaaliga mamana e uiga i le moni [o le Toefuataiga, e aofia ai le Tusi a Mamona]. O lena faaaliga sa tumau malosi lava ia te au mo le tele ma le tele o itula; ma po o a lava ni tulaga e oo i lo’u olaga, i le umi e mafai ona oo i ai le lelei o lo’u mafaufau, o le a tumau lava ia te a’u lenei malamalama atoatoa.

Peresitene Lorenzo Snow (1814–1901), i le Conference Report, Oct. 1900, 61.

Folafolaga a Moronae

I le faaiuga o le Tusi a Mamona, o loo folafola mai ai e se perofeta e igoa ia Moronae, afai o le a tatou faitau i le Tusi a Mamona, mafaufau loloto i o tatou loto e uiga i lana savali, ma ole atu i le Atua i le tatalo pe moni, o le a tali mai le Atua ia i tatou e ala i le mana o le Agaga Paia (tagai i le Moronae 10:3–5).

O faaaliga faaletagata lava ia e patino. E oo mai i ni auala eseese ma i taimi eseese ia i tatou taitoatasi e tusa ai ma le finagalo o le Alii. O le malamalama i mataupu faavae o loo i lalo e mafai ona fesoasoani ia te oe e iloa ai mo oe lava.

1. Mafaufau i Ai

A o lei valaauliaina i tatou e tatalo, o loo valaaulia i tatou e Moronae e mafaufau loloto. O le mafaufau loloto, o lona uiga o le manatunatu loloto. Fesili ifo ia te oe lava: O a ni o’u lagona pe a ou faitau i le Tusi a Mamona? Aisea ou te maua ai na lagona? O le a se mea ua ou aoaoina? O se mea lelei?

Sa aoao mai e le Alii lenei mataupu faavae ia Oliva Kaotui: “Fa te oe ou te tuuina atu ia te oe, i le na o lou ole mai a e te lei mafaufau i ai. A e peitai, faauta, ou te fai atu ia te oe, e ao ina e filifili maea ai i lou mafaufau; ona e ole mai lea ia te au po ua sao” (MFF 9:7–8; faaopoopo le faamamafa).

2. Tatalo Faatauanau

O le taulai atu o o tatou manatu ma le mafaufau loloto i tali filemu a le Agaga Paia e manaomia ai se taumafaiga faalemafaufau. Atonu o se tasi lena o itu na talanoa mai ai Enosa i le Tusi a Mamona e uiga i lana tatalo o se “fagatuaga … i luma o le Atua” (Enosa 1:2).

Pe a faitau, mafaufau loloto, pe tatalo, ia sue se taimi ma se nofoaga paganoa pe a fai e mafai. Sue se nofoaga e fesoasoani e te mafaufau loloto ai. O le tatalo ma le leo e mafai ona fesoasoani e taulai tonu ai ou manatu.

3. Fai Fesili Talafeagai

Na ta’u atu e le Alii ia Oliva Kaotui e aua le na o le ole atu, ae ia ole atu pe o sa’o le mataupu sa mafaufau i ai. E masani lava, ae maise pe a tatou le masani i le mauaina o tali mai lo tatou Tama Faalelagi, e faigofie atu ona malamalama i le tali ioe po o le leai o se fesili faigofie.

Na aoao mai Elder Richard G. Scott o le Korama a Aposetolo e Toasefululua, “O se ki e faaleleia ai le tatalo o le aoao lea e tuuina atu ia fesili sa’o.”¹

4. O Le A Se Mea o E Manatu Tonu i Ai?

O se tasi o ki i le folafolaga a Moronae, o le tatou ole atu lea ma le “manatu tonu i ai.” Ina ua alu atu le alii e 14 tausaga o Iosefa Samita i le togavao e tatalo ai, “na ia tatalo ma le faamoemoe e le gata ia faalogo ae ia usiusitai,” o le saunoaga lea a Peresitene Henry B. Eyring, Fesoasoani Muamua i le Au Peresitene Sili. “… Ma talu ai ona o lona faamaoni, o aso ma masina ma tausaga na lumanai ai na taliina mai ai ana talosaga i le anoanoai o le malamalama ma le upumoni.”²

5. Aua Nei Misia

E le o faaaliga uma e ofoofogia. O nisi tagata e maua miti, faaaliga, po o faaaliga vaaia. Ae o le toatele o i tatou o le a maua se aafiaga e filemu ma maaleale, e pei o se lagona mafanafana, toafilemu.

Na aoao mai Peresitene Spencer W. Kimball (1895–1985), le Peresitene lona 12 o le Ekalesia, “O le faamoemoe mo ni [faaaliga] ofoofogia, atonu o le a atoatoa ai le mataalia o se tagata i le tafe mai i taimi uma o fesootaiga faaalia.”³

Faamatalaga

1. Richard G. Scott, “Faaaogaina o le Meaalofa Faalelagi o le Tatalo,” Liahona, Me 2007, 8.

2. Henry B. Eyring, “Tatalo,” Liahona, Ian. 2002, 18.

3. Aoaoga a Peresitene o le Ekalesia: Spencer W. Kimball, (2006), 267.

O Le Auala Na Ou Iloa Ai

E ui ina sa ou papatiso i le iva o o’u tausaga, ae sa le malolosi tele lo’u aiga i le Ekalesia. Ae ina ua 13 ou tausaga, sa valaaulia a’u e faifeautalai ou te alu i le lotu, ma sa ou alu. Sa ou auai foi i le seminare. O le kosi aoaoina o le Mataupu Faavae ma Feagaiga, lea sa foliga fenumia’i ia te au. Sa sili ona faigata ia te au le mataupu ia Iosefa Samita ma le Tusi a Mamona. Sa ou fia maua le Atua, ae sa ou le mautinoa pe faapefea ae po o fea foi.

I le aluga o taimi, sa ou mafaufau soo ai i a matou talanoaga ma faifeautalai. Sa ou mafaufau i le seminare. Sa ou mafaufau i a matou talanoaga ma tagata o isi tapuaiga Kerisiano. Sa i ai taimi na ou tatalo ai ia ou iloa le mea moni, ae sa pei lava ua na o se manatu faapasi ae le o se fesili faamaoni. O se tasi la po, na ou filifili ai loa e tatalo ma le “manatu tonu i ai.”

Sa ou ta’u atu i le Tama Faalelagi sa ou fia iloa o Ia ma ia avea ma se vaega o Lana Ekalesia moni. Sa ou folafola atu: “Afai o le a ta’u mai e Lau Afio ia te au pe o Iosefa Samita o se perofeta moni ma pe moni le Tusi a Mamona, o le a ou faia soo se mea e finagalo Lau Afio ou te faia. Afai o Le Ekalesia a Iesu Keriso o le Au Paia o Aso e Gata Ai o le Ekalesia moni lea, o le a ou mulimuli i ai ma o le a lē faafitia lava.”

Ou te lei maua se faaaliga tulaga ese, ae sa ou lagonaina le filemu ma sa ou moe loa. O ni nai itula mulimuli ane, sa ou ala ae ai ma se manatu manino lelei: “O Iosefa Samita o se perofeta moni, ma e moni le Tusi a Mamona.” Sa o mai faatasi lea manatu ma se filemu e le mafaamatalaina. Sa ou toe moe, ae na ou toe ala ae mulimuli ane ma lena lava manatu ma le faalogoga lava e tasi.

Talu mai lena taimi, ou te le’i toe masalosalo lava o Iosefa Samita o se perofeta moni. Ou te iloa o le galuega lenei a le Faaola ma o le a tali mai le Tama Faalelagi ia tatou olega faamaoni.

Rodolfo Armando Pérez Bonilla, El Salvador