Bok in MormonDekā in Jabōn Em̧ n̄an Tōmak in Ad
Ezra Taft Benson eaar erom Būreejtōn eo kein 13th an Kabun̄ in ilo Nobōm̧ba 10, 1985. Kememej E kōn naan in kam̧ool eo an epen kōn kajoor eo an Bok in Mormon im an kalikkar aorōk eo an ilo ekkatak jeje ko rekwojarjar aolep raan, jerbal in mijinede, im katakin kōn ko̧jpeļ eo. Iiō in ej kōkaļļeik 25th iiō rūtto in ennaan eo an ilo Oktoba in 1986 kweilo̧k eo eļap.
M̧aan im kōrā ko rejitōnbōro, rainin Ikōņaan kōnono kōn juon iaan menin letok ko reļļap tata kar letok n̄an laļ ilo raan kein. Menin letok eo Ij ļōmņak kake eļapļo̧k an aorōk jān jabdewōt elolo ko me em̧ōj aer waļo̧k tok jān oktak ko an kein jerbal ko kōjerbal jarom̧ im kapeel ko. Menin ej juon menin letok eļapļo̧k an aorōk n̄an armej jān elōn̄ men ko raiboojoj em̧ōj ad loi ilo uno ko raan kein. Eļapļo̧k an aorōk n̄an armej jān ejaak eo an baļuuņ ak itok-itak ilo mejatoto. Ij kōnono kōn menin letok eo an Bok in Mormon, kar letok n̄an armej 156 iiō ko remootļo̧k.
Menin letok in kar kōpooj jān pein Irooj ium̧win juon tōre elōn̄ ļo̧k jān taujin iiō ko, innām kar ņooje jān E bwe en maron̄ kejparoke ilo an erreo n̄an epepen eo ad. Bōlen ejjeļo̧k men ej kam̧ool eļapļo̧k an kalikkar aorōkin bok eo raan kein an jeje ko rekwojarjar jān ta eo Irooj Make eaar ba kake.
Jān ļo̧n̄in Make Eaar kwaļo̧k kam̧ool (1) bwe ej m̧ool (D&C 17:6), (2) me epād ie m̧ool eo im naan ko An (D&C 19:26), (3) bwe kar ukōte kōn kajoor eo jān ijo eutiej (D&C 20:8), (4) bwe epād ie tarļļep in ko̧jpeļ eo an Jisōs Kraist (D&C 20:9; 42:12), (5) me kar letok jān im̧we im kappen jān kōjeram̧m̧an ko an enjeļ (D&C 20:10), (6) me ej letok kein kam̧ool bwe jeje ko rekwojarjar rem̧ool D&C 20:11), im (7) bwe ro rekar bōke ilo tōmak naaj bōk mour indeeo (D&C 20:14).
Naan in kam̧ool eo ekajoor kein karuo kōn Bok in Mormon ej n̄an jeļā ia eo Irooj eaar likūt ie n̄an an kōjādeiktok ilo walok an Jepļaaktok. Men eo dein eaar waļok eaar Visiōn eo Moka. Ilo jādetok eo ekabwilōn̄lōn̄, Rikanaan Joseph Smith eaar katak wāween ak mejatoto eo em̧ool an Anij im bwe Anij ewōr juon jerbal n̄an an kōm̧m̧ane. Wōnm̧aantak eo an Bok in Mormon eaar men eo tokālik n̄an waļo̧k.
Kōļmenļo̧kjeņ kōn meļeļe ko rej kwaļo̧k. Waļoktok eo an Bok in Mormon im̧aan jepļaaktok eo an priesthood eo. Ekar jeje jejjo wōt raan ko m̧okta jen an kar Kabun̄ eo kar ejaak. Armej ro rekwojarjar kar leļo̧k n̄an er Bok in Mormon eo n̄an riiti m̧okta jen an kar ilo̧k n̄an er m̧adenļo̧k ko rekar kōlaajrak katak ko reļļap āinwōt jilu jon̄ak in aiboojoj ko, m̧are an celestial, ak jerbal n̄an ro remej. Ekar itok m̧okta jen doulul ko an priesthood im ejaak eo an Kabun̄ eo. Ejjab kwaļo̧k n̄an kōj jet wāween ko kōn wāween an Irooj kwaļo̧k jerbal in an ekwojarjar?
Ilo iien eo jej kile ekōjkan an Irooj en̄jake kōn bok in, ej aikuj kabwilōn̄ kōj bwe E ej barāinwōt letok n̄an kōj kakkōl ko rekwojarjar kōn ekōjkan ad būki. Ej kwaļo̧k bwe ro raar bōk Bok in Mormon kōn tōmak, jerbal jim̧we, naaj kōpālpel er kōn juon kūraun in aiboojoj indeeo (lale D&C 20:14), Irooj ej letok kakkōl in ālkin An letok: Ak ro rej kapen buruweer ilo jab tōmak, im kōjekdoon ie, naaj oktak n̄an aer make kakkure. D&C 20:15
Ilo 1829, Irooj eaar kakkōl Armej ro Rekwojarjar bwe rejjab aikuj kowaan men ko rekwojarjar (lale D&C 6:12). Em̧ool Bok in Mormon ej juon men ekwojarjar, im aaet elōn̄ rej kowaan e, ak ilo bar ba kake, jab kea kake, kōm̧m̧an n̄an e āinwōt juon men ejej tokjen.
Ilo 1832, āinwōt an jet mijinede ro jepļaak jān jikin jerbal ko aer, Irooj eaar kauwe er kōn aer jab kanooj kaorōk Bok in Mormon. Āinwōt juon tōprak in m̧wil jab in, eaar ba, ļōmņak ko aer raar marok. Ejjab kōnke raar kaorōk bok in ekwojarjar boktok meram eo ejako, eaar barāinwōt bōk tok n̄an aolepen Kabun̄ eo lia, em̧ool aolep ajri ro nejin Zaion. Innām Irooj eaar ba, Im renaaj pād wōt ilo liakeļo̧k in m̧ae iien rej ukweļo̧k im kememej bujen eo ekāāl, aaet Bok in Mormon” (D&C 84:54–57).
Āinwōt an wōr m̧ool eo ippād kōn Bok in Mormon pād ippād eļōn̄ļo̧k jān buki im jimettan iiō alikkar an dik aorōkin n̄an kōj rainin? Jej ke kememej bujen eo ekāāl, em̧ool Bok in Mormon? Ilo Baibōļ ewōr ippād Kalim̧m̧ur M̧okta im Kalim̧m̧ur Ekāāl. Naan eo kalim̧m̧ur ej kajin In̄lij kōjerbale juon naan in Gerek eo barāinwōt maron̄ ukōte āinwōt bujen. Ej ke melelein an Irooj ke Eaar ņaetan Bok in Mormon “bujen kāāl”? Ej lukkuun bar juon kalim̧m̧ur ak kam̧ool kōn Jisōs. En̄in ej juon iaan un ko etke raan ko ļo̧k jaar kobaik naan eo “Bar Juon Kalim̧m̧ur Kōn Jisōs Kraist” n̄an taitōļ eo an Bok in Mormon.
Eļan̄n̄e Armej ro Rekwojarjar m̧okta kar kauwe er kōn jab kanooj kaorōk Bok in Mormon, jej ke pād ium̧win liakeļo̧k in eļan̄n̄e jej kōm̧m̧ane āinwōt? Irooj Make ej kwaļo̧k naan in kam̧ool kōn aorōk eo an indeeo. Juon bōnbōn eo edik kōn kōj emaron̄ ke bōktok Kabun̄ in ilo liakeļo̧k kōnke edik ad kaorōk men ko rekwojarjar? Ta eo jenaaj ba ilo Ekajet eo n̄e jej jutak Im̧aan im lo erreiļok eo an ekamijak eļan̄n̄e jej ilubwilijin ro kar kōmeļeļeik er āinwōt ro remeļo̧kļo̧k bujen eo ekāāl?
Ewōr jilu un ko reļļap etke Armej ro Rekwojarjar ilo Raan kein Āliktata rej aikuj kōm̧m̧an bwe ekkatak kōn Bok in Mormon en juon kōttōpar ilo tōren mour.
Eo m̧okta ej bwe Bok in Mormon ej dekā in jabōn em̧ n̄an tōmak in ad. En̄in eaar ennaan eo an Rikanaan Joseph Smith. Eaar kam̧ool bwe “Bok in Mormon eaar bok eo ejim̧we tata iaan bok otemjej ioon laļ, im ej pedped in ad kabun̄”1. Juon pedped ej juon dekā eo iolapen lippen eo. Ej dāpij aolepen dekā ko jet ilo jikin, im n̄e em̧m̧akūt, lippen eo ebwilo̧k.
Ewōr jilu wāween ko me Bok in Mormon ej dekā in jabōn em̧ n̄an tōmak in ad. Ej dekā in jabōn em̧ ilo kam̧ool eo ad kōn Kraist. Ej dekā in jabōn em̧ an katak eo ad. Ej dekā in Jabōn em̧ an naan in kam̧ool eo.
Bok in Mormon eo ej dekā in jabōn em̧ ilo kam̧ool eo ad kōn Jisōs Kraist, eo E make dekā in jabōn em̧ an aolep men jej kōm̧m̧ani. Ej kwaļo̧k kam̧ool kōn m̧ool eo An kōn kajoor im alikkar. Ejjab āinwōt Baibōļ, eo eaar eļļā ilo epepen ko kōn rikōm̧m̧an kape ro, rukook ro, im ro rej kōm̧m̧an kabun̄ renana me rej ukōt bok eo, Bok in Mormon eaar itok jān rijeje eo n̄an eo ej riit ilo juon bun̄tōn eo eim̧we an ukook. Kōn menin, naan in kam̧ool eo an kōn M̧aajta eo ealikkar, ejm̧we, im obrak kōn kajoor. Bōtaab ej kōm̧m̧an eļōn̄ļo̧k. Elōn̄ wōt iaan ro rej tōmak ilo Kraist ilo laļ in rainin rej joļo̧k kwojarjar eo an Rilo̧mo̧o̧r. Rej kajjitōkin lotak eo An ekabwilōn̄lōn̄, mour eo An eweppān, im m̧ool eo an Jerkakpeje eo An Eaiboojoj. Bok in Mormon ej katakin ilo naan ko repidodo im rejjab bōd kōn m̧ool eo an aolep men kein. Ej barāinwōt letok kōmeļeļe eo edipieo tata kōn katak eo an Pinmuur eo. Em̧ool, bok in ekwojarjar eim̧we ej dekā in jabōn em̧ ilo kwaļo̧k kam̧ool eo n̄an laļ in bwe Jisōs ej RiKraist eo.2
Bok in Mormon ej barāinwōt dekā in jabōn em̧ an katak eo an Jerkakpeje eo. Āinwōt kar kwaļo̧ke m̧oktaļo̧k, Irooj Make em̧ōj An kwaļo̧k bwe Bok in Mormon epād ie tarļļep in ko̧jpeļ eo an Jisōs Kraist ie (D&C 20:9). Ejjab meļeļe in epād ie aolep katakin ko, aolep katak ko jan̄in kar kwaļo̧ki. Ijjeļo̧kin, ej meļeļe in bwe ilo Bok in Mormon jenaaj lo tarļļep eo an katak kein remenin aikuj n̄an lo̧mo̧o̧r eo ad. Im epidodo im meļeļe aer katakin bwe jon̄an ajri ro ren maron̄ katak wāween ko an lo̧mo̧o̧r im mour ijo euteij tata. Bok in Mormon ej letok ekanooj in ļap jon̄an ekedepakpak ļo̧k meļeļe ko ad kōn katak ko an lo̧mo̧o̧r. N̄e ejako, elōn̄ men ko katakin ilo jeje ko rekwojarjar remaron̄ jab lukkuun pidodo im aorōk.
Āliktata, Bok in Mormon ej dekā in jabōn em̧ an naan in kam̧ool. Ejja āinwōt an juon libbon̄ m̧ōram̧rōm̧ eļan̄n̄e dekā in jabōn em̧ eo kōm̧akūti, āindein aolepen Kabun̄ in ej jutak ak wōtlo̧k kōn tallep eo an Bok in Mormon. Rikejdāt ro an Kabun̄ in alikkar aer meļeļe kake menin. En̄in ej etke eaar tokitien aer kowaan Bok in Mormon, bwe eļan̄n̄e remaron̄ kakkure, Rikanaan Joseph Smith en kar ļooren ļo̧k wōt. Kōn menin āindein ennaan eo ad kōn kii ko an priesthood eo, im m̧adenļo̧k, im jepļaaktok eo an Kabun̄in rej ekkeijelļo̧k wōt ippān. Bōtaab ilo ejja jekjek in wōt, n̄e Bok in Mormon em̧ool—im milien em̧ōj aer kam̧ool bwe ewōr ippāer kam̧ool eo an Jetōb ilo tum̧oolin—innām juon ej aikuj bōk ennaan ko kōn Jepļaaktok im aolep men ko rej ekkeijel ļo̧k ippān.
Aaet, ro jeiū im jatū jitōnbōro, Bok in Mormon ej dekā in jabōn em̧ n̄an tōmak in ad—dekā in jabōn em̧ an naan in kam̧ool eo ad, dekā in jabōn em̧ an katak eo ad, im dekā in jabōn em̧ ilo kam̧ool eo an ad Irooj im Rilo̧mo̧o̧r.
Eo kein karuo etke jej aikuj kōm̧m̧an bwe Bok in Mormon en ioļapļap in pedped in katak bwe eaar jeje n̄an tōre in ad. RiNipai ro rejjan̄in kar bōk bok eo; barāinwōt RiLaman ro ilo tōre ko etto. Eaar meļeļein n̄an kōj. Mormon eaar jeiki jem̧ļo̧kin ļo̧k mour an RiNipai. Ium̧win im̧we eo an Anij, eo ej lo aolep men jān jinoin, eaar kōkaduik ļo̧o̧k ko an epepen ko, kālet bwebwenato ko, kōnono ko, im m̧akūtkūt ko me renaaj kar ļap aer jipan̄ kōj.
Kajjojo rijeje ro rekajoor an Bok in Mormon raar kam̧ool bwe raar jeje n̄an epepen ko ilju im jekļaj. Nipai eaar ba; “Anij Eaar kallim̧ur n̄an eō bwe men kein ij jeje naaj lilaļļo̧k n̄an ineō, jān epepen n̄an epepen” (2 Nipai 25:21). Jekab eo jatin, eo eaar bōk jikin, kar je ejja naan ko wōt: “Bwe [Nipai] eaar ba bwe bwebwenato eo kōn armej ro an aikuj in jeje ioon pileij ko jet, im bwe ij aikuj kōjparoki pileij kein im lilaļļ ļo̧k n̄an ro ineō, jān epepen n̄an epepen.” (Jekab 1:3). Enos im Jarom raar jim̧or kwaļo̧k bwe er barāinwōt raar jeje jab wōt n̄an armej ro aer ak n̄an epepen ko tok ālik (lale Enos 1:15–16; Jarom 1:2).
Mormon make eaar ba, “Aaet, Ij kōnono n̄an kom̧, kom̧ ro m̧ōttan im̧ōn Israel”( Mormon 7:1. Im Moronai, rijeje eo e im̧we āliktata, eaar lukkuun lo tōre im iien in ad. “Lo,” eaar ba, “Irooj eaar kwaļo̧k n̄an eō men ko reļļap im kabwilōn̄lōn̄ kōn men eo ejjab to enaaj itok, ilo raan eo n̄e men kein renaaj waļo̧k tok ilubwilijimi.
“Lo, Ij kōnono n̄an kom̧ āinwōt n̄e kom̧ar pād, im mekarta kom̧ ij jab. A lo, Jisōs Kraist eaar kwaļo̧k kom̧ n̄an eō, im ijeļā kōm̧m̧an ko ami.” (Mormon 8:34–35).
Eļan̄n̄e raar lo tōre in ad im kar kālet men ko me renaaj kar ļap tata tokjāer n̄an kōj, ejjab en̄in ej wāween eo jaikuj ekkatak kake Bok in Mormon ke? Jej aikuj kajjitōk ippād make aolep iien, “Etke Irooj eaar im̧we Mormon (ak Moronai ak Alma) n̄an kobaik menin ilo ļo̧o̧k in an? Ta katak eo Imaron̄ katak jān e me ejipan̄ eō mour ilo rainin im tōre in?”
Im ewōr waanjon̄ak ālkin waanjon̄ak kōn ekōjkan an kajjitōk eo naaj uwaak. N̄an waanjon̄ak, ilo Bok in Mormon jej lo juon jon̄ak eo n̄an m̧aanjabpopo n̄an Itok eo Kein Karuo. M̧ōttan eo eļap an bok in ej ioļapļap eo ilo jet iiō ko rem̧ooltļo̧k m̧okta wōt jān itok eo an Kraist n̄an America. Jān lukkuun in ekkatak kōn tōre jab in, jemaron̄ kālet etke jet raar kakkure ilo ekajet ko rekamijak me m̧okta jān itok eo An im ta eo kar bōkļo̧k n̄an ro jet n̄an jutak ilo tampeļ eo ilo āne eo Bun̄beļo̧k im karūm̧ļo̧k pāier ilo kijen ko an Pein im neen.
Jān Bok in Mormon jejeļā ekōjkan an rikaļoor ro an Kraist mour ilo tōre in tariņae ko. Jān Bok in Mormon jej lo nana in kōnājnej ittiņo ko rej kwaļo̧ki ilo pija im jekjek ko rem̧ool rekamijak. Ilo Bok in Mormon jej lo katak ko n̄an jerbale kaen̄tanaan im bun̄ jān tōmak. Jej katak eļap kōn ekōjkan kōm̧m̧ane jerbal in mijinede. Im eļapļo̧k jān jikin ko jet, jej lo ilo Bok in Mormon kauwōtata ko an arōk ko an m̧weiuk im jāān im door būruwōd ilo men ko an laļ in. Jabdewōt emaron̄ ke pere bwe bok in eaar n̄an kōj im bwe ilowaan jej lo kajoor eļap, kaenōm̧m̧an eo eļap, im kejparok eo eļap?
Un eo kein kajilu etke Bok in Mormon eļap an aorōk n̄an Armej ro Rekwojarjar ilo Raan kein Āliktata kar leļo̧k ilo ejja ennaan eo jān Rikanaan Joseph Smith kar kwaļo̧k m̧okta ļo̧k. Eaar ba, “Iaar jiron̄ em̧m̧aan ro jeiū im jatū rej tōl tōmak in bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.” En̄in ej un eo kein kajilu n̄an katak kake bok eo. Ejipan̄ kōj epaakeļo̧k Anij. Ejjab ke wōr juon men epād ilo buruōd me ekōņaan epaakeļo̧k Anij, n̄an erom ļo̧k āinwōt E ilo etetal ko ad raan otemjeļo̧k, n̄an en̄jake E ippān en jab jem̧ļo̧k? Eļan̄n̄e āindein, innām Bok in Mormon enaaj jipan̄ kōj kōm̧m̧ane āindein eļapļo̧k jān jabdewōt bok.
Ejjab kōnke Bok in Mormon ej katakin kōj m̧ool eo, ilo m̧ool ej kōm̧m̧ane. Ejjab kōnke Bok in Mormon ej kwaļo̧k kam̧ool kōn Kraist, ilo m̧ool ej kwaļo̧k kake, barāinwōt. Bōtaab ewōr juon men eļapļo̧k. Ewōr juon kajoor ilo bok in me enaaj jino ļapļo̧k ilo mour ko ami ilo iien eo kom̧ij jino katak kōn bok in em̧ool. Kom̧ naaj lo kajoor eļapļo̧k n̄an jum̧ae kapo. Kom̧ naaj lo kajoor n̄an joļo̧k m̧oņ. Kom̧ naaj lo kajoor n̄an pād wōt ilo iaļ eo erānin̄ im eaidik. Jeje ko rekwojarjar rej ņa etan naan in mour (lale D&C 84:85), im ejjeļo̧k jikin me eļapļo̧k an m̧ool jān in kōn Bok in Mormon. N̄e kom̧ij jino kwōle im maro kōn naan ko, kwonaaj lo mour ilo an jino an jako.
Rikanaan eo ad ejitōnbōro, Būreejrōn Marion G. Romney … kar kam̧ool kōn kōjeram̧m̧an ko me remaron̄ itok n̄an mour ko an ro renaaj riiti im ekkatak kōn Bok in Mormon. Eaar ba:
“Ijeļā bwe eļan̄n̄e, ilo im̧ōko im̧ōd, ro jinen im jemen renaaj riit jān Bok in Mormon kōn jar aolep raan, jim̧or erro make im ippān ajri ro nejier, jetōb eo eļap an bokin enaaj itok n̄an kobrak im̧ōk im̧ōd im aolep rej jokwe ilowaan. Jitbōn kautiej in enaaj ļapļo̧k; jeļā ņae doon im ļōmņak kōn doon naaj eddōkļo̧k. Jitbōn iakwelel eo enaaj ilo̧k. Ro jinen im jemen renaaj kapilōk ippān ajri ro nejier ilo iakwe im meletlet eļapļo̧k. Ajri ro enaaj ļapļo̧k aer bōk kuņaer im ajeļo̧k er n̄an kapilōk eo an ro jiner im jemer. Jim̧we enaaj ļapļo̧k. Tōmak, kōjatdikdik, im iakwe em̧ool—iakwe eo erreo an Kraist—enaaj ļapļo̧k ilo im̧ōko im̧ōd im mour ko ad, bōktok aenōm̧m̧an, lan̄lōn̄, im m̧ōņōņō.”3
Kaļim̧m̧ur kein—rej kōļapļo̧k iakwe im jokkun wōt eo ilo m̧weo, ļapļo̧k jeļā ņae doon ikōtaan juon jinen ak jemen im ajri eo, ļapļok mour in jetōb im jim̧we—rejjab kallim̧ur waan, bōtaab ej lukkuun ta kar meļeļe eo an Rikanaan Joseph Smith ke eaar ba Bok in Mormon enaaj jipan̄ kōj epaakļo̧k Anij.
Ro jeiū im jatū, Ij akweļap n̄an kom̧ kōn aolepen būruwō bwe kom̧in ļōmņak kōn kijejeto eļap aorōk eo an Bok in Mormon n̄an kom̧ make im n̄an aolepen Kabun̄ in.
Eļōnļo̧k jān 10 iiō ko rem̧ootļo̧k Iaar kōm̧m̧ane ennaan in ikkijien Bok in Mormon:“
Wāween ko an indeeo rej ke pād ilo uwaak eo ad n̄an bok in? Aaet, jim̧or n̄an kōjeram̧m̧an eo ad ak liakeļo̧k eo ad.
“Aolep Armej Ro Rekwojarjar ilo Raan kein Āliktata rej aikuj kōm̧m̧an bwe ekkatak bok in en juon kōttōpar ilo tōre in mour. Ijello̧kin ej likūt jetōb eo an ilo kauwōtata im kowaane ta eo emaron̄ kar leļo̧k ippān doon ilo jetōb im meletlet n̄an aolepen mour eo an. Ewōr juon oktak ikōtaan juon rioktak eo ej ekkal ioon dekā an Kraist kōn Bok in Mormon im ej pād wōt ilo aen in debdeb eo, im juon eo ejjab”4
Ij bar kapen naan ko n̄an kom̧ rainin. Jān jab pād wōt ium̧win liakeļo̧k, kōn kaen̄taanan im ekajet eo an, kōn kōjaorōk menin letok in eļap im kabwilōn̄lōn̄ Irooj eaar letok n̄an kōj. Ijello̧kin, jān wiini kalim̧m̧ur ko rej pād ippān kōn kaorōki ilo būruwōd.
Ilo Doctrine and Covenants, section 84, eoon 54 n̄an 58, jej riit
Im buruōmi ilo iien ko etto raar marok kōn wōt jab tōmak, im kōnke kom kar kowaan me ko kom kar būki—
Eo jua im jab tōmak kar boktok n̄an aolepen kabun̄in ium̧win kakkure.
Im kaen̄taan in eaar pedwaane ajri ro nejin Zaion, men̄e aolepāer.
Im renaaj aikuj pād wōt ium̧win kaen̄tanaan in m̧ae iien rej ukweļo̧k im kemejmej bujen eo ekāāļ, men̄e Bok in Mormon im kien ko m̧okta ko Eaar liļok n̄an er, jab n̄an ba wōt, ak n̄an kōm̧m̧ani ekkar n̄an men eo Eaar jeje—
Bwe ren maron̄ kwaļo̧k tok leen eo ejejjet n̄an aelōn̄ in kiin̄ eo an Jemed, n̄e jaab ijo naaj pād wōt juon kaen̄tanaan im juon ekajet n̄an an lutōkleplep ioon ajri ro nejin Zaion.
Jān kar kweilo̧k eo eļap ļo̧k, em̧ōj Aō bōk eļōn̄ leta ko jān Armej ro Rekwojarjar, jim̧or dik im rūtto, jān aolepen laļ in ro raar bōk kōttōpar eo n̄an riiti im ekkatak kōn Bok in Mormon.
Iaar laudin̄din̄ kōn bwebwenato ko aer kōn ekōjkan an mour ko aer kar oktak im ekōjkan aer kar epaakeļo̧k Irooj āinwōt juon uwaak in kalim̧m̧ur eo aer. Naan in kam̧ool kein raiboojoj rar bar kapen n̄an eō kōn naan ko an Rikanaan Joseph Smith bwe Bok in Mormon ej lukkuun m̧ool “dekā in jabōn em̧ n̄an tōmak in ad” im bwe juon em̧m̧aan im kōrā renaaj “epaakeļok Anij jān an mour ekkar n̄an katak ko ie, jān jabdewōt bok ko jet.”
En̄in ej jar eo aō, bwe Bok in Mormon en maron̄ erom dekā in jabōn em̧ an mour ko ad.
Ewōr juon kajoor ilo bok in eo enaaj jino ļapļo̧k ilo mour ko ami ilo iien eo kom̧ij jino juon ekkatak em̧ool kōn bok in.