Ettōņak eo an Liai
Jirok Likatōttōt Wōt ilo Aen eo
Tiim eo eaorōktata an Bok in Mormon ej—karuwaineneik aolep n̄an itok n̄an Kraist—ej pedped in visōn eo an Liai.
Ij iakwe Bok in Mormon. Jet iaan ememļo̧kijen ko aō ilo ko̧jpeļļ eo rej kōn an jinō kōn riit tok n̄an eō jān Bwebwenato ko an Bok in Mormon n̄an Ro Rōm̧m̧an Ded ilo Raan-kein Āliktata, jān Emman Marr Petersen. Ilo en̄jake ko ke iaar ajri wōt im juon tōre in ekkatak im aō jar toon wōt aō mour ej wōnm̧aanļo̧k wōt, Jetōb Kwojarjar eaar ālij im bar ālij kwaļo̧k kam̧ool eo n̄an aō bwe Bok in Mormon ej naan an Anij.
Ij kam̧ool bwe Bok in Mormon ej bar juon kalim̧m̧ur kōn Jisōs Kraist. Ijeļā bwe Rikanaan Joseph Smith eaar ukōt Bok in Mormon kōn im jān kajoor eo an Anij. Im Ij kam̧ool bwe Bok in Mormon ej “bok eo ejim̧we tata jān bok otemjej ioon laļ, im bwe ej dekā in jabōn em̧ eo n̄an tōmak in ad, im juon armej [enaaj] epaakeļo̧k Anij jān an mour ekkar n̄an katak ko ie, jān jabdewōt bok ko jet.”1
Kōkaļļe ko Raorōk ilo Ettōņak eo an Liai
Aorōk eo an riit, ekkatak, pukōt, im kejakļo̧kijen kōn aolep jeje ko rekwojarjar im eļaptata kōn Bok in Mormon ej kalikkar ilo jet pedped ko ilo visōn eo an Liai kōn wōjke in mour eo (lale 1 Nipai 8).
Pija eo ilo ettōņak eo an Liai ej wōjke in mour eo—juon kōkaļļe in “iakwe an Anij” (lale 1 Nipai 11:21–22. “Bwe kōn an Anij yokwe laļ, Ear letok juōn wōt Nejin Ear keotak, bwe jabdewōt eo ej lōke E en jab jako, a en mour indeeo” (Jon 3:16). Ilo wāween in, lo̧tak, mour, im en̄taan in pinmuur eo an Irooj Jisōs Kraist rej men ko reļļap an iakwe eo an Anij n̄an ajri ro Nejin. Āinwōt an Nipai kar kam̧ool, iakwe in ej “elukkuun ļap kōttōpare jān men ko otemjej” im, āinwōt an enjeļ eo kwaļo̧ki ilo ettōņak eo an, “menin kam̧ōņōņō tata n̄an jetōb”(1 Nipai 11:22–23; lale barāinwōt 1 Nipai 8:12, 15). Jepta 11 in 1 Nipai ej kwaļo̧k juon kōkaļļein kōmeļeļe in wōjke in mour āinwōt juon kōkaļļe in mour, kwaļo̧k, im en̄taan eo an Rilo̧mo̧o̧r—“ettā eo an Anij”(1 Nipai 11:16).
Leen wōjke eo ej juon kōkaļļein kōjeram̧m̧an ko an Pinmuur eo. Bōk m̧ōttan leen wōjke eo ej jutak kōn bōk kain̄i ko im bujen ko bwe Pinmuur eo en maron̄ lukkuun bōk jikin ilo mour ko ad. Leen eo kar kōmeļeļeik āinwōt “kaijoļjoļ n̄an kam̧ōņōņō jabdewōt” (1 Nipai 8:10) im ej kwaļo̧k eļap lan̄lōn̄ im ikdelel n̄an kwaļo̧k lan̄lōn̄ in ippān ro jet.
Eļaptata, tiim eo eaorōktata an Bok in Mormon ej—karuwainene aolep n̄an itok n̄an Kraist —ej pedped in visōn eo an Liai. Itok limo eo ilo kile ej aen in debdeb eo me ej tōl ļo̧k n̄an wōjke eo (lale 1 Nipai 8:19). Aen in debdeb eo ej naan an Anij.
Kabōjrak Wōt ņae Wōnm̧aanļo̧k wōt ilo Jirok Likatōttōt n̄an Aen eo
Jemed Liai eaar loe emen kumi in armej ro ilo visōn eo an. Jilu iaan kumi ko raar bun̄ m̧aanļo̧k ilo iaļ eo eaidik in aidin̄ n̄an pukōt n̄an bōk wōjke eo im ko leen. Kumi eo kein kemen raar jab pukōt wōjke eo, ikirelel kōn m̧weo em̧m̧an im ļap āinwōt kōttōpar eo aer eļaptata (lale 1 Nipai 8:31–33).
Ilo 1 Nipai 8:21–23 jej katak kōn kumi in armej ro jinoin tata ro raar bun̄ m̧aanlo̧k im jino ilo iaļ eo ej tōl lo̧k n̄an wōjke in mour eo. Ijoke, ilo an armej ro tōpar tab in marok eo, eo ej jutak kōn “kapo ko an devil” (1 Nipai 12:17), raar jōbwābwe jān iaļ eo aer, jejļo̧k, im raar jebwābwe.
Kile bwe ilo eoon kein rejjab kōnono kōn aen in debdeb eo. Ro rej kajejtokjen ak jab kaorōk naan eo an Anij rejjab maron̄ bōk kam̧bōj eo ekwojarjar me ej jitōn̄ iaļ eo n̄an ippān Rilo̧mo̧o̧r eo. Ļōmņak bwe kumi in raar bōk iaļ eo im bun̄ m̧aanļo̧k, kwaļo̧k juon jon̄ak in tōmak ilo Kraist im jetōb in lōke, bōtaab raar jejļo̧kjān ilo kapok ko an devil eo im kar jabwābwe.
Ilo 1 Nipai 8:24–28 jej riit kōn kumi in armej ro ruo me rekar bōk iaļ eo eāinin̄ im eaidik me ej tōl ļo̧k n̄an wōjke in mour. Kumi in “raar iuun m̧aanļo̧k doon ibuļōn tab in marok eo, kabōjrak wōt ilo aen in debdeb eo, m̧ae iien raar wōnm̧aantak im m̧ōn̄ā jān leen wōjke eo” (eoon 24). Ijoke, ilo an ro em̧m̧an nuknuk ko aer ilo m̧we eļap im em̧m̧an kar kajirere kōn kumi in armej in kein karuo, “raar jook” im “raar wōtļo̧kļo̧k ilo iaļ ko remo im raar jebwābwe” (eoon 28). Jouj im meļeļe bwe kumi in kar kōmeļeļeik āinwōt “kabōjrak wōt n̄an aen eo” (1 Nipai 8:24; kakobaba).
Eaorōk bwe kumi eo kein karuo raar iuun m̧aanļo̧k doon kōn tōmak im kalim̧m̧ur. Raar barāinwōt wōr aer kōjeram̧m̧an eo kōn aen in debdeb eo, im raar kabōjrak e! Ijoke, ilo aer kar jeļm̧ae kōjdāt im en̄taan, raar wōtļo̧k ilo iaļ ko remo im raar jabwābwe. Jekdoon kōn tōmak, kalim̧m̧ur, im naan an Anij, kumi in raar āliktata jōbwābwe—bōlen kōnke raar ejjab aolep iien riit ak ekkatak ak pukōt etale jeje ko rekwojarjar. kabōjrak n̄an aen in debdeb eo ej kwaļo̧k n̄an n̄a jet wōt iien “kam̧ūjkōk” ekkatak ak jakutkut kōm̧m̧ane jān kōm̧m̧ane aolep iien, jab bōjrak lūn̄ūr naan eo an Anij.
Ilo eoon 30 jej riit kōn kumi in armej eo kein kajilu ro raar bun̄ m̧aanļo̧k “raar ilo̧k jirok likatōttōt wōt ilo aen in debdeb eo, m̧ae iien raar tōprak im raar wōtļo̧k im m̧ōn̄ā leen wōjke eo.” Meļeļe eo an eoon in ej jirok likatōttōt wōt ilo aen in debdeb eo.
Kumi eo kein kajilu raar barāinwōt bun̄ m̧aanļo̧k kōn tōmak im lōke; ijoke, ejjeļo̧k kōkaļļe bwe raar jejļo̧k, wōtļo̧k ilo iaļ ko remo, ak kar jabwābwe. Aaet kumi in armej ro kein kajilu ejjab jem̧ļo̧k aer riit im kar ekkatak im etali jeje ko rekwojarjar. Bōlen ekar niknik im wūjļepļo̧k n̄an juon men ko me “redik im relam waan men ko reļļap” (Alma 37:6) me eaar lo̧mo̧ran kumi eo kein kajilu jān jako. Bōlen kar “jeļā kōn Irooj” im “jeļā kōn m̧ool eo” ( Alma 23:5, 6) kar bōk jān tiljek ilo ekkatak jeje ko rekwojarjar me ej akjoketok menin letok an ettā ilo jetōb—kain in kumi in armej in “raar wōtļo̧k im m̧ōn̄ā leen wōjke eo” (1 Nipai 8:30; kakobaba). Bōlen eaar naajdik ilo jetōb im kōkajoor eo eaar leļo̧k jān wōnm̧aanļo̧k wōt “kwojkwoj ioon naan an Kraist” (2 Nipai 31:20) me eaar kōm̧m̧an bwe kumi in en jab ron̄jake kajjirere im kōjak an armej ro ilo m̧weo eļap im em̧m̧an (see 1 Nipai 8:33). En̄in ej kumi eo kwe im n̄a aikuj kajion̄ n̄an kobaļo̧k.
Ļōmaro jein im jatin Nipai raar kajjitōk, “Ta meļeļeen aen in debdeb eo jemād eaar lo e, eo eaar tōļļo̧k n̄an wōjke eo?
“Im [Nipai] eaar ba n̄an er eaar kakōļļeen naan in Anij; im jabdewōt eo enaaj kar eo̧ron̄ naan in Anij, im naaj jirok likatōttōt ilo e, renaaj jamin jako; barāinwōt kapo ko im m̧ade kijeek ko an rikapo rejamin anjo̧ iooer, n̄an tōļļo̧k er n̄an jako” (1 Nipai 15:23–24; kakobaba ko kwaļo̧ki).
Innām, ta, oktak eo ikōtaan kabōjrak im jirok likatōttōt n̄an aen in debdeb eo? In kakememej bwe jirok likatōttōt n̄an aen in debdeb eo ekoba, ilo juon jon̄ak eļap, jar, jokkun wōt juon, im m̧ool kōjerbal jeje ko rekwojarjar āinwōt juon kein jipan̄ em̧ool kōn kwaļo̧k m̧ool eo im āinwōt juon kein tōl kōjatdikdik kake n̄an em̧m̧akūt in ilo iaļ eo ejim̧we im aidik n̄an wōjke in mour eo—em̧ool n̄an Irooj Jisōs Kraist.
“Im ālkin men kein, Iaar lo aen in debdeb eo, eo jema eaar lo e, eaar naan in Anij, eo eaar tōļļo̧k n̄an unin dān in mour eo, ak n̄an wōjke in mour eo” (1 Nipai 11:25).
Bok in Mormon Ej n̄an Kōj Rainin
Bok in Mormon ej kwaļo̧k tok m̧ool ko me rejejjet im raorōk ilo tōre kein ad im n̄an jekjek ko ad. Jim̧we eo im jetōb im ilo kōjerbale Bok in Mormon ilo mour ko ad ej kalikar jān Moronai: “Lo, ij kōnono n̄an kom̧ āinwōt n̄e kom̧ar pād, im mekarta kom̧ ij jab. A lo, Jisōs Kraist eaar kwaļo̧k kom̧ n̄an eō, im ijeļā kōm̧m̧an ko ami” (Mormon 8:35). Ilo an kar lo raan kein ad im jekjek ko ad kōn jeļāļo̧kjeņ eo m̧okta an Anij, rijeje ro an Bok in Mormon raar kobaik unin kōnono ko im waanjon̄ak ko raorōk tata n̄an rijolet ro an laļ in ilo raan kein āliktata.
Ij karuwaineneik kom̧ n̄an lukkuun ļōmņak kake im lukkuun jar kake kajjitōk kein: Ta katak ko Imaron̄ im Iaikuj jeļā jān vision eo an Liai kōn wōjke in mour eo im jān pedped eo an wōnm̧aanļo̧k wōt jirok likatōttōt n̄an aen in debdeb eo me enaaj kōm̧m̧an bwe in maron̄ jutak pen ilo jetōb ilo laļ in me jej mour ie?
Ilo am̧ tiljek jerbal im pukōt im̧we n̄an uwaak kajjitōk in eaorōk, kom̧ naaj meļeļe eļapļok kōn kajoor eo an Jetōb Kwojarjar, jim̧or ilo būruwōmi im ilo ami ļōmņak, aorōk eo an wōnm̧aanļo̧k wōt im jirok likatōttōt n̄an aen in debdeb eo. Im kom̧ naaj jeram̧m̧an n̄an kōjerbal katak ko kōn tōmak im tiljek ilo mour eo ami make im ilo m̧weo im̧ōm.
Kōm̧m̧an bwe mej ko mejed ren loe im lo̧jiln̄i ko ren ron̄jake kakobaba in katak ko jān vision eo an Liai me enaaj jipan̄ kōj “bun̄ m̧aanlok kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwojkwoj ioon naan an Kraist,im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo”2 Nipai 31:20).
Ettōņak eo an Liai, Jen Greg Olsen, Ejjab maron̄ kapeiki
Pija jen David Stoker
Pija jen Matthew Reier