N̄e Kolukkuun Kōņaan n̄an Jeļā, Kwonaaj Jeļā

Jen Eļtōr Walter F. González

Jen Būreejtōnji eo an Jimjuonn̄oul eo

Ij en̄jake juon kam̧oolol indeeo kōn Bok in Mormon. Eaar ukōt mour e aō n̄an indeeo, im Ijeļā emaron̄ ukōt eo ami.

Ekar 18 iiō detta ke Iaar erom juon membōr an Kabun̄in. Bok in Mormon eo eaar kōm̧m̧ane juon jerbal eo eaorōk ilo oktak eo aō. Ilo tōre eo, Iaar pukōt ļōmņak ko rekāāl me remaron̄ kar kōmeļeļeik laļin n̄an n̄a. Ij kememej an rūkaki ro aō ilo kaļōōj kowaan katak ko aer. Iaar jino ļōmņak kōn ļōmņak in pere kōn an Anij mour.

Juon raan Iaar kileļo̧k juon bok kōlar būļu me jet mijinede rekar likūt ilo m̧weo im̧ōm̧ enan̄in jiljiljino iiō m̧okta ļo̧k. Ekar Bok in Mormon. Ippān bok eo, rekar likūt juon bok jidikdik kōn Rikanaan Joseph Smith im barāinwōt jet kōmeļeļe ko kōn ekōjkan jar n̄an Anij.

Iaar jino riiti Bok in Mormon. Iaar riiti wōt jen eoon ko ilo bok eo, ilo 1 Nipai, ke Iar en̄jake juon men eoktak. Iaar jino kōbauwe eo ikōtaan en̄jake ko aō im meletlet eo aō. Kōn menin Iaar jokālōt n̄an kajjitōk ippān Anij ilo jar.

Eaar kein kajuon ilo mour eo aō me Iaar bukwelōlō im jar. En̄jake eo eaar waļo̧k eaar erom juon iaan men eo ekwojarjar ilo mour eo aō. Juon en̄jake in m̧ōņōņō eo elutōk leplep eaar kobrak eō jon̄an Iaar jeļā ilo būruwō bwe Bok in Mormon eaar ļapļo̧k jān juon bok. Ekar juon bok kōn kwojarjar in ijo ej itok jān e. Eaar aikuj in kar naan an Anij. Ikar tokālik meļeļe bwe en̄jake eo eaar Jetōb ej kam̧ool kōn tallep in m̧ool eo an.

Ilo an jet maron̄ bōk ejja en̄jake kein, ewōr wāween ko juon emaron̄ itok n̄an jeļā bwe Bok in Mormon ej em̧ool.

Ekōjkan Am Naaj Jeļā?

1. Jet renaaj jeļā jān ron̄. Komaron̄ ilubwilijin ro me renaaj jeļā jān wōt ron̄jake ta eo bok in ej katakin. Bok in Mormon ej kōnono kōn taujin ro me raar ron̄jake ļaddik ro nejin Mosaia aer katakin kōn ko̧jpeļ eo an Jisōs Kraist im “kar oktak tok n̄an Irooj” (laleAlma 23:5–6). Mijinede ro rainin rej katakin ejja ko̧jpeļ eo wōt lo ilo Bok in Mormon. Jet renaaj jeļā bwe Bok in Mormon ej naan an Anij jān ron̄jake an ro jet kwaļo̧k kōn katak ko an.

2. Jet renaaj jeļā jān riiti. Komaron̄ ilubwilijin ro renaaj jeļā jān wōt riiti Bok in Mormon kōn juon ikirelel em̧ool n̄an jeļā m̧ool eo. Ejja āinwōt jekjek eo ippān lio pāleō. Eaar 12 iiō dettan ke eaar bōk ilo tum̧wilaļ in būruwōn kōmeļeļe eo n̄an riiti bok eo jān jinoin n̄an jem̧ļokin. Ilo an kar kōm̧m̧ane menin, eaar jeļā bwe em̧ool. En̄jake eo eaar kanooj kajoor, ilo an riit, eaar kālet n̄an ļoor Rilo̧mo̧o̧r eo n̄an indeeo. Eļakkar m̧ool wōt n̄an ta eo eaar en̄jake.

3. Jet renaaj jeļā jān kōm̧m̧ane. Komaron̄ ilubwilijin ro renaaj jeļā jān wōt kōm̧m̧ane men ko bok in ej katakin kake. Jet armej raar bōk aer naan in kam̧ool jān kōm̧m̧ane (lale Jon 7:17). Nipai, juon rikanaan ilo Bok in Mormon, kar jejjet an meļeļe kōn pedped in. Eaar jeje bwe n̄an bōk “maron̄ļo̧k kareel er n̄an tōmak ilo Irooj aer Ri Pinmuur … bwe iaar karōki tok jeje ko n̄an kōm, bwe en n̄an am maron̄ jerammōn im jeļā” (1 Nipai 19:23; kwaļo̧k kobaiktok). Jān kōņaan; ak kōjerbali, katak ko an Bok in Mormon ilo mour eo am make, komaron̄ barāinwōt kareel kōn kwojarjar in ia eo ej itok jān e.

4. Jet renaaj jeļā kōn kajjitōk ippān Anij. Komaron̄ ilubwijlin ro renaaj jeļā kōn riiti Bok in Mormon innām kajjitōk ippān Jemed Ilan̄ ilo jar eļan̄n̄e bok in ej m̧ool. En̄in ej ta eo Iaar en̄jake. Ej juon kalim̧m̧ur ekōbōkakak kar letok jān bar juon rikanaan in Bok in Mormon, Moronai, n̄an aolep ro em̧ool aer pukōt m̧ool eo: “Lo, ikōņaan kōketak kom̧ bwe kom̧in kajjitōk ippān Anij Jemān Indeeo, ilo etan Jisōs Kraist, eļan̄n̄e men kein rejjab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an ko̧m, jān kajoor eo an Jetōb Kwojarjar” (Moronai 10:3–4). Ij kwaļo̧k kam̧ool bwe eļan̄n̄e kwoj riiti im jar kōn Bok in Mormon, loor tōl ko an Moronai, kwonaaj jeļā bwe ej m̧ool.

Anij Eaar Kalim̧m̧ur Kwonaaj Jeļā

Eļan̄n̄e kwoj lukkuun kōņaan n̄an jeļā, kwonaaj jeļā bwe Bok in Mormon ej em̧ool. Anij eaar kallim̧ur n̄an leļo̧k jeļā in n̄an rikapukōt m̧ool ro, im E ej “juon Anij in m̧ool, im jab maron̄ riab” Ether 3:12).

Bar juon rikanaan an Bok in Mormon, Alma, eaar katakin ļaddik eo nejin bwe Anij eaar kallim̧ur bwe “Enaaj kar oņaake me kein n̄an juon un emeletlet ilo E, bwe E en maron̄ kwaļo̧k kajoor eo An n̄an epepen ko tokālik. Im kiiō lo, juon un Eaar kakūrm̧ool e, em̧ool n̄an kōjepļaaktok elōn̄ taujin in riLeman ro n̄an jeļā m̧ool eo;im Eaar kwaļo̧k kajoor eo An ilo er, im Enaaj barāinwōt kwaļo̧k wōt kajoor eo An ilo er n̄an epepen ko tokālik; kōn menin renaaj kōn menin renaaj koņ” (Alma 37:18–19).

Ejja kajoor in kareel in wōt loe rainin ilo bok in jeje ko rekwojarjar in ejej uwaan, im Irooj enaaj kwaļo̧k n̄an jabdewōt Eo me ej pukōte n̄an jeļā ilo m̧ool. Imaron̄ ba menin ilo m̧ool ilo Aō reilikļo̧k n̄an raan ko etto ke Iaar katak kōn Kabun̄in. Rainin, kōnke kajoor in kareel eo an Bok in Mormon, Ij kam̧ool bwe Bok in Mormon ej naan an Anij, bwe ej katakin bwe Jisōs ej RiKraist eo, Messaia eo Ekwojarjar. Bok in ej juon kein kam̧ool maron̄ jibwe im loe bwe Jepļaaktok eo an ko̧jpeļ eo An em̧ōj an bōk jikin im bwe Joseph Smith ej juon rikanaan an Anij.

Eļan̄n̄e kwoj ilubwilijin ro em̧ool aer pukōt m̧ool eo, Irooj eaar kalim̧m̧ur bwe kwonaaj jeļā. Komaron̄ jeļā kōn ron̄jake katak ko an bok eo, kōn riiti bok eo, kōn kōm̧m̧ane ta eo bok eo ej katakin, kōn jar n̄an jeļā m̧ool eo an, ak kōn juon kakobaba kōn men kein. Ak kwonaaj jeļā.

Rikanaan eo ej Kam̧ool

“Bok in Mormon ej naan eo an Anij. Jej kūr kom̧ n̄an riiti ļo̧o̧k in eaiboojoj. Ej bok eo ekabwilōn̄lōn̄ tata ewaļo̧k rainin. Lukkuun riiti im jar kake, im ilo am̧ kōm̧m̧ane, Anij enaaj lewōj n̄an eok juon naan in kam̧ool kōn tallep eo an āinwōt kallim̧ur kake jān Moronai (lale Moronai 10:4).”

Būreejtōn Howard W. Hunter (1907–95), The Teachings of Howard W. Hunter, ed. Clyde J. Williams (1997), 54

Rikanaan eo ej Kam̧ool

“N̄aij juon me eaar bōk jān Irooj m̧adenļo̧k eo ekajoor tata ikijien m̧ool eo kōn [Jepļaaktok eo, ekoba Bok in Mormon]. Waļo̧k tok in eaar kajoor ippa ium̧win awa im awa; im jabdewōt jekjek ko emaron̄ waļo̧k ilo mour eo aō, toon wōt an to an ememļo̧kjeņ eo aō pād ilo jeļāļo̧kjeņ eweppan naaj pād wōt ippa.”

Būreejtōn Lorenzo Snow (1814–1901), ilo Conference Report, Okt. 1900, 61.

Kalim̧m̧ur eo an Moronai

Ilo jem̧lo̧kin Bok in Mormon, juon rikanaan kar etan Moronai eaar kalim̧m̧ur bwe eļan̄n̄e jenaaj riiti Bok in Mormon, kejōkļo̧kjeņ kōn ennaan eo an ilo buruwōd, im kajjitōk ippān Anij ilo jar eļan̄n̄e ej m̧ool, Anij enaaj uwaake kōj kōn kajoor eo an Jetōb Kwojarjar (lale Moronai 10:3–5).

M̧adenļo̧k an juon make ej an juon make. Ej itok ilo wāween ko roktak im ilo iien ko roktak n̄an kōj kajjojo ekkar n̄an kōņaan eo an Irooj. Meļeļe kōn pedped kein emaron̄ jipan̄ eok n̄an jeļā kōn kwe make.

1. Ļōmņak Kake

M̧okta jān an kūr kōj n̄an jar, Moronai eaar kūr kōj n̄an kejokļo̧kjeņ. Kejokļo̧kjeņ meļeļein n̄an lukkuun ļōmņak. kajjitōk ippam̧ make: Ekōjkan aō en̄jake n̄e Ij riiti Bok in Mormon? Etke Ij en̄jake āindein? Ta eo Iaar katak kake? Em̧m̧an ke?

Irooj eaar katakin pedped in n̄an Oliver Cowdery: Ejjeļo̧k men Oliver eaar kōm̧m̧ane ijjelo̧kin an kajjitōk Ippān. Irooj eaar jiron̄ Oliver bwe ej aikuj ekkatak kake ilo kōlmenļo̧kjeņ eo an; innām ej aikuj kajjitōk ippān Irooj eļan̄n̄e ejim̧we, im eļan̄n̄e ejim̧we Irooj enaaj kōm̧m̧an bwe buruōn en okmānmān ilowaan (lale D&C 9:7–8; kwaļo̧k kobaiki).

2. Niknik Ilo Jar

Likūt ļōmņak ko ad im kalimjōk wōt uwaak ko rejjab koļap an Jetōb ebōk kijejeto ilo ļōmņak. Bōlen ej m̧ōttan eo etke Enos ilo Bok in Mormon eaar kōnono kake jar eo an āinwōt “likarek … im̧aan Anij” (Enos 1:2).

N̄e kwoj riit, kejōkļo̧kjeņ, ak jar, pukōt juon iien im jikin me edik kein kōm̧ad ko ie. Pukōt juon jikin me enaaj jipan̄ eok jab m̧ad. Jar ilo an lōn̄ ainikien emaron̄ jipan̄ kalimjōk wōt ļōmņak ko am̧.

3. Kajjitōk Kajjitōk ko Rejim̧we

Irooj eaar jiron̄ Oliver Cowdery jab n̄an kajjitōk wōt ak n̄an kajjitōkin eļan̄n̄e eo men eo eaar ļōmņak kake eaar jim̧we. Emakijkij, eļaptata n̄e ejjab ļap jeļā eo ippād ilo bōk uwaak ko jān Jemedwōj Ilan̄, epidodo ļo̧k n̄an meļeļe uwaak eo n̄an juon aaet ak jaab kajjitōk.

“Kii eo n̄an jar eo em̧m̧anļo̧k ej n̄an katak n̄an kajjitōk kajjitōk ko rejim̧we,” kar katakin jān Eļtōr Richard G. Scott an Doulul eo an Jōn̄oulruo Rijilōk ro.¹

4. Ta Kōttōpar Eo Am̧?

Juon iaan kii ko n̄an kalim̧m̧ur eo an Moronai ej bwe jān kajjitōk kōn “lukkuun kōttōpar.” Ke 14 iiō-dettan Joseph Smith eaar etal n̄an buļōņ wōjke ko n̄an jar, ”eaar jar kōn kōttōpar ejjab wōt n̄an ron̄jak bōtaab n̄an pokake,” Būreejtōn Henry B. Eyring, Rikakipilōklōk eo Kein Kajuon ilo Būreejtōnji eo Kein Kajuon. “… Im kōn tōmak eo an, ilo raan ko im allōn̄ ko im iiō ko im̧aan jar ko an raar uwaak kōn obrak meram im m̧ool.”²

5. Jab Jerwane E

Ejjab aolep m̧adenļo̧k rekabwilōn̄lōn̄. Jet armej ewōr aer ettōņak ko, visiōn ko, ak loļo̧k ko. bōtaab elōn̄ wōt iaad renaaj en̄jake juon men eikōn̄ im ejjeļo̧k ainikien, āinwōt juon en̄ajke eokmānmān, eaenōm̧m̧an.

Būreejtōn Spencer W. Kimball (1895–1985), Būreejtōn eo kein 12 an Kabun̄ in eaar katakin; “Eļan̄n̄e juon ej kōtmene men ko rekabwilōn̄lōn̄ juon emaron̄ jab lukkuun jeļā bwe m̧adenļo̧k ej jab oktak.”³

Kakememej ko

1. Richard G. Scott, “Using the Supernal Gift of Prayer,” Liahona, Māe 2007, 8.

2. Henry B. Eyring, “Prayer,” Liahona, Jān. 2002, 18.

3. Teachings of Presidents of the Church: Spencer W. Kimball (2006), 241.

Ewi wāween Aō Jeļā

Men̄e Iaar peptaij ke ij ratimjuon iiō detta, baam̧le eo aō eaar jab niknik ilo Kabun̄in. Bōtaab ke Iaar 13, mijinede ro kar karuwainene eō n̄an etal n̄an jar, im Iaar kōm̧m̧an āindein. Iaar barāinwōt pād ilo seminary. Kooj in ekkatak eo eaar Katak ko an Bujen; eo eaar āinwōt kapokpok n̄an eō. Eļaptata Iaar tarpok kōn Joseph Smith im Bok in Mormon. Iaar kōņaan pukōt Anij, ak Iaar jab lukkuun jeļā ekōjkan ak ia.

Aolep iien Iaar ļōmņak eļap kōn kōnono ippān mijinede ro. Iaar ļōmņak kōn jemenere. Iaar ļōmņak kōn kōnono Iaar kōm̧m̧ani ippan membōr ro jet an kabun̄ ko an ro rej tōmak ilo Kraist. Ejjab aolep iien Iaar jar n̄an jeļā ta eo eaar jim̧we, bōtaab eaar ļap wōt an juon ļōmņak bajjōk jān juon kajjitōk em̧ool. Innām juon bon̄ōn Iaar jokālet n̄an jar kōn “lukkun kōttōpar.”

Iaar jiron̄ Jema Ilan̄ bwe Ikōņaan jeļā E im n̄an erom m̧ōttan Kabun̄ eo An em̧ool. Iaar kalim̧m̧ur: “Eļan̄n̄e Kwonaaj kōm̧m̧an bwe in jeļā eļan̄n̄e Joseph Smith ej juon rikanaan em̧ool im eļan̄n̄e Bok in Mormon ej m̧ool, Inaaj kōm̧m̧ane jabdewōt Kwoj kōņaan bwe in kōm̧m̧ane. Eļan̄n̄e Kabun̄ eo an Jisōs Kraist im Armej ro Rekwojarjar ilo Raan-kein Āliktata ej Kabun̄ eo em̧ool, Inaaj ļoor e im jamin ebbwer n̄an jidik.”

Iaar jab bōk juon kōkaļļe ekabwilōn̄lōn̄, bōtaab Iaar en̄jake aenōm̧m̧an im ilen kiki. Jet awa ko tokālik Iaar ruj kōn juon ļōmņak āinjuon: “Joseph Smith ej juon rikanaan em̧ool, im bwe Bok in Mormon ej m̧ool.” Ļōmņak eo eaar itok ippān tok juon aenōm̧m̧an epen kōmeļeļeik. Iaar bar juon alen kiki, mājurlep im ruj kōn ejja ļōmņak im en̄jake eo wōt.

Jān iien eo, Ijjan̄in kar bar pere bwe Joseph Smith eaar juon rikanaan em̧ool. Ijeļā bwe en̄in ej jerbal eo an Rilo̧mo̧o̧r im bwe Jemed Ilan̄ enaaj uwaake jabenejeej ko ad rem̧ool.

Rodolfo Armando Pérez Bonilla, El Salvador