Miti a Liae
Pipiimau i le Ai Uamea
O le autu faamalumalu o le Tusi a Mamona—o loo valaauliaina ai tagata uma e o mai ia Keriso—o le faatumutumuga lea o le faaaliga na vaaia e Liae.
Ou te fiafia i le Tusi a Mamona. O nisi o uluai mea ou te manatua i le talalelei o le faitau mai lea e lo’u tina o le Book of Mormon Stories for Young Latter-day Saints [Tala o le Tusi a Mamona mo le Autalavou o le Au Paia o Aso e Gata Ai], na tusia e Emma Marr Petersen. O na aafiaga faatamaitiiti ma i le taimi o suesuega ma tatalo patino faifai pea i le olaga atoa, na tuuina mai ai i taimi uma e le Agaga Paia se molimau i lo’u loto o le Tusi a Mamona o le afioga lea a le Atua.
Ou te molimau atu o le Tusi a Mamona o se tasi molimau ia Iesu Keriso. Ou te iloa na faaliliuina le Tusi a Mamona e le Perofeta o Iosefa Samita e ala i le mana o le Atua. Ma sa ou molimauina o le Tusi a Mamona o “le tusi silisili ona sa’o i tusi uma lava o i le lalolagi, ma o le maa’au’au o la tatou tapuaiga, ma e sili atu ona latalata le tagata i le Atua e ala i le usitaia o mataupu [o le Tusi a Mamona], nai lo se isi lava tusi.”1
O Faailoga Autu i le Miti a Liae
O le taua o le faitauina, suesue, sailiili, ma le mafaufau lautele i mau aemaise lava le Tusi a Mamona lea o loo faamamafa mai ai le tele o elemene i le faaaliga na vaaia e Liae e uiga i le laau o le ola (tagai i le 1 Nifae 8).
O le elemene tutotonu o le miti a Liae o le laau o le ola—o se faaaliga o le “alofa o le Atua” (tagai i le 1 Nifae 11:21–22). “Aua na faapea lava ona alofa mai o le Atua i le lalolagi, na Ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16). O le mea lea, o le fanau mai, soifuaga, ma le taulaga togiola a Iesu Keriso o ni faailoga vaaia lea o le alofa o le Atua mo Lana fanau. Faapei ona molimau mai Nifae, o lenei alofa ua “sili ona manaomia ai i mea uma” ma, e pei ona folafola mai e agelu i lana faaaliga, “fiafia silisili i le agaga” (1 Nifae 11:22–23; tagai foi i le 1 Nifae 8:12, 15). O le mataupu 11 o le 1 Nifae ua tuuina mai ai se faamatalaga auiliili o le laau o le ola e avea ma se faatusa mo le soifuaga, galuega, ma le taulaga a le Faaola—“le faamaulalo o le Atua” (1 Nifae 11:16).
O le fua o le laau o se faatusa lea mo faamanuiaga o le Togiola. O le ‘ai i le fua o le laau e faatusa lea i le mauaina o sauniga ma feagaiga lea e mafai ona aoga atoa ai le Togiola i o tatou olaga. O le fua ua faamatalaina ua “manaomia e faafiafia ai le tagata” (1 Nifae 8:10) ma aumaia se olioli sili ma le naunau e faasoa atu lena olioli i isi.
O le mea taua lava, o le autu faamalumalu o le Tusi a Mamona—o loo valaauliaina ai tagata uma e o mai ia Keriso —o le faatumutumuga lea o le faaaliga na vaaia e Liae. O le mea e faapitoa le mataina o le ai uamea lea na tau atu i le laau (tagai i le 1 Nifae 8:19). O le ai uamea o le afioga a le Atua.
O Le Pipii atu e ese mai le Faaauau ona Piimau Pea i le Ai Uamea
Na vaai Tamā Liae i ni vaega se fa o tagata i le faaaliga na ia vaai i ai. O vaega e tolu na fetaomi atu i luma i le ala sao ma le vaapiapi ma saili ina ia maua le laau ma ona fua. E lei sailia e le vaega lona fa le laau, nai lo lena na mananao i le fale tele ma le vateatea e avea ma o latou taunuuga faaiu (tagai i le 1 Nifae 8:31–33).
I le 1 Nifae 8:21–23 ua tatou aoao ai e uiga i le vaega o tagata o e na fetaomi atu i luma ma amata i le ala e tau atu i le laau o le ola. Ae peitai, a o fetaiai tagata ma le ao pogisa, lea e faatusa i “tofotofoga a le tiapolo” (1 Nifae 12:17), na le iloa lo latou ala, feseseai, ma ua leiloloa.
Ia matauina e le o ta’ua lava le ai uamea i nei fuaiupu. O i latou o e teena pe le amanaiaina le afioga a le Atua e le mauaina lena tapasa paia lea e faasino atua le ala i le Faaola. Ia mafaufau o lenei vaega na mauaina le ala ma fetaomi atu i luma, ma faaalia se fua faatatau o le faatuatua ia Keriso ma le tuuto faaleagaga, ae na o ese mai le ala ona o tofotofoga a le tiapolo ma na leiloloa.
I le 1 Nifae 8:24–28 ua tatou faitau ai e uiga i se vaega o tagata lona lua o e na mauaina le ala sao ma le vaapiapi e tau atu i le laau o le ola. O lenei vaega “na fetaomi mai i luma i le puao o le pogisa, o piimau i le ai uamea, ina seia oo mai i latou ma aai i le fua o le laau” (fuaiupu e 24). Ae peitai, ina ua tauemuina e i latou na lelei le uiga o latou ofu ma faatumulia ai le fale tele ma le vateatea ia le vaega lona lua o tagata, “na latou maasiasi” ma “ua latou pauu ese i ala leaga ma ua le iloa” (fuaiupu e 28). Faamolemole ia matau o lenei vaega o loo faamatalaina o e “piimau i le ai uamea” (1 Nifae 8:24; faaopoopo le faamamafa).
O le vaega lona lua e taua aua na latou fetaomi atu i luma ma le faatuatua ma le tautinoga. Sa latou maua foi le faamanuiaga faaopoopo o le ai uamea, ma sa latou piimau foi i ai! Ae peitai, ina ua latou fetaiai ma sauaga ma faigata, sa latou pauu ese i ala leaga ma ua le iloa. E oo lava i le faatuatua, tautinoga, ma le afioga a le Atua, na iu lava ina le iloa lenei vaega—masalo ona sa latou faitau pe suesue pe sailiili i tusitusiga paia na o sina taimi. O le tau na ona pipii atu i le ai uamea ua fautuaina mai ai ia te au ua na o sina taimi “tatope” o suesuega po o le na ona loiloi i nisi taimi nai lo le faatofu faifai pea ma le tumau i le afioga a le Atua.
I le fuaiupu e 30 ua tatou faitau ai i se vaega o tagata lona tolu o e na fetaomi atu i luma ma “piimau pea i le ai uamea, ua oo ina taunuu mai ma faapauu, ma ua latou aai i le fua o le laau.” O le faaupuga autu i lenei mau o le piimau pea i le ai uamea.
Na fetaomi atu foi i luma ma le faatuatua ma le tautino le vaega lona tolu; ae peitai, e le o i ai se mea o iloa ai na latou se ese, ma pauu ese i ala leaga, pe na le iloa. Atonu o lenei vaega lona tolu o tagata na faitau ma suesue ma sailiili soo i tusitusiga paia. Atonu o le maelega ma le tuuto i se mea e foliga e “faatauvaa ma mea faavalea” (Alema 37:6) lea na faasaoina mai ai lea vaega lona tolu mai le malaia. Atonu o le “malamalama o le Atua” ma le “malamalama o le upu moni” (Alema 23:5, 6) lea na mauaina e ala i le suesue faamaoni i tusitusiga paia ma maua ai le meaalofa faaleagaga o le lotomaualalo—ma mafua ai ona latou “faapauu i lalo ma aai i le fua o le laau” (1 Nifae 8:30; faaopoopo le faamamafa). Atonu foi o le fafagaina ma le malosi faaleagaga lea na mauaina e ala i le “fiafia [e le aunoa] i le afioga a Keriso” (2 Nifae 31:20) ma mafai ai e lenei vaega ona le amanaiaina ia tauemuga a tagata i le fale tele ma le vateatea (tagai i le 1 Nifae 8:33). O le vaega lenei o tagata e tatau ona tatou taumafai e auai atu i ai.
Na fesili uso o Nifae, “O le a le uiga o le ai uamea lea na vaai i ai lo tatou tama, lea na tau atu i le laau?
“Ua ou [Nifae] fai atu foi ia te i latou, o le afioga lea a le Atua; o i latou uma o e faalogo foi i le afioga a le Atua, ma taofi mau i ai, e le fano i latou e faavavau; e le mafai foi tofotofoga ma u fanafana mu a le ita mai ona manumalo ia te i latou e oo i le tauaso, e taitaiese ai i latou i le malaia” (1 Nifae 15:23–24; faaopoopo le faamamafa).
O le a la le eseesega i le va o le pipii atu ma le piimau i le ai uamea? Sei ou fautua atu la o le piimau i le ai uamea e aofia ai, se fuafaatatau tele, le agaga tatalo, faifai pea, ma le faaaoga faamaoni o tusitusiga paia o se puna mautinoa o upu moni faaalia ma o se taiala faamoemoeina mo le malaga i le ala sao ma le vaapiapi i le laau o le ola—faapei o le Alii o Iesu Keriso.
“Ma ua oo ina ou iloa le ai uamea na iloa e lo’u tama, o le afioga lea a le Atua ua taunuu i le puna o le vai ola, po o le laau o le ola” (1 Nifae 11:25).
O Le Tusi a Mamona E mo i Tatou i le Taimi Nei
Ua aumai e le Tusi a Mamona le upu moni e talafeagai ma taua i o tatou aso ma o tatou tulaga. O le tulaga faaleagaga ma le talafeagai aoga o le Tusi a Mamona i o tatou olaga ua faamamafa mai e Moronae: “Faauta, ou te tautala atu ia te outou e peiseai ua tatou faatasi, a e leai. Faauta foi, ua faaalia mai outou ia te au e Iesu Keriso, ou te iloa foi a outou amio” (Mamona 8:35). O le vaaiga i o tatou aso ma tulaga e ala i le muai iloa i le Atua, le tusitala autu o le Tusi a Mamona na patino lava e aofia ai ia ulutala ma faataitaiga sili ona taua i tagata e nofoia le lalolagi i aso e gata ai.
Ou te valaau atu ia te outou e mafaufau ma le faaeteete ma le agaga tatalo i fesili nei: O a ni lesona e mafai ma e ao ona ou aoaoina mai le faaaliga a Liae i le laau o le ola ma le aoaoga faavae o le piimau pea i le au uamea e mafai ai ona ou tu malosi faaleagaga i le lalolagi lea tatou te ola ai i le taimi nei?
A o outou galulue ma le maelega ma saili ia musumusuga e taliina ai lenei fesili taua, o le a oo ina e malamalama atoatoa i le mana o le Agaga Paia, i lou loto ma lou mafaufau, le taua o le piimau pea i le ai uamea. Ma o le a faamanuiaina oe e faaaoga na lesona ma le faatuatua ma le maelega i lou lava olaga ma i lou aiga.
Ia tatou maua uma mata e vaai ai ma taliga e faalogo ai i lesona faaopoopo mai le faaaliga na vaaia e Liae o le a fesoasoani ia i tatou ina ia “outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua, atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).
Miti a Liae, saunia e Greg Olsen, e le mafai ona kopiina
Ata na tusia e David Stoker
Ata na tusia e Matthew Reier