Enaan eo an Būreejtōnji eo Kein Kajuon
Kalim̧m̧ur ko Raorōk an Bok in Mormon
Elōn̄ iiō ko remootļo̧k Iaar jutak iturin jikin kiki eo an juon jemen eo em̧m̧an ded ilo iien eo epaak an mej. Kōrā eo ippān im ajri ro ruo nejier raar jutak iturin. Eaar bōk peiū ilo pein im, kōn juon kajjitōk, eaar ba, “Bisop, Ijeļā Ij pojak in mej. Jiron̄ eō ta eo enaaj waļo̧k n̄an jetōb eo aō n̄e Inaaj mej.”
Iaar kōm̧m̧ane juon jar ippa make kōn tōl an lan̄ im kar kile ioon jikin kiki eo an tebōļ juon kape in triple combination. Iaar m̧aal m̧anļo̧k n̄an bok eo im elōn̄ peij ko. Ejjab to Iaar lo bwe ewōr aō, kōn ejjeļo̧k kijejeto ilo m̧ōtta eo aō, kar bōjrak ilo 40th jepta in Alma ilo Bok in Mormon. Iaar riiti naan ko n̄an e:
“Lo, kar kwaļo̧k n̄an eō jān juon enjeļ, bwe jetōb ko an aolep armej, ilo wōt iien eo rej ilo̧k jān ābwninnin kanniōk in, … rej ilo̧k n̄an jikier n̄an Anij eo eaar leļo̧k n̄an er mour.
“Im … Jetōb ko an ro raar jim̧we naaj bōk er ilo juon mejatoto in m̧ōņōņō, eo ņa etan paradise, juon mejatoto in kakkije, juon mejatoto in aenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj” (Lale Alma 40:11–12).
Ke Iaar wōnm̧aanļo̧k wōt im riit kōn Jerkakpeje, juon meram eaar itok n̄an iturin mejen likao in im kōn juon ettōn̄ dikdik ewaļo̧k ilo tien. Ke Iaar kōjem̧ļo̧k loļo̧k eo Aō, Iaar ba bar-iakwe n̄an baam̧le in em̧m̧an.
Tokālik Iaar loe kōrā eo im ajri ro ilo ilomej eo. Ij ļōmņak likļo̧k n̄an jotan eo ke likao eo eaar kajjitōk kōn m̧ool eo im, jān Bok in Mormon, kar ron̄ uwaak eo n̄an kajjitōk eo an.
Jān Bok in Mormon eitok jet kalim̧m̧ur ko raorōk, ekoba kalim̧m̧ur ko kōn aenōm̧m̧an, anemkwoj, im kōjeram̧m̧an ko elan̄n̄e jenaaj “wōr jerbal n̄an Anij eo an āne in, eo ej Jisōs Kraist” (Ether 2:12).
Jān peij ko an ej itok kalim̧m̧ur eo kōn “m̧ōņōņō eo ejjeļo̧k jem̧ļo̧kin” n̄an “ro me raar kejparok kien ko an Anij. Bwe lo, rej jeram̧m̧an ilo aolep men ko otemjeļo̧k, jim̧or ilo kanniōk im ilo jetōb” (Mosaia 2:41).
Jān peij ko an ej itok kalim̧m̧ur eo kōn “m̧ōņōņō eo aer epen meļeļe kake” n̄an ro rej erom̧ “kein jerbal ilo pein Anij” n̄an bōktok ļaddik ro im leddik ro Nejin raorōk (Alma 28:8; 29:9).
Jān peij ko an ej itok kalim̧m̧ur eo bwe jepeļļo̧k eo an Israel naaj bar kobaiki—juon jerbal eo jej bōk kuņaad ie kōn kijejeto ko an mijenede eļap ipaļaakin laļ in (lale 3 Nipai 16; 21–22).
Jān peij ko an ej itok kalim̧m̧ur eo bwe ilo ad jar n̄an Jemed ilo āt eo ekwojarjar etan Jisōs Kraist, baam̧le ko ad renaaj jeram̧m̧an (lale 3 Nipai 18:21).
Jān ekkatak kōn peij ko an ej itok kūrm̧ool eo an kalim̧m̧ur eo kanaan kake bwe “Enaaj wōr ej itok n̄an mour ko ami im n̄an im̧ōko imōmi juon ļapļo̧k in Jetōb eo an Irooj, juon kajoorļo̧k in kōttōpar n̄an etetal ilo pokake kien ko An, im juon kajoorļo̧k in naan in kam̧ool kōn Nejin Anij eo em̧ool ej mour.”1
Im jān peij ko ilo Bok in Mormon ej itok kalim̧m̧ur eo an Moronai bwe kōn jar, bōro em̧ool, im tōmak ilo Kraist, jemaron̄ jeļā m̧ool eo an kalim̧m̧ur kein “jān kajoor eo an Jetōb Kwojarjar” (lale Moronai 10:4–5).
Ippān lo̧k rikanaan ro jet ilo raan-kein āliktata, Ij kam̧ool kōn m̧ool eo an menin “bok eo ejim̧we tata iaan bok otemjej ioon laļ,”2 em̧ool Bok in Mormon, bar juon kalim̧m̧ur kōn Jisōs Kraist. Ennaan eo an ej erakļo̧k n̄an laļ in im ej bōktok ro rej riit n̄an juon jeļā kōn m̧ool eo. Ej aō naan in kam̧ool bwe Bok in Mormon ej ukōt mour ko. Kōm̧m̧an bwe kōjwōj en riiti im bar riiti. Im jān maron̄ lan̄lōn̄ n̄an kwaļo̧k naan in kam̧ool ko ad kōn kalim̧m̧ur ko raorōk ippān aolep ajri ro nejin Anij.
Pija jen Christina Smith