2011
O Le Perofeta o Iosefa Samita: O Le Faaliliutusi o le Tusi a Mamona
Oketopa 2011

O Le Perofeta o Iosefa Samita

O Le Faaliliutusi o le Tusi a Mamona

O le Tusi a Mamona o se tusi tulaga ese o mau. E ui na tusia e perofeta anamua, ae e lei oo mai ia i tatou e pei o le Tusi Paia. Na tele lava ina tusi faamaumauina le Tusi Paia i taaiga tetele i le Lalolagi Tuai i ni tusi eseese ma sa kopiina e tusiupu mo le tele o seneturi. O le seneturi lona fa ina ua mavae atu Iesu Keriso, sa tuufaatasia ai nei tusi eseese ma avea ai ma voluma e tasi lea ua tatou ta’ua nei o le Tusi Paia.

O le Tusi a Mamona, i se faatusatusaga, sa tusia e ni perofeta anamua i le Lalolagi Fou i papatusi apamemea, ma na otootoina ai e se perofeta e toatasi o—Mamona (ma o lea ua faaigoaina ai)—i le seneturi lona lima t.a. i se faamaumauga se tasi i papatusi auro. Na tanumia e lona atalii, o Moronae i se taimi mulimuli ane ia papatusi, lea na tuu ai lava seia oo i le 1827 lea na tauaaoina atu ai e Moronae, o se tamalii na toetu mai, na papatusi i se alii talavou e igoa ia Iosefa Samita.

O le mea o loo sosoo mai o le tala lea i le auala na maua ai ma faaliliu e Iosefa, ma lolomiina le faamaumauga lea ua faaigoa nei o le Tusi a Mamona: O Se Tasi Molimau ia Iesu Keriso. O le Faaola lava Ia na molimau mai e moni le tusi (tagai MFF 17:6).

  1. I le 1820 sa i ai se alii e 14 tausaga le matua e igoa ia Iosefa Samita sa nofo e latalata i Palamaira, Niu Ioka. E ui lava ina laitiiti, ae sa popole o ia i lona tulaga i luma o le Atua, ma sa fenumiai o ia i talitonuga o lotu Kerisiano eseese ia sa saili e faaliliu atu tagata e ala i le ta’ufaatauvaaina o talitonuga o isi lotu. Ina ua faaosofia o ia i ana suesuega o le Tusi Paia, sa tonu ai ia Iosefa o le a sailia le poto e ala i le fesili atu i le Atua, o lē “tuuina atu i tagata uma ma le le toe ta’uta’ua” (Iakopo 1:5). Sa alu o ia i le togavao e latalata ane i lo latou fale e tatalo ai.

  2. A o tootuli Iosefa e tatalo, sa oo ifo se malamalama faaniutu i ona luga. I totonu o lena malamalama sa ia vaaia ai ni Peresona se toalua. Sa fetalai atu le Tama Faalelagi ma faapea atu, “O Lo’u Atalii Pele Lenei. Faalogo ia te Ia!” (Talafaasolopito—Iosefa Samita 2:17) Sa ta’u atu e le Alii ia Iosefa e aua nei auai i se tasi o lotu aua e leai se tasi o na lotu e moni, ae sa folafola atu ia te ia “o le a i ai se taimi i le lumanai e faailoa atu ai ia te [ia] le atoaga o le Talalelei.”1

  3. Na mavae tausaga e tolu, lea na faasoa atu ai e Iosefa Samita lona aafiaga i isi—ma sa faasauaina ai o ia ona o lena mea. Sa ia ta’ua: “E ui ina inosia ma sauaina au i lo’u fai atu na ou vaai i se faaaliga, ae o se mea moni lava; ma … sa oo ina ou faapea ifo i lou loto: Aisea ua sauaina ai au o lou tau atu o le mea moni? E moni lava sa ou vaai i se faaaliga; ma o ai ea au ou te tetee atu ai i le Atua, ma aisea foi ua manatu ai tagata o le lalolagi ia latou faia ia te au ia ou faafitia ai le mea na ou vaai tino lava i ai? Aua sa ou vaai lava i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia” (Talafaasolopito—Iosefa Samita 2:25).

  4. I le aso 21 o Setema, 1823, a o tatalo Iosefa sa faatumulia lona potumoe i le pito i luga o le fale i le malamalama ma sa faaali atu se agelu e igoa ia Moronae. Sa ta’u atu e Moronae ia Iosefa e uiga i tusitusiga a ni perofeta anamua. O le faamaumauga, o loo vaneina i ni papatusi auro, ma o loo tanumia i se mauga o lata ane. Sa faailoa atu ia Iosefa e tatau ona ia faaliliuina ia faamaumauga.

  5. Mulimuli ane, i le aso 22 o Setema 1827, na tuuina atu ai ia Iosefa ia papatusi, sa ia siiina mai na papatusi mai se pusamaa sa tanumia ai i lalo o se maa tele i luga o se mauga e latalata i Palamaira, Niu Ioka.

  6. E pei lava ona masani ai i nuu maotua i na aso, e lei tele se aotauina o Iosefa Samita. Ina ia fesoasoani ia te ia i le faaliliuga, sa saunia ai e le Atua mo ia ni meafaigaluega anamua mo faaliliuga e ta’ua o le Urima ma le Tumema. Sa faamanuiaina foi o ia i le fesoasoani a tusiupu sa tusiaina mea sa ia faalauina atu i ai a’o ia faaliliuina. O nei tusiupu sa aofia ai lona faletua o Ema; Matini Harisi, o se faifaatoaga faamanuiaina; ma Oliva Kaotui, o se faiaoga. O le tele o le galuega faaliliu na faamae’aina a o lei atoa le tolu masina ina ua amata ona avea Oliva ma tusiupu.

    Sa faamatalaina e Ema le tulaga na i ai i le avea ai ma se tusiupu ia Iosefa: “E leai se tagata e mafai ona ia faalauina ia tusitusiga o faamaumauga sei vagana ua musuia o ia; aua, ina [ua ou] galue e avea ma ana tusiupu, e faalau mai ia te au e [Iosefa] mai lea itula i lea itula; ma pe a toe foi mai i le maea ai o se taumafataga, pe uma foi se mea sa faalavelaveina ai, e toe amata tonu lava i le mea sa gata ai, e aunoa ma se vaai i le faamaumauga pe faitau atu foi ia te ia se vaega.”2

    Na faamatala e Iosefa le taua tele o le oo mai o le Tusi a Mamona: “E ala i le mana o le Atua na ou faaliliuina ai le Tusi a Mamona mai tusitusiga e faigata ona malamalama i ai, o le malamalama lea sa leiloa mai le lalolagi, lea ou te tu toatasi ai i mea maoae na tutupu, o se talavou e lei aoaoina, e faasagatau i le poto faalelalolagi ma le faateleina o le manatu faatauvaa o le seneturi lona sefuluvalu, i se faaaliga fou.”3

  7. I le gasologa o le 18 masina sa i ai ia te ia papatusi, sa lē na o Iosefa sa vaai ma taulimaina ia papatusi. Sa tautino aloaia mai e tamalii e toatolu o—Oliva Kaotui, Tavita Uitimera, ma Matini Harisi—e faapea o le agelu o Moronae na faasinoina atu ia i latou ia papatusi auro ma sa latou iloaina o nei papatusi sa “faamatalaina i le mea foaifuaina ma le mana o le Atua, aua ua fetalai mai ai lona siufofoga ia te i matou.” E toavalu isi tamalii sa latou tautino mai foi sa latou vaai ma taulimaina nei papatusi auro.4

  8. E oo atu ia Aokuso 1829, ua faia e Iosefa se konekarate ma le lomitusi o Egbert B. Grandin o Palamaira, i Niu Ioka, e lolomi le tusi. Sa mokesi e Matini Harisi lana faatoaga e totogi ai le lolomiga o le tusi, ma o le aso 26 Mati, 1830, na maua ai le Tusi a Mamona mo le faatauina atu.

  9. O le aso 6 Aperila, 1830, pe tusa ma le 60 tagata na potopoto i se fale laupapa i Faieti, i Niu Ioka. O iina, a o taitaiina ai e le Alii o Iesu Keriso, sa faatulaga aloaia ai e Iosefa Samita le Ekalesia a le Faaola, ma toefuataiina mai ai e pei ona sa mua’i faatulagaina ai ma taitaia e aposetolo ma perofeta ua faatagaina e saunoa mo le Atua. O se faaaliga mulimuli ane ia Iosefa Samita na tuuina mai ai i le Ekalesia lona igoa: O Le Ekalesia a Iesu Keriso o le Au Paia o Aso e Gata Ai (tagai MFF 115:4).

Faamatalaga

  1. Joseph Smith, i le History of the Church, 4:570.

  2. Faatalanoaga ma Ema Samita na tusia e Iosefa Samita III, Feb. 1879, i le Saints’ Herald, Oct. 1, 1879, 290.

  3. Aoaoga a Peresitene o le Ekalesia: Iosefa Samita (2007), 60.

  4. Tagai “O Le Molimau a Molimau e Toatolu” ma “O Le Molimau a Molimau e Toavalu,” i le faatomuaga o le Tusi a Mamona.

Mai le tauagavale: Uso Iosefa, saunia e David Lindsley © 1998; O Iosefa Samita o loo Saili i le Poto mai le Tusi Paia, saunia e Dale Kilbourn © 1975 IRI; Uluai Faaaliga na Vaaia e Iosefa Samita, saunia e Greg Olsen, e le mafai ona kopiina; atapue o le vaaiga mai le Iosefa Samita: Perofeta o le Toefuataiga, saunia e Matthew Reier © IRI

Mai le tauagavale: O Le Agelu o Moronae ua Faaali atu ia Iosefa Samita, saunia e Tom Lovell © 2003 IRI; atapue o le vaaiga mai leIosefa Samita: Perofeta o le Toefuataiga, saunia e Matthew Reier © IRI; atapue mai le vaaiga o le Iosefa Samita: Perofeta o le Toefuataiga, saunia e John Luke © IRI; E Ala i le Meaalofa ma le Mana o le Atua, saunia e Simon Dewey; faamatalaga o le atavali na saunia e William Maughan © 1998; ata na pueina e Craig Dimond © IRI; atapue o le vaaiga mai le Iosefa Samita: Perofeta o le Toefuataiga, saunia e Matthew Reier © IRI