Auala e Suesue ai le Tusi a Mamona

Saunia e Elder D. Todd Christofferson

O Le Korama a Aposetolo e Toasefululua

Na faamatala auiliili mai e Peresitene Ezra Taft Benson (1899–1994) i le luasefulu lima tausaga ua mavae ia “pogai taua e tolu e tatau ai i le Au Paia o Aso e Gata Ai ona latou avea le suesue ma le aoao i le Tusi a Mamona ma galuega o le olaga.”¹ O mafuaaga nei:

Muamua, o le Tusi a Mamona o le maaauau o la tatou tapuaiga—o le maaauau o la tatou molimau ia Iesu Keriso, a tatou aoaoga faavae, ma la tatou molimau.
Lona lua, o le Tusi a Mamona na tusia mo o tatou aso.
Lona tolu, ua fesoasoani le Tusi a Mamona tatou te faalatalata atili atu ai i le Atua.

Ua fautuaina mai ai foi e nei mafuaaga mo le suesueina o le Tusi a Mamona nisi o auala tatou te ono faia i le suesueina o lenei tusitusiga paia tulaga ese.

Maaauau o La Tatou Tapuaiga

Talu ai o le Tusi a Mamona o le maaauau o la tatou molimau ia Keriso ma le atoaga o Lana talalelei, e taua i la tatou suesuega le tuuina atu o se vaaiga faapitoa i le tele o aoaoga ma molimau e uiga i le Faaola o loo aofia ai. O nisi ua faia lenei tulaga e ala i le aumaia o se kopi fou, taugofie o le Tusi a Mamona ma maka uma ia fuaiupu o loo faasino po o aoao mai e uiga i le Faaola, Lana galuega, ma Lana misiona. E aumaia uma e lenei mea se molimau loloto ia Iesu Keriso o le Alo o le Atua ma se amanaia fou i mea na Ia faatinoina ma o loo faaauau pea ona faia mo i tatou.

Tusia mo o Tatou Aso

Na tusitusi ia tusitala o le Tusi a Mamona ma mafaufau i tupulaga faiae, aemaise lava i aso e gata ai. I le otootoina o faamaumauga a sa Nifae, na fai mai ai Mamona na le mafai ona ia tuuina i ai le “tasi vaeselau o mea uma” (tagai i le 3 Nifae 5:8; tagai foi i le O Upu a Mamona 1:5). Na fai mai Moronae, “Ou te tautala atu ia te outou e peiseai ua tatou faatasi, a e leai. Faauta foi, ua faaalia mai outou ia te au e Iesu Keriso, ou te iloa foi a outou amio” (Mamona 8:35). Na tusia e nei tusitala e toalua faapea ma isi, e ala i musumusuga, mea o le a sili ona faamanuia ai i tatou i nei aso e gata ai.

O lea la e ao ona tatou suesue ai ma mafaufau i fesili nei: “Aisea na aofia ai lenei mea? E faapefea ona faatatau lenei mea i lenei vaitaimi ma au?” Mo se faataitaiga, sa matauina e Peresitene Benson, o le Tusi a Mamona ua tatou maua ai se mamanu mo le sauniaina mo le Afio Mai Faalua o le Faaola. Ua tatou aoao i auala na ola ai soo o Keriso i taimi o taua, taulimaina o sauaga ma le liliuese, faia o galuega faafaifeautalai, ma tali atu i tulaga lamatia o le manao i mea o le lalolagi.² Faapei ona faia e Nifae, pe a tatou suesue, e ao ona tatou “faatusa” ia tusitusiga paia ia i tatou lava—o lona uiga, taumafai ia iloa le auala e faaaoga ai mea na tatou maua i le Tusi a Mamona (tagai i le 1 Nifae 19:23).

Faalatalata Atili atu ai i le Atua

Na toe sii mai i le saunoaga a Peresitene Benson: “Ua le na o le faapea ua aoao mai e le Tusi a Mamona i tatou i upu moni, e ui lava o le mea moni lena. E le na o le faapea ua molimau mai le Tusi a Mamona ia Keriso, e ui foi ina tonu lena mea. Ae e i ai se mea e sili atu. O loo i ai se mana i lena tusi o le a amata ona tafe mai i o outou olaga i le taimi tou te amata ai ona faitau ma suesue ma le loto i ai i lena tusi.³

E moni, o le suesueina o le Tusi a Mamona e valaaulia ai le Agaga, ma o le Agaga o le auala mai lea o faaaliga. O loo fautuaina mai ai ina ia tatou suesue i se auala o le manatunatu, tuu atoa i ai le mafaufau—mafaufau loloto, tatalo, ma atonu o le tusitusi o ni faamatalaga a o tatou faitau. O lenei mea tatou te mauaina ai se malamalama ma le atamai faaopoopo, e uiga i mea o loo tatou suesueina faapea ma isi mea. O nisi taimi e aoga le faitau atoa o le Tusi a Mamona i se taimi puupuu lava ina ia maua ai le aano o le tala ma le savali. Ae e masani lava ona sili atu le taulai atu o le tuutoina o se taimi talafeagai i aso taitasi e suesue ai le tusi e ese mai le faitauina o fuaiupu ma mau ua faatulagaina i le aso.

Fesoasoaniga i Suesuega

Ua faamanuiaina i tatou i le taimi nei i le mauaina o le tele o punaoa e mafai ona fesoasoani i la tatou suesuega o le Tusi a Mamona. O nisi ua tuufaatasia ma a tatou tusitusiga paia—o le Taiala mo Autu, Lomifefiloi o le Tusi Paia, ma le faasino autu i tusitusiga paia i le gagana Peretania ma le Taiala i Tusitusiga Paia i isi gagana. Ua i ai foi i lomiga o tusitusiga paia a le Au Paia o Aso e Gata Ai le tele o vaefaamatalaga ma mau faasino fesootai i itulau uma.

O isi fesoasoaniga mo suesuega i fomu ua lomia e aofia ai Taiala Suesue a Tagata o le Vasega o le Aoga Sa, Taiala Suesue a Tamaiti Aoga o le Seminare, ma le Tusi Lesona a Tamaiti Aoga o le Inisitituti. O se mea fou i lo tatou taimi ma tupulaga le faateleina o le aofaiga o punaoa faaeletonika, lea o loo faamatalaina o se faamatalaga faaopoopo i le itulau e 31.

Meafaigaluega mo le Liua

O le Tusi a Mamona o se oa e le mafaatusalia ma o se meafaigaluega mo le liua na mamanuina e le Alii ma tuuina mai mo la tatou tisipenisione. Ou te iloaina o se faavae lea o la’u lava molimau ia Iesu Keriso, i le valaauga faaperofeta o Iosefa Samita, ma Le Ekalesia a Iesu Keriso o le Au Paia o Aso e Gata Ai e avea “ma malo o le Alii ua toe faatuina i le lalolagi.”⁴ Ou te fiafia e tuufaatasia la’u molimau ma Iesu Keriso ma faapea “e pei o loo soifua lo outou Alii ma lo outou Atua e faapea foi ona moni lava ia” (MFF 17:6). Ia faateleina lou liua ma taitaiina oe i se ala sa’o i le ola e faavavau e ala i au suesuega o le Tusi a Mamona i le olaga atoa.

O Tusitusiga Paia i luga o le Initoneti ma Telefoni Feaveai

O se faaopoopoga i le faafaigofieina o sailiiliga o upu autu faavavave ma mau faasino fesootai, ua tuuina atu nei ni nai auala fou i le faaaogaina o tusitusiga paia i luga o le initoneti i le (scriptures.lds.org) ma telefoni feaveai i le (mobile.lds.org) e mafai ona fesoasoani ia te oe mo au lava suesuega:

O La’u Api o Suesuega (notebook.lds.org)

Ua ofoina atu e le api suesue i luga o le initoneti le tele o punaoa atonu na e faaaogaina i suesuega masani—faailoga, tusitusia o faamatalaga, ma mau faasino, mo se faataitaiga—ae e mafai ai ona e faaaogaina ma sefeina faaeletonika. E le gata i lea, e mafai ona e “faailogaina” pe faavasega au tusitusiga ma isi anotusi pe a maua. Ona e te alu i totonu o Lau Api o Suesuega e faaaogaina ai lau Faitotoa o le AAG, o le a tumau pea ona faafouina ia suiga o lau api e tusa lava po o le a le tele o faiga eseese e te faaaogaina e alu ai i totonu. O nei meafaigaluega e te mafai ai ona fatuina sau oe lava faila e teu ai faamaumauga tulaga ese mo le suesueina ma le aoaoina o le talalelei.

Scripture Formats and Languages (scriptures.lds.org)

Ua maua nei ia anotusi faaeletonika ma lipine faalogologo o tusitusiga paia i le LDS.org ma mo masini feaveai i le tele o gagana ma o loo faagasolo foi i le tele foi o isi gagana.

E le gata i le faitauina ma le faalogologo i luga o le initoneti, ae ua mafai foi ona e siiina mai ma faaaogaina le otio, ePub, ma faila PDF e le faaaogaina ai le initoneti. O saite fou o le Ekalesia mo tusitusiga paia ua fesoasoani e faafaigofie ai le fefaasoaai o fuaitau ma faamatalaga patino ma isi e ala i i-meli ma punaoa lautele o faasalalauga.

O tusitusiga paia i le LDS.org o loo ua avanoa nei i gagana e 21; o le faaaogaina o masini feaveai o loo ua avanoa nei pe tusa ma le 10 gagana, e fuafua lava i le polokalama.

LDS Scripture Citation Index (scriptures.byu.edu)

O lenei punaoa, na mamanuina i le gagana Peretania e ni faiaoga se toalua a le Iunivesite a Polika Iaga, e fesootai ai fuaiupu o mau i faamatalaga mai perofeta ma aposetolo o nei ona po. Mo se faataitaiga, atonu e te fia iloa pe o ai na taua le 1 Nifae 3:7 i le konafesi aoao. Kiliki i le sootaga o le Tusi a Mamona i le itu agavale o le lau ma faasolo i lalo i le 1 Nifae 3; o iina o le a e maua ai le tali.

Faasino Autu o Ulutala o le Konafesi Aoao (conference.lds.org)

O le isi punaoa e fesoasoani ia te oe e fesootai ai ia suesuega faatusitusiga paia ma upu a perofeta soifua, conference.lds.org o loo i ai lisi ua faatatau i ulutala mo konafesi aoao taitasi. Mo se faataitaiga, afai o e suesueina le Togiola i tusitusiga paia, e mafai ona e mauaina ni lauga se lima o loo talanoaina lena ulutala i le konafesi ia Aperila 2011.

Suesue Pea ina ia Aoao ai Pea

O le taimi muamua lava na ou faitau ai i le Tusi a Mamona ou te le’i lotu. Sa 16 ou tausaga, ma sa ou faitauina i le vaiaso. Ina ua lata i le faaiuga o la’u faitauga, sa ou maua se fuaiupu o loo faapea mai afai o se ekalesia a Keriso, ia faaigoa i Lona igoa (tagai i le 3 Nifae 27:8). I le taimi lava lena na tafe ifo ai loimata i o’u alafau. Sa ou iloaina e moni le Tusi Mamona, ma sa ou filifili loa e papatiso.

Ina ua uma lo’u papatisoga sa ou toe faitauina le tusi, ae o le taimi la lenei sa ou aumaia se peni maka ma maka ai fuaiupu po o fasi fuaitau na uunaia ai a’u. I nai faitauga mulimuli ane sa ou toe faia foi faapea, ae sa ou faaopoopoina i ai ni faamatalaga i autafa o fuaiupu na faailogaina. O le isi taimi na sosoo ai sa ou faaopoopoina i ai ni mau faasino e fesootai ma mau, pe mai le Tusi a Mamona po o isi tusitusiga faavae.

Ona oo lea i le amataga o se tasi tausaga, sa ou faatauina se kopi fou o tusitusiga paia, talu ai ua tumu i faailoga au tusi ia na i ai, aemaise ona sa ou faaaogaina i la’u misiona faatasi ai ma le sauniaina o le tele o lesona. O le taimi la lenei sa faatatau au suesuega ma le makaina i ulutala. Sa ou pikiina se lanu i ulutala faapitoa—mo se faataitaiga, lanu moli mo le faatuatua, lanu meamata mo le salamo, ma faapena ai lava.

O le faaauau pea ona suesue i le Tusi a Mamona ma faaaoga i ai nei metotia eseese, sa ou iloa ai e le lava le tasi o le faitauina o le Tusi a Mamona. Tatou te aoaoina i lea upu ma lea upu a o faaauau pea ona tatou suesue. Ua ou iloaina foi po o le a lava le tele o taimi ua uma ai ona tatou faitauina, e i ai lava pea se mea tatou te faapea mai ai, “Aisea na ou le iloa ai lena mea muamua? Masalo sa i ai lava iina.”

O tusitusiga paia—aemaise lava le Tusi a Mamona—o loo aoao mai ai i tatou e uiga ia Iesu Keriso faapea ma lo tatou Tama o i le Lagi. O le suesueina o tusitusiga paia ua ou latalata atili atu ai ia i La’ua.

Cristina Vergara Ramírez, Chile

Ata na tusia e Craig Dimond