2011
Rikanaan Joseph Smith: Rūkook eo an Bok in Mormon
Oktoba 2011

Rikanaan Joseph Smith

Rūkook eo an Bok in Mormon

Bok in Mormon ej juon bok in jeje eo ekwojarjar ejej uwaan. Men̄e rikanaan ro etto raar je, eaar jab itok n̄an kōj āinwōt Baibōļ eo. Baibōļ eo kar je ioon jāljel ko reļļap ilo Laļ eo M̧okta āinwōt bok ko rejeņoļo̧k im kar kapeiki jān peba ko ium̧win buki iiō ko. Eaar jab m̧ae epepen eo kein kemen ālkin an Jisōs Kraist me bok kein rejeno̧lo̧k raar kobaiki im kōm̧m̧an bwe ren pād āinwōt juon bok eo jej kōnono kake āinwōt Baibōļ eo Ekwojarjar.

Bok in Mormon, kōn oktak in, kar ļo̧o̧ke jān rikanaan ro etto ilo Laļ eo Ekāāl ioon pileij metal ko, kobaik kōkadudu in ļo̧o̧k eo eaorōk jān juon rikanaan—Mormon (taitōļ eo)—ilo epepen eo kein kōlalem a.d. n̄an juon ļo̧o̧k ioon pileij gold ko. Ļaddik eo nejin, Moronai, tokālik kar kalibwin pileij ko, ijo raar pād ie m̧ae 1827, ke Moronai, āinwōt juon eo em̧ōj an jerkakpeje, kar leļo̧k n̄an juon ļaddik edik etan Joseph Smith.

Ta eo ej waļo̧k ālkin bwebwenato in ej wāween an Joseph kar bōk, ukōte, im kar je taitōļ in ļo̧o̧k eo kiiō āinwōt Bok in Mormon: Bar juon Kalim̧m̧ur kōn Jisōs Kraist. Rilo̧mo̧o̧r eo Make eaar kam̧ool bwe bok eo em̧ool (lale D&C 17:6).

  1. Ilo 1820 juon ļaddik 14-iiō dettan etan Joseph Smith kar jokwe epaake Palmyra, New York. Men̄e edik, eaar n̄ūrbōktak kōn piktokin im̧aan Anij im kar pok kōn an kabun̄ ko an ro rej tōmak ilo Kraist ba bwe ro jet ejjab m̧ool men ko rej ba. Kōļapļo̧k an ekkatak jān Baibōļ eo, Joseph eaar kālet n̄an pukot jeļāļo̧kjen kōn kajjitōk ippān Anij, eo ej “wūjlep n̄an armej otemjej, im jab eņouk kake” (Jemes 1:5). Eaar etal n̄an bulōn wōjke ko repaake m̧weo im̧ōn im jar.

  2. Ke Joseph eaar bukwelōlō im jar, juon joor in meram ilōn̄ in wōt bōran. Ilo meram in eaar lo ruo Armej ro. Jemed Ilan̄ eaar kōnono im ba, “En̄in Nejū Jitenbōro Ron̄jake E!” (Joseph Smith—History 1:17). Irooj eaar jiron̄ Joseph bwe en jab kobaļo̧k ippān jabdewōt iaan kabun̄ ko kōnke aolepāer raar jab m̧ool, bōtaab kar kallim̧uri e “bwe tarļļep in Ko̧jpeļ eo naaj kwaļo̧k n̄an[e] tokālik.”1

  3. Jilu iiō tokālik, ilo tōre in Joseph Smith ej kwaļo̧k en̄jake eo an ippān ro jet—im kar kaen̄taan e kake. Eaar kwaļo̧k: “Men̄e kar kōjedat im kaen̄taan eō kōn aō ba iaar lo juon m̧adenļo̧k, aaet eaar m̧ool; im … Kar tōl eō n̄an ba ilo buruwō: Etke kaen̄taan eō kōn aō kwaļo̧k m̧ool eo? Em̧ōj aō lukkuun lo juon m̧adenļo̧k; im wōn n̄a bwe in maron̄ jum̧ae Anij, ak etke laļ in ej ļōmņak bwe in maron̄ karmejete ta eo iaar lukkuun loe? Bwe em̧ōj aō lo juon m̧adenļo̧k; Ijeļā menin, im ijeļā bwe Anij ejeļā menin, im ijjab maron̄ karmejete menin” (Joseph Smith—History 1:25).

  4. Ilo Jebtōm̧ba 21, 1823, Joseph eaar jar im juon meram eaar kobrak ruum eo an im juon enjeļ eaar waļo̧k n̄an e kar etan Moronai. Moronai eaar jiron̄ Joseph kōn jeje ko jān jet iaan rikanaan ro etto. Ļo̧o̧k eo, kar je ioon pileij gold ko, kar kalbwini ilo juon toļ epaak. Kar jiron̄ Joseph bwe enaaj kar ukōt ļo̧o̧k eo.

  5. Āliktata, ilo Jebtōm̧ba 22, 1827, Joseph eaar bōk pileij ko, ļōn̄aje lōn̄tak bo̧o̧k eo kar kalbwini ium̧win juon dekā eļap ioon juon toļ epaake Palmyra, New York.

  6. Āinwōt kar iminene ilo eria ko rettoļo̧k jān jikin kweilo̧k ilo raan ko, Joseph Smith eaar jab bwe jeļāļo̧kjen ippān. N̄an jipan̄ e kōn ukook eo, Anij eaar leļo̧k n̄an e juon kein jerbal in ukook in etto ņaetan Urim im Thummim. Kar barāinwōt kōjeram̧m̧an e kōn jipan̄ an rijeje ro ro me rekar je ta eo eaikuj in kar ukoote. Ilubwilijin rijeje rein ekar kōrā eo ippān, Emma; Martin Harris, juon rikallib; im Oliver Cowdery, juon rikaki in jikuuļ. Jerbal in ukook eo eļap eaar dedeļo̧k dikļo̧k jān jilu allōn̄ ko ālikin an Oliver kar jino āinwōt rijeje.

    Emma eaar kōmeļeļeik ewi kar jekjekin n̄an jerbal āinwōt rijeje an Joseph: “Ejjeļo̧k armej emaron̄ in kar ba kōn jeje ko an bok ko ijello̧kin wōt eaar im̧we; bwe, ke [Iaar] jerbal āinwōt an rijeje, [Joseph] eaar ba n̄an eō awa ālkin awa; im ke kōm ro̧o̧l jān am kar m̧ōn̄ā, ak ālkin ukook ko, ear jino ijo eaar bōjrak ie, ilo an jab lo bok eo ak jabdewōt m̧ōttan n̄an riit n̄an e.”2

    Joseph eaar kōmeļeļeik itok eo eaorōk an Bok in Mormon: “Kōn kajoor eo an Anij Iaar ukōt Bok in Mormon jān kajin Ijiep, jeļāļo̧kjen eo me eaar jako jān laļ in, eo me eaiboojoj Iaar barāinwōt jutak make, juon jodikdik eo ejabwe jeļāļo̧kjen ippān, n̄an keidi jeļāļo̧kjen eo an laļ in im kowaan eaar lapļo̧k ilo epepen eo kein kōralitōk, kōn juon m̧adenļo̧k ekāāl.”3

  7. Ium̧win 18 allōn̄ ko pileij ko raar pād ippān, Joseph eaar jab e wōt eo n̄an loe ak jibwe pileij ko. Em̧m̧aan ro jilu—Olivery Cowdery, David Whitmer, im Martin Harris—kar kam̧ool bwe enjeļ Moronai eaar kwaļo̧k n̄an er pileij gold ko im bwe raar jeļā pileij ko “em̧ōj kar ukōti kōn menin letok im kajoor eo an Anij, bwe ainikien kar kwaļo̧k n̄an kōm̧.” Bar ralitōk em̧m̧aan ro raar barāinwōt kam̧ool bwe rekar lo im jibwe pileij gold ko.4

  8. Ilo Okwōj 1829, Joseph eaar kōm̧m̧an koņ ippān eo ej būriin Egbert B. Grandin ilo Palmyra, New York, n̄an būriini bok eo. Martin Harris eaar wia kake jikin kallib eo an n̄an kōļļāik wōnāān būriini bok eo, im ilo Maaj 26, 1830, Bok in Mormon eo eaar pojak n̄an wia kake.

  9. Ilo Eprōļ 6, 1830, enan̄in 60 armej ro raar kuk ippān doon ilo juon em̧ ilo Fayette, New York. Ijo, āinwōt tōl jān Irooj Jisōs Kraist, Joseph Smith eaar kajutak Kabun̄ eo an Rilo̧mo̧o̧r, kōjepļaaktok āinwōt an kar lukkuun ejaak im kar tōl jān rijilōk ro im rikanaan ro, kōmālim n̄an kōnono kōn Anij. Tokālik m̧adenļo̧k eo n̄an Joseph Smith kar leļo̧k n̄an e n̄an ņaetan Kabun̄ eo: Kabun̄ eo an Jisōs Kraist im Armej ro Rekwojarjar ilo Raan-kein Āliktata (lale D&C 115:4).

Kakememej ko

  1. Joseph Smith, ilo History of the Church,4:570.

  2. Intōrpiu ippān Emma Smith jen Joseph Smith III, Pāp. 1879, ilo Saints’ Herald, Okt. 1, 1879, 290.

  3. Teachings of Presidents of the Church: Joseph Smith (2007), 60

  4. Lale “Naan in Kam̧ool eo an Ri Kam̧ool ro Jilu” im “Naan in Kam̧ool eo an Ri Kam̧ool ro Ralitōk,” ilo Kadkad in Bok in Mormon eo.

Jān tuanmiin̄: Būratōr Joseph, jān David Lindsley © 1998; Joseph Smith Pukōt Jeļāļo̧kjen jān Baibōļ eo, jān Dale Kilbourn © 1975 IRI; M̧adenļo̧k eo an Joseph Smith Kein Kajuon, jān Greg Olsen, maron̄ jab kapeiki; pija jān Joseph Smith: Rikanaan eo an Jepļaaktok eo, jān Matthew Reier © IRI

Jān tuanmiin̄: Waļo̧k eo an Enjeļ Moronai n̄an Joseph Smith jān Tom Lovell © 2003 IRI; pija jān Joseph Smith: Rikanaan eo an Jepļaaktok eo, jān Matthew Reier © IRI; pija jān Joseph Smith: Rikanaan eo an Jepļaaktok eo, jān John Luke © IRI; Jān Menin letok im Kajoor an Anij, jān Simon Dewey; kōmeļeļein pija eo jān William Maughan © 1998; pija jān Craig Dimond © IRI; pija jān Joseph Smith: Rikanaan eo an Jepļaaktok eo, jān Matthew Reier © IRI