Naan in Katak an Kōrā
Eļan̄n̄e Jej Jab Pere
Katak kōn katak in im, n̄e ekkar, kōnono kake ippān jejtōr ro kom̧ij loļo̧k. Kōjerbal kajjitōk ko n̄an jipan̄ eok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā ro en m̧ōttan eo emourur tata ilo mour eo am̧ make.
Tōmak • Baam̧le • Deeor
Ilo Bok in Mormon jej riit kōn likao ro rekanooj em̧m̧an me raar lukkuun peran. “Aaet, raar armej in m̧ool im jatōr, bwe kar katakin er n̄an kōjparok kien ko an Anij im etetal jim̧we im̧aan Mejān” Alma 53:21. Likao rein retiljek raar nōbar m̧am̧a ro aer—waanjon̄ak ko aer im rūkaki ro aer.
Ro jinen ritariņae ro an Hilamōn raar mour ilo tōre ko rejjab āinwōt kein ad make. Jekjek in aer mour raar pen im kauwōtata, im jodikdik ro kar kūr er n̄an bōbrae anemkwoj ilo mour im ilo jetōb. Rainin jej mour ilo juon laļ eo jej “Oktak e jab ippān bōtōktōk im kanniōk, a ippān jiōb ro, ippān ro re kajoor, ippān ro irooj in mark i laļ, ippān jaran jetōb re nan ijo ko i lan̄” ( Epesōs 6:12).
Iien apan̄ ko rej aikuji ro jinen im jemān rekajoor im waanjon̄ak ko me rej katakin kōn m̧ool eo ritariņae ro an Hilamōn raar jeļā: “eļān̄n̄e re ban pere, Anij enaaj lo̧mo̧ren er.” (Alma 56:47). Katakin im kwaļo̧k m̧ool in rainin ej aikuji ekkan̄ atin eo. Ijowōtke, jej jab aikuj mijak. Eļan̄n̄e jejeļā wōn kōj im wōn Anij im jaar kōm̧m̧ani bujen ko Ippān, jej—āinwōt m̧am̧a ro an ritariņae ro—naaj bōk eļap kajoor n̄an em̧m̧an.
Enan̄in āinļo̧k wōt, kajjojo 2,060 ritariņae ro an Hilamōn kar kareel jān juon m̧am̧a. Bōtaab m̧am̧a rein raar jab jerbal make ļo̧k. Kobaļo̧k ippān em̧m̧aan im kōrā ro jet rewānōk, m̧am̧a rein bōlen raar aikuj in kobaik tōmak ko eo aer im waanjon̄ak eo n̄an katakin kajoor eo an bujen ko. Jodikdik ro an tōre kein raar meļeļe bujen eo ro jineer im jemāer raar kōm̧m̧ane n̄an bōk kuņaer ilo tariņae eo. Im jekdoon n̄e eaar pen, Jemed Ilan̄ eo ej iakwe eaar kōpeļļo̧k juon iaļ n̄an rein jinen im jemen n̄an kejparok wōt bujen eo aer—im kejparok anemkwōj eo aer (lale Alma 56:5–9). Kōj barāinwōt aikuj in kautiej bujen ko ad bwe ajri ro im jodikdik ro—ajri ro nejid make im ro ilo ward ko, branch ko ad, ro riturid, im jukjuk in pād ko—naaj meļeļe im rejtake kejparok bujen eo.
N̄e jej kauteij bujen ko ad, Jemed Ilan̄ emaron̄ kōpooj juon iaļ n̄an kōj. Jej aikuj mour kōn bujen ko ad kōn jejjet. Jemaron̄, n̄an waanjon̄ak, jejjet ilo jar, ilo ekkatak kōn jeje ko rekwojarjar, ilo kabwijer juon peba in mālim an tampeļ kāāl, ilo karbōb in nuknuk, ilo kauteij Jabōt. Ilo ad kōm̧m̧ane āindein, ajri ro nejid renaaj jeļā im maron̄ ba, “Kōmij jab pere ke ro jinnām raar jeļā” ( Alma 56:48).
Kōrā ro Rekwojarjar ilo Raan Kein Āliktata me rej kile bwe kajoor eo aer ej itok jān Pinmuur eo an Irooj rejjab ebbwer ilo tōre ko reppen im tōren kabwerer. Āinwōt rikejparok bujen ko, jej kijn̄en̄e ilo kejparok, kōkaajririk, im bōbrae ajri ro im jodikdik ro bwe juon raan jen maron̄ ba kōn diktak in epepenin, “Ij jan̄in kar lo jon̄an peran eļap” ( Alma 56:45).
Julie B. Beck, Būreejtōn eo eutiej an Doulul Eo An Kōrā.
Jān Jeje ko Rekwojarjar
Pija jen Robert Casey