O Se Galuega Paia
Sa fiafia o ia i mea uma sa ma aoaoina atu. Ae aisea na le tago ai o ia i le Tusi a Mamona ina ua ou tuuina atu i ai?
I se tasi afiafi sa ma tuitui ai ma la’u soa faifeautalai le faitotoa o se alii talavou o se tagata aoga mai se atunuu i fafo, na aoga i se tasi o iunivesite o le anoano o iunivesite a Lonetona. Sa ia valaaulia i maua i totonu, ma sa ma faamalamalama atu o i maua o faifeautalai o Le Ekalesia a Iesu Keriso o le Au Paia o Aso e Gata Ai. Sa foliga mai sa naunau o ia e fia iloa atili e uiga i le Toefuataiga o le talalelei, o lea sa ma molimau atu ai e uiga i le Perofeta o Iosefa Samita, ma ta’u atu ia te ia e uiga i se tusi paia mai lo tatou Tama Faalelagi e ta’u o le Tusi a Mamona. Sa ma faamamafaina atu e paia ona o loo molimau mai e uiga ia Iesu Keriso.
Sa ma faamalamalama atu, e mafai ona ia iloa mo ia lava lona moni ma ofo atu ia te ia se kopi. A o ou tuuina atu le Tusi a Mamona ia te ia, sa tulai o ia ma aluese mai le potu e aunoa ma se upu. Sa ou uuina pea le Tusi a Mamona mo sina taimi, a o ma tau fai tilotilo ma la’u soa o le tasi i le isi ma se filemu le mautonu, ma taumafaufau pe o le a se mea a fai. Sa ou faataatiaina le tusi i luga o le laulau.
Sa mafai ona ou iloa atu le ma uo talavou i le umukuka o fufulu ona lima ona solo lea i se solo fafano mama. Sa toe sau o ia i totonu o le potu ma uu mai le Tusi a Mamona mai le laulau ma fai mai, “O o matou tagata e fufulu o latou lima i taimi uma a o le’i fetagofi atu i se mea paia.” Sa maligi o’u loimata a o ou vaai atu i lenei alii talavou o susue le Tusi a Mamona mo le taimi muamua ma suesue ona itulau paia i ona lima mama.
Na aoao mai Alema, o tusitusiga paia e paia ma e faasaosaoina mo le aumaia o agaga i le faaolataga. Sa ia folafola atu i lona atalii o Helamana, “Ua tuuina mai nei mea ia te oe e le Atua, ma ua paia. Ua ia tausia ai foi ma faasaoina ona o le faautautaga poto ua ia te ia, ina ia faaali atu ai lona mana i tupulaga atali” (Alema 37:14).
Sa auina atu au i se misiona e aoao atu le talalelei toefuataiina a Iesu Keriso, peitai, o a’u le tagata na aoaoina e lenei alii talavou ma ona lima mama. O le tele o aganuu—e aofia ai la’u lava aganuu—e le tau fufuluina muamua o matou lima ona faatoa faitau ai lea o tusitusiga paia, ae o lana gaoioiga faatauvaa o le faaaloalo o se faamanatu migao ma le mamana lea o le paia o le Tusi a Mamona.
Ata na tusia e Simon Jones