Savali a le Au Peresitene Sili
Folafolaga Taua o le Tusi a Mamona
I le tele o tausaga ua mavae sa ou tutu ai i autafa o le moega o se tamā talavou ua vaivai toe a oti. Sa tutu ai foi lona toalua popole ma le la fanau e toalua. Sa ia tago mai ma uu atu lo’u lima, ma sa ia fai mai ma se pupula faatauanau, “Epikopo, ua ou iloa o le a ou oti. Tau mai po o le a le mea e tupu i lo’u agaga pe a ou oti.”
Sa ou faia se tatalo le leoa mo le taitaiga faalelagi ma sa ou matauina i luga o le laulau i tafatafa o lona moega se kopi o tusitusiga paia fusitolu. Sa ou tago atu i ai ma sue faatopetope itulau. E le’i pine ae ou mauaina e aunoa ma sa’u taumafaiga le mataupu e 40 o le Alema. Sa ou faitauina atu nei upu ia te ia:
“Faauta, ua faailoa mai ia te au e le agelu, pe a tete’a agaga o tagata ma lenei tino e oti, … ua aveina atu i latou e nonofo i le maota o le Atua, o Le na foai mai le ola ia te i latou.
“Ona oo lea ina nonofo agaga o e amiotonu i le mea e fiafia ai, ua ta’ua o le parataiso, o le mea lea e mapu ai, o le mea e filemu ai, latou te malolo ai i o latou tiga uma, ma le popole uma, ma le faanoanoa” (Alema 40:11–12).
A o ou faitauina pea e uiga i le Toetu, sa oo mai se pupula i foliga o le alii talavou ma se ataata i ona laugutu. Ina ua faaiu la’u asiasiga, sa ou faatofa atu i lenei aiga matagofie.
Sa ou toe vaai i lona toalua ma le fanau i le falelauasiga. Ou te toe mafaufau i lena po a’o augani mai se alii talavou mo le mea moni, ma o le Tusi a Mamona, na ia faalogo ai i le tali o lana fesili.
Mai le Tusi a Mamona ua oo mai ai isi folafolaga taua, e aofia ai ia folafolaga o le filemu, saolotoga, ma faamanuiaga pe afai tatou “te auauna atu i le Atua o le nuu, o ia foi o Iesu Keriso” (Eteru 2:12).
Mai ona itulau ua oo mai ai le folafolaga o le “fiafia e le iu” ia i “latou o e tausi i poloaiga a le Atua. Aua, faauta, ua manuia i latou i mea uma, i le faaletino, atoa ma le faaleagaga” (Mosaea 2:41).
Mai ona itulau ua oo mai ai le folafolaga o le “olioli e le mafuatia” ia i latou o e avea ma “tufugaaao o le Atua” i le laveaiina mai o Ona atalii ma afafine faapelepele (Alema 28:8; 29:9).
Mai ona itulau ua oo mai ai le folafolaga o le a toe faapotopotoina ia Isaraelu ia na faataapeapeina—o se galuega lea o loo tatou galulue ai e ala atu i taumafaiga maoae a faifeautalai i le lalolagi atoa (tagai i le 3 Nifae 16; 21–22).
Mai ona itulau ua oo mai ai le folafolaga faapea afai tatou te tatalo atu i le Tama i le suafa paia o Iesu Keriso, o le a faamanuiaina o tatou aiga (tagai i le 3 Nifae 18:21).
Na oo mai i se suesuega o ona itulau le faataunuuina o le folafolaga faaperofeta faapea “o le a oo mai i totonu o o outou olaga ma totonu o o outou aiga se fuafaatatau faaopoopo o le Agaga o le Alii, o se folafolaga mausali ina ia savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua.”1
Ma mai itulau o le Tusi a Mamona ua oo mai ai le folafolaga a Moronae faapea e ala atu i le tatalo, faamoemoega moni, ma le faatuatua ia Keriso, ua mafai ai ona tatou iloa le moni o nei folafolaga “e ala i le mana o le Agaga Paia” (tagai i le Moronae 10:4–5).
Faatasi ai ma isi perofeta o aso e gata ai, ou te molimau atu i le moni o lenei “tusi ua sili ona sao i soo se tusi i le lalolagi,”2 o le Tusi a Mamona, o se tasi o molimau ia Iesu Keriso. O lana savali ua lilofia ai le lalolagi ma aumaia le malamalama o le upumoni i le au faitau. O la’u molimau, o le Tusi a Mamona e suia ai olaga. Ia taitoatasi ma tatou faitau ma toe faitau i ai. Ma ia tatou faasoaina atu ma le fiafia a tatou molimau i fanau uma a le Atua e uiga i ona folafolaga taua.
Ata na tusia e Christina Smith