Juon Jerbal Ekwojarjar
Eaar itok limoin n̄an aolepen men ko kōm kar katakini. Innām etke eaar jab maron̄ bōke Bok in Mormon ke Iaar leļo̧k n̄ane?
Juon joten mijinede eo m̧ōtta im N̄a kar kōļaļļaļ ilo kōjām eo an juon likao eo ej rijikuuļ eo eaar katak ilo juon iaan univeristy ko reļļap ilo London. Eaar karuwaineneik kōmro, im kōm ar ba n̄ane bwe kōm kōm̧ij mijinede ro an Kabun̄ eo an Jisōs Kraist im Armej ro Rekwojarjar ilo Raan kein Āliktata. Eaar āinwōt kijoroor n̄an katak eļapļo̧k kōn Jepļaaktok eo an Ko̧jpeļ eo, kōn menin kōm kar kam̧ool kōn Rikanaan Joseph Smith im kar jiron̄ e kōn juon bok kwojarjar jān Jemedwōj Ilan̄ kar ņa etan Bok in Mormon. Kōm̧ kar kalikkare bwe eaar kwojarjar kōnke ej kam̧ool kōn Jisōs Kraist.
Kōm ar kōmeļeļeik bwe emaron̄ jeļā kōn e make kōn m̧ool eo an im kar leļo̧k n̄an e juon kape. Ke Iaar leļo̧k Bok in Mormon eo n̄an e, eaar jutak jān jea eo an im ilo̧k jān ruum̧ eo ilo an ba juon naan. Iaar jibwe Bok in Mormon eo ilo peiū ium̧win jidik iien, im eo m̧ōtta im N̄a kar kalijmōk doon ilo am ikōn̄, ļōmņak ta eo n̄an kōm̧m̧ane. Iaar door bok eo ioon tebōļ eo.
Kōm kar lo eo m̧ōttam ilo jikin kōmat m̧ōn̄ā eo kwaļ pein im kōm̧ōrāiki ilo juon to̧o̧l erreo. Eaar jepļaaktok n̄an ruum̧ eo im kar bōk Bok in Mormon eo jān ioon tebōļ eo im kar ba, “Armej ro aō iien otemjej rej kwaļ peier m̧okta jān aer jibwe juon men ekwojarjar.” Dān in kemejaaļaļ eaar itok n̄an meja ke Iaar lale an likao in kōpeļļo̧k Bok in Mormon eo kein kajuon im elōkļo̧k alen ko rekwojarjar kōn pā ko pein rerreo.
Alma eaar katakin bwe jeje ko rekwojarjar rej kwojarjar im rej kejparoki n̄an bōktok jetōb ko n̄an lo̧mo̧o̧r. Eaar kwaļo̧k n̄an ļaddik eo nejin Helamōņ, “Anij eaar leke eok kōn men kein, ko re kwojarjar, im barāinwōt ko Enaaj kōjparok im oņaki n̄an juon un emeletlet ilo E, bwe en maron̄ kwaļo̧k tok An kajoor n̄an epepen ko tokālik” (Alma 37:14).
Kar jilkinļo̧k eō n̄an juon mijen n̄an katakin kōn jepļaaktok eo an ko̧jpeļ an Jisōs Kraist, men̄e kar n̄a wōt eo kar katakin eō jān likao in kōn an erreo pein. Ilo elōn̄ m̧anit ko—ekoba eo aō make—ejjab aorōk n̄an kwaļ peid m̧okta jān riiti jeje ko rekwojarjar, bōtaab kōn m̧akūtkūt in ad elem waan kōn jeļā ņae eaar juon kautiej im juon kakememej ekajoor kōn kwojarjar eo an Bok in Mormon.
Pija jān Simon Jones