Iaar En̄jake juon Kijeek Ilowaa

Claudia Williams, Florida, USA

Iaar rūttoļo̧k ilo etal n̄an Jabōt Jikuuļ ilo juon m̧ōn jar epaake im̧weo im̧ō ke Iaar ajri ilo Michigan, USA. Eaar wōr juon aō rūkaki em̧m̧an eo eaar kobrak eō kōn juon iakwe n̄an Jisōs Kraist.

Kajjojo wiik liin ej letok kaat ko rej kwaļo̧k m̧akūtkūt ko jān iien kwaļo̧k eo an Rilo̧mo̧o̧r eo ilo mour in, ekoba pedped ko Eaar katakin im kabwilōn̄lōn̄ ko Eaar kōm̧m̧ani. Kajjojo wiik Iaar likūt kaat ko ilo juon bok in pija im bar riiti bwebwenato ko ilo Baibōļ. Ilo Aō rūttoļo̧k, Iaar wōnm̧aanļo̧k wōt n̄an ekkatak Ko̧jpeļ ko ilo Kallim̧ur Ekāāl.

Iiō ko tokālik, ilo jōm̧m̧ar in 1968, mijinede ro jān Kabun̄ eo an Jisōs Kraist im Armej Ro Rekwojarjar ilo Raan kein Āliktata kar loļo̧k juon m̧ōn juon baam̧le membōr. Raar jab bōk karuwainene eo an eļtōr ro n̄an katak kōn Kabun̄ in bōtaab raar jilkintok er n̄an m̧weo m̧ō.

Ilo katak eo am kein kajuon mijinede ro raar katakin eō bwe “bun̄ eo” em̧ōj an kar waļo̧k jān Kabun̄ eo me Jisōs Kraist eaar ejaake (lale 2 Tessalonika 2:3). Ta eo raar katakin ar ekkeijel ļo̧k ippān ekkatak eo aō make, kōn menin ke raar kajjitōk eļan̄n̄e remaron̄ bar lotok eō, Iaar errā.

Ilo ļotok eo aer tokāļik, ekar wōr juon aō laajrak in kajjitōk ko. Armej ro Rekwojarjar rej ke peptaij kōn tulo̧k? Rej ke tōmak ilo mālim eo an priesthood? Rej ke tōmak ilo kemour rinan̄inmej? Uwaak ko aer raar rejtake ta eo em̧ōj Aō kar ekkatak kake ilo Kallim̧ur Ekāāl. Ilo jem̧ļo̧kin lotok eo, raar door ippa juon bok raar ba eaar kam̧ool kōn Jisōs Kraist.

Iaar likūt bok eo ilōn̄ in TV eo im ilen kiki. Ak lukwōnļo̧k bon̄ōn eo, Iaar ruj kōn juon en̄jake eo ekajoor tok ālik Iaar kile āinwōt Jetōb Kwojarjar. Iaar en̄jake im̧we n̄an jino riiti, kōn menin Iaar riiti ium̧win juon awa im jimettan m̧okta jān aō kar bar rool n̄an kiki. Jidik iien tok ālik, Iaar bar ruj kōn ejja en̄jake eo wōt, kōn menin Iaar riit eļapļo̧k.

Jon̄ak in eaar wōnm̧aanļo̧k ium̧win ilo bon̄ōn ko ruo. Iaar iakwe ta eo Iaar riiti im kile bwe Bok in Mormon eaar kam̧ool kōn Jisōs Kraist.

Iaar jokālet n̄an kajjitōk ippān Anij kōn tōl. Eaar kein kajuon jān ke Iaar juon leddik edik, Iaar bukwelōlō n̄an jar. Iaar kajjitōk ippān Jemedwōj Ilan̄ n̄an jipan̄ eō jeļā ta eo n̄an kōm̧m̧ane kōn okmeņeņ eo ilowaō. Ke eaar dedeļo̧k jar eo aō, kar im̧we Eō n̄an bar lale oktak eo an RiLeman ro ilo 3 Nipai 9. Iaar riiti bwe kar “baptais kōn kijeek im kōn Jetōb Kwojarjar, im rejjab jeļā kake.” (eoon 20).

Naan eo “rejjab jeļā kake” kar kōnono kake n̄an eō. Ļōmņak eo kar itok n̄an eō: “Kabun̄ eo an Jisōs Kraist ej lukkuun pād ioon laļ in!” Ikar kijoroor n̄an kōnono ippān mijinede ro kōn ta eo Iaar riiti im kōn ta eo Ijeļā kiiō. Ak ke raar uwaaki kajjitōk ko aō kōn juon kūr n̄an peptaij, Iaar jiron̄ er Ijjab maron̄. Ļeo pāleō eaar jab meļeļe.

Mekarta, ilo Aō kar wōnm̧aanļo̧k wōt ilo ļōmņak kōn eoon jab eo, Iaar kile bwe epād ie tōl eo ealikkar n̄an eō n̄an leļo̧k katok eo an “juon bōro erub im juon jetōb ettā.” Iaar jar im kar kajjitōk ippān Jema ilo Lan̄ n̄an jipan̄ eō, eo Eaar. Ālkin an ļeo pāleeō kar bōk katak ko an mijinede ro, eaar leļo̧k mālim eo n̄an aō peptaij.

Eļap aō kam̧oolol n̄an Jema Ilan̄ eo ej iakwe kōn en̄jake jab in eo eaorōk im kajoor Iaar bōke āinwōt juon m̧am̧a eo edik ilo riiti Bok in Mormon. Eaar tōl ļo̧k eō n̄an ko̧jpeļ eo kar kōjepļaaktok an Jisōs Kraist. Āinwōt juon uwaak, kareel eo an Jetōb Kwojarjar Iaar en̄jake ilo bon̄ōn ko ilo 1986 ej kiiō juon menin letok epen—juon men eo me eaar tōl eō ilo iiō ko 40 āinwōt juon membōr in Kabun̄ in.