Sa Ou Lagonaina se Afi i Totonu

Claudia Williams, Florida, ISA

Sa ou ola ae ma auai i le Aoga Sa i se lotu na tuaoi ma le matou fale na ou tuputupu ae ai i Michigan, ISA. Sa i ai sou faiaoga lelei o le na faatumulia au i se alofa mo Iesu Keriso.

O vaiaso taitasi na te tufaina mai ai ni kata e faaalia ai ni mea na tutupu i le galuega a le Faaola i le olaga nei, e aofia ai ni mataupu faavae sa Ia aoaoina ma vavega sa Ia faatinoina. O vaiaso taitasi sa ou faapipiiina ai ia kata i totonu o se tusiata ma toe faitau tala o le Tusi Paia. A o faasolo ina ou matua, sa faaauau ona ou aoao i Tusi o le Feagaiga Fou.

O tausaga mulimuli ane, i le taumafanafana o le 1968, na asiasi ane ai ni faifeautalai mai le Ekalesia a Iesu Keriso o le Au Paia o Aso e Gata Ai i le fale o se tagata o lou aiga. Sa ia teena le valaaulia a alii faifeautalai e aoao e uiga i le Ekalesia ae nofo ma faasino mai i lo’u fale.

I le matou feiloaiga muamua, na aoaoina ai au e faifeautalai e faapea na i ai “se liliuese tele” mai le Ekalesia lea na faatuina e Iesu Keriso (tagai i le 2 Tesalonia 2:3). O le mea sa la aoaoina mai sa ogatasi foi ma a’u suesuega patino, o lea ina ua la fesili mai pe mafai ona la toe asiasi mai, sa ou ioe i ai.

I le la asiasiga na sosoo ai, sa i ai sau lisi o fesili. Pe e papatisoina le Au Paia o Aso e Gata Ai e ala i le faatofu? Pe latou te talitonu i le pule o le perisitua? Pe latou te talitonu i le faamaloloina o e mamai? O a laua tali na lagolagoina ai mea na ou suesueina i le Feagaiga Fou. I le faaiuga o le asiasiga, sa la tuua ai se tusi sa la fai mai e molimau ia Iesu Keriso.

Sa ou tuuina le tusi i luga o le televise ae ou alu ou moe. Ae i le tulua o le po, sa fafaguina au e se lagona malosi lea sa ou iloaina mulimuli ane, o le Agaga Paia. Sa ou lagonaina le uunaiga e amata ona ou faitau, o lea sa ou faitau ai mo le itula ma le afa, ona ou toe moe ai lea. O se taimi puupuu mulimuli ane, sa ou toe ala ai foi ma lea lava lagona e tasi, o lea sa ou toe faitau atili ai.

Sa faaauau ai lava lea faiga i po e lua na sosoo ai. Sa ou fiafia i mea sa ou faitauina ma iloa ai o loo molimau mai le Tusi a Mamona ia Iesu Keriso.

Sa ou filifili loa e ole atu i le Atua mo se taitaiga. Mo le taimi muamua talu mai lou laitiiti, na ou tootuli ai e tatalo. Sa ou ole atu i le Tama Faalelagi e fesoasoani mai ia ou iloa le mea e fai i le afi na ou lagonaina i totonu o lo’u loto. Ina ua uma la’u tatalo, sa ou lagonaina le musuia o au e toe faitau le tala i le liliu mai o Sa Lamana o loo i le 3 Nifae 9. Sa ou faitau ai sa “papatisoina i latou i le afi ma le Agaga Paia, a ua latou le iloa ai” (fuaiupu e 20).

O le fuaitau “a ua latou le iloa ai” sa tautala mai ia te au. Sa oo mai le manatu ia te au: “Ua i ai le Ekalesia a Iesu Keriso o le Au Paia o Aso e Gata Ai i luga o le fogaeleele!” Sa ou naunau e talanoa i faifeautalai e uiga i mea na ou faitauina ma mea ua ou iloaina nei. Ae ina ua la tali mai i au fesili faatasi ma se valaaulia e papatiso, sa ou fai atu i ai e le mafai. O le a le malamalama lo’u toalua.

Ae peitai, a o faaauau ona ou mafaufau i lena fuaiupu, sa ou iloa ai na i ai se faatonuga manino mo au ia tuuina atu se taulaga o “se loto momomo ma se agaga salamo.” Sa ou tatalo ma ole atu i lo’u Tama oi le Lagi e fesoasoani mai ia te au, o lea sa Ia faia lava. Ina ua uma ona fai lesona a lou toalua, sa tuuina mai loa lana maliega ou te papatiso.

Ou te matuai faafetai i se Tama Faalelagi alofa mo lena aafiaga faapelepele ma le mamana sa ou mauaina i le avea ai ma se tina talavou i le faitauina o le Tusi a Mamona. Ua taitaiina atu ai au i le talalelei toefuataiina a Iesu Keriso. O se taunuuga, o uunaiga a le Agaga Paia lea sa ou lagonaina i na po i le 1968 ua avea nei ma se meaalofa tumau—o se mea ua taialaina ai au i le silia ma le 40 tausaga o se tagata o le Ekalesia.