O Le Tusi a Mamona
Faamalosia lo Tatou Faatuatua ia Iesu Keriso
Ua valaaulia i tatou ma o tatou aiga e le Tusi a Mamona ina ia opogi le faatuatua i le Alii o Iesu Keriso, ma o loo ta’u mai ai mataupu faavae o le a fesoasoani i o tatou aiga ina ia manuia.
O le tuufaatasiga o aoaoga a perofeta mai le tele o seneturi, na tusia ai le Tusi a Mamona mo se taimi i le lumanai pe a toefuatai mai ia ki o le perisitua, faatasi ai ma le faapotopotoina tele o le fanauga a Isaraelu, ma saunia ai le lalolagi mo le toe afio mai o le Faaola i le fogaeleele (tagai i le 2 Nifae 25; 27; 3 Nifae 21). Na faamatalaina e Nifae ia anotusi paia o se “leo o le tasi ua leo ii mai le efuefu” (2 Nifae 33:13). Na folafola mai e Moronae: “Faauta, ou te tautala atu ia te outou e peiseai ua tatou faatasi, a e leai. Faauta foi, ua faaalia mai outou ia te au e Iesu Keriso” (Mamona 8:35).
Na tusia le Tusi a Mamona mo o tatou aso ma mo aso o i lumanai. Pe tusa ma le tasi miliona kopi o le Tusi a Mamona na lolomiina i le 100 tausaga muamua ina ua mavae le Toefuataiga. Na aofia ai gagana e 15, ma o se galuega maoae. I le isi 50 tausaga (1930–80), na silia ma le 25 miliona kopi na lolomiina i gagana e 41. Ua 30 tausaga ua mavae talu mai lena taimi, ae ua125 miliona kopi faaopoopo o le Tusi a Mamona ua lolomiina i gagana e 107, e aofia ai ia Vaega Filifilia mai le Tusi a Mamona. O le a faaauau pea ona tuputupu ae le uunaiga ma le aafiaga o le Tusi a Mamona a o aveina atu le malo o le Atua i atunuu uma, ituaiga, gagana, ma tagata.
O le itulau autu, na tusia e Mamona, o loo faailoa mai ai le faamoemoega autu o le tusi. O le faamoemoega muamua lava e patino lava i le faalauiloa mai o augatupulaga o le fanauga a Liae. O le faamoemoega faaiu o le “ina ia mautinoa ai e [tagata uma] o Iesu o le Keriso, o le Atua Faavavau” (itulau autu o le Tusi a Mamona).
Taua mo o Tatou Aso
Aisea e matuai taua ai se isi molimau ia Iesu Keriso i o tatou aso? Aisea o le a aumai ai e le Alii se isi molimau e faamalosia ai le folafolaga mamana o le Tusi Paia?
O loo tatou ola i se taimi e ese mai i soo se isi lava taimi. O faamanuiaga faasaienisi ua mafai ai ona maua tausiga faafomai, femalagaaiga, toafilemu, ma le faigofie e lei mafaufauina e augatupulaga na muamua atu ia i tatou. Ua lolovaia le lalolagi i faamatalaga ma tekinolosi, e faaleleia ai le galuega o talafaasolopito o aiga ma le faasoaina atu o le talalelei a ua faateleina ai foi ia ponokalafi, taaloga vitio malolosi, ma isi “mea leaga atoa ma togafiti ua faia ma o le a tupu pea i loto o tagata faatuputupu leaga” (MFF 89:4). I le tele lava o le lalolagi, ua tatou ola i se vaitaimi o le malosi o le pipii atu i oa faalelalolagi.
E mafai e nei tulaga, pe afai tatou te le faaeteete, ona faalavefau pe faatosinaina i tatou e o ese mai mataupu faavae ia e faavavau ma e moni mo augatupulaga uma.
A o avea au ma se faifeautalai talavou i Europa i le amataga o le vaitau 1970, e tele lava ina amata a matou aoaoga i le faamalamalamaina o le Liliuese, aua na taliaina lautele le tulaga paia o Iesu Keriso. Ina ua ou toe foi mai o se peresitene o le misiona i le 20 tausaga mulimuli ane, na ese le amataga o a matou talanoaga, aua ua matuai mou ese atu lava le talitonuga lea o Iesu Keriso o le Alo o le Atua, o le na tuuina mai Lona soifua mo a tatou agasala ma na toetu mai i le aso lona tolu.
I le lalolagi i le aso, ua i ai taliga ua fia faalogologo i manatu lē faavaea a Korioa, le aneti-Keriso:
“Tou te faamoemoe i se a i le Keriso? Aua e le mafai e se tagata ona iloa se mea e tasi e oo mai.
“Faauta, o mea nei ua ta’ua e outou o perofetaga … o uputuu faavalea ia a o outou tama.
“… E le mafai ona outou iloa ia mea tou te le vaavaai i ai. …
“… E faamanuiaina ai tagata taitoatasi e tusa ma lona [lava] atamai, ma … manumalo tagata e tusa ma lona [lava] malosi” (Alema 30:13–15, 17).
Tatou te manaomia lo tatou lava tulaga malupuipuia ma le faatuatua mautu i le Alii o Iesu Keriso, ma e tatou te manaomia le fesoasoani i le faamalolosia o o tatou aiga ina ia tafe mai lenei faatuatua i loto o a tatou fanau ma fanau a fanau. O le faatuatua ia Iesu Keriso, pe a taulaina mautu i o tatou loto, e aumai ai le liua moni, ma i lona fagua e oo mai ai le salamo, soo faamaoni, vavega, meaalofa faaleagaga, ma le amiotonu tumau. O se vaega taua lea i le misiona paia o le Tusi a Mamona.
A o avea a’u o se faifeautalai talavou, sa faia se ma talanoaga sili ona mataina ma se faifeau. Na ia tauina mai ia i maua e le mafai ona ia taliaina le Tusi a Mamona ona e talanoa sao mai lava ia Iesu Keriso, e faaaoga ai Lona igoa ma mea na tutupu o Lona soifuaga i le selau tausaga a o lei fanau mai o Ia. Na ia manatu e le talafeagai lea mamanu ma le Feagaiga Tuai lea e faasino auiliili i le Faaola.
Ia te au lava ia o le folafolaga lototoa ia Iesu Keriso, o le mana moni lava lea o le Tusi a Mamona. E moni, e tatau ona tatou mauaina se molimau faaleagaga o le tusi e a le Atua lea. Ae o le taimi e mauaina ai lena mea, o faamoemoega o Keriso, le tulaga moni o Lona Soifuaga ma le Toetu, ma le manino o le mea e tatau ai ona tatou mulimuli atu ia te ia ma maua le ola e faavavau faatasi ma Ia, ua matua tino mai lava i o tatou luma.
O Le Molimau ia Iesu Keriso
O le faitauina ma le mafaufau loloto i lauga maoae a Iesu Keriso i le Tusi a Mamona, faatasi ai ma le mana o le Agaga Paia, na aumaia ai se molimau faapitoa o lo latou tulaga moni. Ou te fiafia e faase’e malie atu i le Tusi a Mamona ma fiafia i aoaoga faavae mamana a Keriso: o le faaaliga a Nifae i le laau o le ola, ma le agelu o loo fesili, “Pe e te iloa ea le faamaulalo o le Atua?” (1 Nifae 11:16); le molimau a Liae o le a “oo mai ai le togiola talu le Mesia Paia; aua ua tumu o ia i le alofa tunoa ma le upu moni” (2 Nifae 2:6); le faaopoopo mai a Iakopo o Ia o se “leoleo o le faitotoa … na te le tofia i ai se auauna” (2 Nifae 9:41).
Ona tatou mulimuli lea i le Tupu o Peniamina o loo aoaoina i tatou i uiga auau mama o le avea ma soo, faatasi ai ma lana folafolaga le maluelue e “leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso” (Mosaea 3:17).
E le o toe mamao ona tatou faatasi lea ma Apinati, lea o le a tuuina atu lona ola mo mea ua ia talitonu i ai:
A e peitai, ua i ai le toetu, o le mea lea ua le manumalo ai le tuugamau, ma ua faaumatia ai le tui o le oti talu Keriso.
“O Ia o le malamalama ma le ola o le lalolagi; ioe, o le malamalama e leai sona iuga, e le mafaapouliuligia” (Mosaea 16:8–9).
Ua aumaia e Alema ia aoaoga faavae matagofie o le Togiola, faamasinoga, ma le alofa mutimutivale: “O lenei foi, ua le mafai ona faataunuuina le ala o le alofa, sei iloga ua faia le togiola; o le mea lea ua togiola ai e le Atua lava mo agasala a le lalolagi, ina ia faataunuuina le ala o le alofa, e faamalie ai iuga o le faamasinoga, ina ia sa’o ona lelei le Atua, o le Atua amiotonu, o le Atua foi o le finagalo alofa” (Alema 42:15).
Ona tatou oo mai lea i le asiasiga ofoofogia a le Faaola i le fanau a Liae. Ua tatou lagonaina foi Lona alofa, Lona agalelei, Ana aoaoga, Lana lava molimau:
“O le tala lelei lenei ua ou tuuina atu ia te outou—na ou sau i le lalolagi e fai le finagalo o lo’u Tama. …
“Na auina mai au e le Tama, ina ia siitia au i luga o le satauro … ia tosina mai tagata uma ia te au, e pei ona siitia au e tagata e faapea ona siitia tagata e le Tama, ina ia laulaututu i o’u luma, ia faamasinoina ai ia latou galuega pe lelei, pe leaga” 3 Nifae 27:13–14).
Ma le mea mulimuli o le augani faaiu a Mamona ma Moronae: “Ia outou iloa e ao ona … salamo i a outou agasala ma amioletonu uma, ma ia faatuatua ia Iesu Keriso, o ia o le Alo o le Atua” (Mamona 7:5). “Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea o lona alofa tunoa mo outou, ina ia atoatoa ai outou ia Keriso i lona alofa tunoa” (Moronae 10:32).
Faatulagaina i totonu o Aiga
O lenei molimau malosi ma le faatauanau faaleagaga o le folafolaga moni lava a le Mesia—le Alo faauuina o le Atua, na auina mai i le lalolagi e faataunuu le toetu o tagata uma ma faamama faaleagaga i latou o e o le a salamo ma mulimuli atu ia te Ia—ua faatulagaina lea i totonu o le talafaasolopito o aiga.
E amata le Tusi a Mamona i se aiga, i se tama ma se tina, atalii ma afafine o loo faalogologo i le faaaliga a lo latou tama-perofeta e tuua a latou oa faalelalolagi ma mulimuli i fautuaga a le Alii. Ua tumu le tusi i tala o matua o loo saili e toto i totonu o a latou fanau le folafolaga ma le faamoemoe ia Iesu Keriso. I se tasi o mea na tupu sa ou toesea mai ona itulau ni fautuaga faapitoa mai tamā i atalii—lea e 52 le aofai o itulau ua lolomiina ai. I le Tusi a Mamona, tatou te vaai ai i auala na aoaoina ai e matua le faatuatua ia Keriso ma le usiusitai i poloaiga a le Atua i fanau uma o e na usiusitai mai lo latou laiti ma tamaiti o e sailia lo latou auala—o nisi o taimi mai le aiga lava e tasi. O se lesona mo o tatou aso, mo a tatou fanau, mo o tatou aiga.
E le o faamatalaina mai ia matafaioi patino a tamaitai ma afafine, e pei ona masani ai i tusiga anamua. Ae o se vaaiga i tua atu o mea e iloagofie, tatou te vaai ai i le uunaiga faavavau ma le tumau. Tatou te faatauaina nai momoi mea taua o loo ta’ua ai tamaitai ma tina, faapei ona faamatala mai ai o latou lagona e “agavaivai ma ua mama o latou manatu ma ua faapelepeleina i luma o le Atua” (Iakopo 2:7) pe ina ua faamatalaina e Helamana le tulaga lelei o lana autau talavou e pei ona uunaia ai e o latou tina amiotonu:
“Ioe, ua latou usiusitai, ma ua anaana ma le sa’o i poloaiga uma; ioe, ma ua faia ia te i latou e tusa ma lo latou faatuatua; na ou manatua foi upu na latou fai mai ia te au ua aoaoina i latou e o latou tina. …
“O lenei, o le faatuatua lava lea o i latou nei ua ou tautala atu ai; o tama muli i latou, ma ua mau o latou manatu, ma ua latou faalagolago e le aunoa i le Atua. …
“… Ua aoaoina i latou e o latou tina, pe afai latou te le masalosalo, e laveaiina i latou e le Atua.
“Ma ua latou tala mai ia te au upu a o latou tina, ua faapea mai: Matou te le masalosalo lava na iloa e o matou tina” (Alema 57:21, 27; 56:47–48).
Ou te valaauliaina outou e mafaufau i nei fesili ina ia fesoasoani ia te oe e faatatau ia aoaoga o le Tusi a Mamona i lou aiga:
-
O a ni fuaitau o i le Tusi a Mamona o loo aoao mai ai i tatou, e manaomia e tamaiti le vaai i le amiosao ma le amiotonu i le faatuatua o o latou matua?
-
O a ni fautuaga na tuuina atu e tamā o i le Tusi a Mamona i o latou atalii tatou te mananao e faasoa atu i a tatou fanau?
-
O le a se mea ua tatou aoaoina e uiga i a tatou taumafaiga i fanau e le usiusitai?
-
O faapefea ona faasoa atu e matua o i le Tusi a Mamona o latou talitonuga loloto i a latou fanau?
-
O le a se mea ua tatou aoaoina e uiga i le faatuatua a o tuu faasolo mai i le tasi tupulaga i le isi?
E leai se mea e sili ona taua e faasoa atu i se isi tagata nai lo le faatuatua i le Alii o Iesu Keriso. E aumaia le malamalama i luitau o lenei olaga, fiafia i le lotolotoi o faigata, ma le ola e faavavau i le lalolagi a sau.
E tele ia faatosinaga faalelalolagi o loo tosoina atu i tatou ma o tatou aiga mai lenei faatuatuaga sili ona taua. Ua valaaulia i tatou ma o tatou aiga e le Tusi a Mamona ina ia opogi le faatuatua i le Alii o Iesu Keriso, ma o loo faasoa mai ai mataupu faavae o le a fesoasoani i o tatou aiga ina ia manuia.
Ou te molimau atu e moni le Tusi a Mamona ma o le mea moni lava sa tuuina atu i le Perofeta o Iosefa Samita e le agelu o Moronae, i lalo o le taitaiga a le Alii o Iesu Keriso. E mo o tatou aso, e mo a tatou fanau ma fanau a fanau. Pe a tatou tatalaina ma le faatuatua i aso uma, ou te folafola atu o le a i ai le Agaga o le Alii i o tatou luga ma o le a faamanuiaina e faavavau o tatou aiga.
Faaaliga na vaaia e Nifae
Molimau a Liae
Lauga a le Tupu o Peniamina
Molimau a Apinati
Faaalia mai o Iesu Keriso
Aioiga faaiu a Mamona ma Moronae
Ata o Keriso, saunia e Heinrich Hofmann, faaaloaloga a le C. Harrison Conroy Co.
Faafetaiai e Korioa ia Alema, saunia e Robert T. Barrett
Faaaliga na Vaaia e Nifae, saunia e Clark Kelley Price; faamatalaga auiliili mai le Liahona, saunia e Arnold Friberg © 1951 IRI; Lauga a le Tupu o Peniamina, saunia e Jeremy Winborg, e le mafai ona kopiina; faamatalaga auiliili mai ia O Apinati o loo Tu i Luma o le Tupu o Noa, saunia e Arnold Friberg © 1951; Ina Ia Outou Manatuaina Pea o A’u, saunia e Gary Kapp © 1998, e le mafai ona kopiina; Ua Faamavae Atu Mamona i se Malo sa Avea ma Malo Maoae, saunia e Arnold Friberg © 1951 IRI
Ua Taunuu Liae ma Lona Nuu i le Nuu o le Folafolaga, saunia e Arnold Friberg