O Fesili Masani e uiga i le Tusi a Mamona

Pe mai i uo, aiga, o e fia iloa moni, po o e e tetee, tatou te maua uma lava ni fesili e uiga i le Tusi a Mamona. O tali nei e ono i ai.

O le a le Tusi a Mamona, ma pe faapefea ona faatusatusa i le Tusi Paia?

O Le Tusi a Mamona o se tusi o tusitusiga paia e pei foi o le Tusi Paia. O se tasi molimau ia Iesu Keriso.¹ O le Tusi Paia e matele lava i le talanoaina o soifuaga ma aoaoga a Isaraelu anamua. O le Tusi a Mamona o loo i ai tusitusiga a ni vaega o tagata na malaga mai i Amerika, e aofia ai se aiga na tuua Ierusalema i le 600 T.L.M.. O nei tagata na tupuga mai foi i le aiga o Isaraelu. O lea, o le Tusi Paia ma le Tusi a Mamona sa tusia e tagata o le tupuaga e tasi ae i ni itu eseese o le lalolagi.

E pei foi o le Tusi Paia, o le Tusi a Mamona e sili atu nai lo na o se talafaasolopito. O loo i ai “le atoatoa o le tala lelei a Iesu Keriso” (MFF 20:9): o aoaoga, aoaoga faavae, ma valoaga e molimau i le Atua le Tama ma Lona Alo, o Iesu Keriso.

Sa faamalamalama mai e le Perofeta o Iosefa Samita e faapea, o le Tusi a Mamona “ua tau maia ia i tatou o lo tatou Faaola na faaali mai Ia lava i luga o lenei konetineta [o Amerika] ina ua mavae Lona toetu; na Ia faatuina le Talalelei iinei i lona atoatoa, ma le tamaoaiga, ma le mana, ma le faamanuiaga; na i ai o latou Aposetolo, Perofeta, Faifeau, Aoao, ma Evagelia, o le faatulagaga lava e tasi, le perisitua e tasi, o sauniga, mea foaifua, mana, ma faaaliga e tasi, e pei ona aeae ai le konetineta i sasae; … na poloaiina le toe perofeta o [perofeta] na soifua faatasi ma i latou e tusitusia se otootoga o a latou valoaga, o talafaasolopito, ma isi, na natia i le eleele, ma e tatau ona aumaia ma tuu faatasia ma le Tusi Paia mo le faataunuuina o faamoemoega o le Atua i aso e gata ai.”²

E suesue e tagata o le Ekalesia le Tusi Paia ma le Tusi a Mamona. O le mea moni, o le lua mai tausaga e fa o a tatou mataupu aoaoina i le Aoga Sa e tuuto atu i le suesueina o le Tusi Paia. (Mo nisi autu e uiga i lenei autu, tagai i itulau 16, 24, ma le 52 o le lomiga lenei.)

O ai na tusia le Tusi a Mamona?

O perofeta anamua, e pei o Nifae, Iakopo, Mamona, ma le atalii o Mamona o Moronae, o ona tusitala autu ia. O Mamona na tuufaatasia ma otootoina faamaumauga na tusia e perofeta e uiga i o latou talafaasolopito, valoaga ma aoaoga. Sa ia faaaofia ai foi nisi o ona lava aafiaga. Sa vaneina e Mamona lenei faamaumauga i fusi uamea—e lanu auro—lea e masani ona ta’ua o papatusi auro.

Ina ua maliu Mamona, ona faauma ai lea e Moronae ia faamaumauga ma natia ai i se mauga e teuina ai mo o tatou aso. I le 1823 na faaali mai ai Moronae o se agelu ia Iosefa Samita ma faasino atu ia te ia le mea sa natia ai le papatusi. O le fa o tausaga mulimuli ane, na faatagaina ai Iosefa e aumai ia papatusi. Sa ia “faaliliuina ia faamaumauga e ala i le meaalofa ma le mana o le Atua” i le gagana Peretania mai le gagana anamua sa tusia ai.³ Ona ia lolomiina lea ma tufatufa atu le Tusi a Mamona. (Mo nisi faamatalaga i lenei autu, tagai i itulau 22 ma le 72 o le lomiga lenei.)

O le a le mea na tupu i le uluai faamaumauga—o papatusi auro?

Na aumai e Iosefa Samita ia papatusi ia Setema 1827 ma sa i ai pea ia te ia seia oo i le tautotogo o le 1829. Ina ua ia tusia lana talafaasolopito i le 1838, sa ia faamatalaina ai le mea na tupu i papatusi: “Sa oo ina sau le avefeau [Moronae] e avea ia mea e tusa ma le tonu sa faia, ma sa ou tuuina atu ia mea ia te ia; ma o loo i ai nei ia te ia ia mea e oo mai i le aso, le aso lua o Me, le tausaga e tasi le afe valu selau tolu sefulu ma le valu” (Iosefa Samita—Talafaasolopito 2:60).

O ai isi na vaai i papatusi auro?

E faaopoopo atu ia Iosefa Samita, e i ai nisi alii ma tamaitai sa vaai i papatusi ma molimau atu i le i ai o nei papatusi. E faapitoa lava i ni tamalii e toasefulutasi, ua taua o Molimau e Toatolu ma Molimau e Toavalu, na faamauina a latou molimau na vaai i papatusi ma, i le tulaga o Molimau e Toavalu, sa latou uuina ia papatusi. O a latou molimau o loo i ai i le pito i luma o kopi taitasi o le Tusi a Mamona.

O nei tamalii ua avea o ni molimau maumaututu o le Tusi a Mamona, e ui lava o nisi o i latou “sa i ai se taimi na tetee ai ia Iosefa,” e pei ona faamautu mai e Elder Jeffrey R. Holland o le Korama a Aposetolo e Toasefululua. Ae ui i lea, sa latou “molimau seia oo lava ina maliliu, na latou vaai i se agelu ma sa latou uuina ia papatusi. ‘Sa faaalia ia mea ia te i matou i le mana o le Atua, ae le o tagata,” na latou tautino mai ai. ‘O le mea lea, ua matou iloa ai ma le mautinoa e moni le galuega.’”⁴

Pe o i ai se faamaoniga faitino e moni le Tusi a Mamona?

E ui lava e le faavaea o tatou faatuatua i faamaoniga faitino, ae o loo i ai faamaoniga o le gagana, o mea na tutupu i aso ua mavae, ma suesuega o aganuu ma toega o mea sa i ai anamua mo le Tusi a Mamona. Mo se faataitaiga, o le manatu o le tusitusi i papatusi apamemea sa ulagia foi, ae o tausaga lata mai nei, e tele ni faataitaiga o tusiga paia i luga o apamemea na maua—o nisi o papa apamemea na natia i atigipusa maa—.

Ua matauina e i latou e tomai faapitoa i gagana ia upu ma soafuaiupu o le Tusi a Mamona e ese lava i le gagana Peretania ae e fetaui lelei lava lona uiga i le faa-Eperu ma gagana e faatatau i ai, sa iloa e tagata o le Tusi a Mamona—gagana sa le’i iloa e le taulealea o Iosefa Samita.

Peitai o nei ituaiga o faamaoniga e le o mea ia e faatalitonuina i tatou i le moni o le Tusi a Mamona. O se tulaga o le faatuatua ma faaaliga faaletagata lava ia.

E mafai faapefea ona ou iloa e moni le Tusi a Mamona?

Na pau lava le auala mautinoa e te iloa ai mo oe lava, e ala lea i le mana o le Agaga Paia. O le mataupu mulimuli o le Tusi a Mamona o loo valaaulia ai soo se tasi e faitau i ai, mafaufau loloto i ai, ma manao faamaoni ia iloa pe moni, e ole atu i le Tama Faalelagi i le suafa o Iesu Keriso. O i latou e faia lenei mea o le a latou iloa i le mana o le Agaga Paia e moni le tusi (tagai i le Moronae 10:3–5). E faitau miliona tagata o le Ekalesia ua tatalo ma iloa e ala i le molimau a le Agaga Paia ua moni le Tusi a Mamona. (Mo nisi faamatalaga i lenei autu, tagai i itulau e 4, 60, ma le 80 o le lomiga lenei.)

Ua ou fenumia’i i le Faaaliga 22:18–19, lea e fai mai e aua nei faaopoopoina se isi mea i le afioga a le Atua.

O le tasi o o tatou talitonuga autu o le, na faaali mai i taimi uma e le Atua ia Lona finagalo i Lana fanau i le lalolagi ma o le a [Ia] faaalia mai pea. Tatou te talitonu o le Tusi Paia o le afioga lea a le Atua, ae tatou te le talitonu ua i ai uma faaaliga na tuuina mai pe o le a tuuina mai e le Atua i Ana perofeta. E oo lava i aso nei, o loo faaauau pea ona Ia faaalia mai Lona finagalo e ala i perofeta ma aposetolo soifua, o le faavae lea o Le Ekalesia a Iesu Keriso o le Au Paia o Aso e Gata Ai (tagai i le Efeso 2:20).

O le taimi na tusia ai e le Aposetolo o Ioane le tusi o Faaaliga, sa le o le tusi mulimuli lea o le Tusi Paia. Sa le’i tuufaatasia foi le Feagaiga Tuai ma le Feagaiga Fou i se tusi e tasi o tusitusiga paia—lea ua taua nei o le Tusi Paia—seia oo i le seneturi lona tolu T.A.

I le ala lava lea e tasi, o loo fai mai ai le Teuteronome 4:2 e aua nei o tatou faaopoopoina se mea i upu a Mose. Ioe, o lenei fuaitau, o loo i le amataga o le Feagaiga Tuai, e le faaleaogaina ai le isi vaega atoa o le Tusi Paia. Sa lei faatatau Mose po o Ioane i le suia o se voluma sa le’i i ai i lena vaitaimi; ae sa laua lapatai mai e uiga i le suia o aoaoga moni o le talalelei.

O le Tusi a Mamona, lea o loo i ai le atoaga o le talalelei, e le o suia le afioga a le Atua ae o loo ona faamautuina. (Mo nisi faamatalaga i lenei autu, tagai i itulau 24 ma le 38 o le lomiga lenei.)

Na ou faalogo na faia ni suiga i le Tusi a Mamona talu mai lona uluai lomiaina. O a mea na suia ae aisea?

O le tali i lenei fesili e faalagolago lea i le i ai o sina malamalama i le faagasologa o le faaliliuga ma le lolomiga o le Tusi a Mamona.

1. A o faaliliuina e Iosefa Samita ia papatusi auro e ala i le mana o le Atua, sa ia faitauina atu ia upu i se tusiupu. Sa i ai nisi o taimi na faia ai ni mea sese a tusiupu i le sipelaga ma le kalama a o latou tusia ana upu. Mo se faataitaiga, i le 1 Nifae 7:20 o upu “were sorrowful” sa tusia “ware sarraful.” E le faapea sa le o ni tagata atamamai ia tusiupu, ae sa le’i faalaugatasiaina le sipelaina o upu i lena vaitaimi.

2. Ona kopiina lea o le uluai kopi na tusilimaina o le faaliliuga e fai ai se kopi fou e tusilima e ave e lolomi. O le tulaga lenei, ua uma ona faasa’oina ai nisi o mea sese i le sipelaga ma le kalama, ma faaopoopo i ai faailoga i upu ma fuaiupu. Peitai sa maua ai foi nisi o mea sese fou i le sese ona kopiina o upu.

3. Sa fai e le lomitusi le mea sili sa ia mafaia e faatulaga lelei ai le lolomiina. Ae peitai, sa i ai taimi na ia faia ai nisi mea sese. Mo se faataitaiga, i le Alema 57:25 sa sese ai lona faitauina o le upu “joy” ae ta i ai le “foes.”

4. Sa silasila ma le totoa le Perofeta o Iosefa Samita i lomiga muamua e tolu o le Tusi a Mamona, ma sa faaauau pea ona fesoasoani i nai suiga ma fetuunaiga laiti. Ae ana le faia isi lomiga mulimuli ane, e le maua ai isi mea sese. O le 1981 na faatoa faasa’oina ai se mea sese a le lomitusi i le Alema 16:5, ma sui ai le “whether” i le “whither”—na ogatasi ai ma le faaliliuga muamua lava e pei ona sa faaliliuina ai e le Perofeta mai papatusi auro.

5. O isi suiga na aofia ai se mataupu fou ma le vaevaega o fuaiupu ma vaefaamatalaga ma mau fefaasinoai.

Faasoa atu se Kopi

E tusa lava po o a fesili e fai e tagata e uiga i le Tusi a Mamona, ae o le tusi lava ia o lona talipupuni sili lava lea. E mafai ona e molimau atu e uiga i le tusi, faasoa atu se kopi, ma valaaulia isi e tatalo e uiga i ai mo i latou lava. Afai e i ai i se tagata se loto faamaoni ma le manao moni ia iloa pe moni le tusi, “[o le a] faaalia [e le Alii] le tonu i ai ia te outou i le mana o le Agaga Paia” (Moronae 10:4).

Ata na tusia e Robert Casey