Bok in Mormon Eaar Kōnono n̄an Eō

Gina Baird, Utah, USA

Ke ajri eo nejim ediktata, Amanda, eaar ruo iiō dettan, eaar nan̄inmej in leukemia. Jekjek eo an eaar pen, im kanjōr eo an eaar jab dikļo̧k ālkin an chemotheraphy (kōjerbal uno kajoor). Innām eaar aikuj in joļo̧k ijo enana ilo diin.

Ke ļeo pāleeō im ļaddik ro ruo nejū rej pād m̧weo ilo Utah, Ij pād wōt ippān Amanda ilo bar juon bukōn jān Jeptōm̧ba m̧ae wiik eo m̧oktata ilo Jānwōde. Kōm kar jab kōm̧m̧ane kam̧oolol ippān doon ilo Kūrijm̧ōj eo, bōtaab jem̧ļo̧k in iien taktōk ko, kōm jepļaak ļo̧k n̄an im̧weo imōm̧.

Ilo loļo̧k eo am m̧oktata n̄an im̧ōn taktō eo n̄an bar lale ālkin am jepļaak n̄an m̧weo taktō taktō ro raar bar juon alen loe leukemia cell ko ilo bōtōktōk in Amanda. Jerbal in kōmakūt eo eaar jab jejjet. Ron̄jake ennaan eo, Iaar en̄jake āinwōt n̄e Iaar jab maron̄ wōnm̧aanļo̧k wōt. Baam̧le eo am eaar dibuk eļap inepata, jerbal, ettoļo̧k jān doon, im iien ko reppen. Kiiō naaj kar luuji leddik eo nejim.

Iaar bar jepļaak ļo̧k n̄an m̧weo ālkin rālepen eo n̄an ippān ļaddik ro ruo nejū. Ilo am kōttar an ļeo pāleeō rool tok n̄an m̧weo jān jerbal, kōm kar kōpeļļo̧k Bok in Mormon ko am im kar jino riit. Kōm kar pād ilo 2 Nipai 9. Ilo am kar riit, naan kein raar kōnono n̄an eō:“

Ij kōnono n̄an kom̧ men kein, bwe kom̧in maron̄ lan̄lōn̄ im kotak bōrami indeeo, kōn jeram̧m̧an ko an Anij eaar door ioon ro nejimi.

“Bwe ijeļā bwe kom̧ ar lin̄ōre eļap, elōn̄ iami, n̄an jeļā men ko rej itok; kōn menin ijeļā bwe kom̧ jeļā ke ānbwinid renaaj m̧adeon̄ļo̧k im mej, mekarta, ilo ānbwin kein ad jenaaj lo Anij. …

“Bwe āinwōt mej eaar itok ioon aolep armej, n̄an kakūrm̧ool karōk in tiriam̧okake eo an ri Kōm̧anm̧an Eļap, eaikuj wōr kajoor in jerkakpeje …

“O ewi jon̄an em̧m̧an eo an ad Anij, eo Eaar kōpooj juon iaļ n̄an ad rōļo̧k jān lokjak eo an eakeak nana in; aaet eakeak in mej im hell. …

“Im E ej itok n̄an laļ in bwe en maron̄ lo̧mo̧ren aolep armej n̄e renaaj eo̧ron̄ ainikien, bwe lo, eaar en̄taan kōn metak ko an aolep armej, aaet, metak ko an aolep menin mour, em̧m̧aan im kōrā, im ajri ro rej jān baam̧le eo an Adam.

“Im Eaar en̄taan kōn menin bwe jerkakpeje en maron̄ bun̄leplep ioon aolep armej, bwe aolep ren maron̄ jutak im̧aan ilo raan eo eļap raan in ekajet” (2 Nipai 9:3–4, 6, 10, 21–22).

Ilo Aō kar riiti naan kein, Jetōb Kwojarjar eaar kobrak ruum̧ eo. Iaar en̄jake bwe Jema Ilan̄ eaar jeļā ennaan eo Iaar bōke raan jab eo. Iaar en̄jake bwe naan ko an rikanaan Jekab kar je elōn̄ ļo̧k jān 2,000 iiō ko im̧aanļo̧k kar je n̄an n̄a n̄an raan jab eo im raar kajju tok jān Rilo̧mo̧o̧r eo. E eaar jeļā metak im būrom̧ōj eo Iaar en̄jake ālkin ron̄jake bwe leddik eo nejim enaaj kar mej. Im E eaar pād n̄an kaenōm̧m̧an baam̧le eo am kōn kalim̧m̧ur eo An bwe E eaar kōpooj juon iaļ im bwe juon raan, kōn kajoor eo an Jerkakpeje eo, “ilo ānbwinid jenaaj lo Anij.”

Amanda eaar mour enan̄in bar juon iiō, bōtaab Ijjamin kar meļo̧kļo̧k raan jab eo ke naan ko an Bok in Mormon raar kōnono n̄an eō ilo aō aikuj im Irooj eaar letok n̄an eō kōjatdikdik, kaenōm̧m̧an, im meļeļe kōn karōk eo An.