O Le Mea na Aoao Mai e le Tusi a Mamona e uiga i le Alofa o le Atua

Saunia e Elder Russell M. Nelson

O Le Korama a Aposetolo e Toasefululua

O nisi o faataitaiga sili ona musuia e uiga i le alofa o le Alii o loo tusia i le Tusi a Mamona.

O le toatele o tagata Kerisiano e masani ma uiga o Iesu Keriso e pei ona ta’u mai i le Tusi Paia. Latou te ofo i le alofa na Ia faaalia i e matitiva, i e mamai, ma e mafatia. O e o loo mafaufau o i latou lava o Ona soo ma o loo taumafai foi e faataitai i Ana faataitaiga ma mulimuli i apoapoaiga a Ana aposetolo pele: “Ia tatou fealofani: aua mai le Atua le alofa; o i latou uma foi o e alolofa ua fanau mai i latou mai le Atua, ua iloa foi e i latou le Atua. … Aua o le Atua, o le alofa lava ia” (1 Ioane 4:7–8).

Ua faamaonia lenei manatu faavae e le Tusi a Mamona. O loo faamatalaina mai ai le auala na fanauina ai se tasi i le Atua ma le auala na mauaina ai e se tasi le mana e alofa ai e pei ona Ia alofa mai. O loo faailoa mai ai mataupu faavae autu se tolu lea e aumaia ai le mana o le alofa o le Atua i o tatou olaga.

Muamua, o loo aoao mai e le Tusi a Mamona o le faatinoina o le faatuatua ia Keriso ma ulu atu i se feagaiga ma Ia ina ia tausi Ana poloaiga o le ki lea i le toe fanaufouina faaleagaga. I tagata o le Tusi a Mamona o e na osia ia ituaiga feagaiga, na fai mai ai le Tupu o Peniamina, “O lenei, ona o le feagaiga ua outou faia, e taua outou o le fanau a Keriso, o ona atalii ma ona afafine; aua faauta, o le aso nei ua fanaua ai outou e ia i le faaleagaga; aua ua outou fai mai ua liua o outou loto ona o le faatuatua i lona suafa; o le mea lea ua fanauina ai outou ia te ia, ma ua avea ai outou mona atalii ma ona afafine” (Mosaea 5:7).

Lona lua, ua aoao mai e le Faaola Lava Ia o le mana e avea ai faapei o Ia e oo mai i le mauaina o sauniga o le talalelei: “O le poloaiga lenei: ina salamo ia outou tuluiga uma o le lalolagi ma o mai ia te au, ma ia papatisoina i lou igoa, ina ia faapaiaina outou i le Agaga Paia tou te talia, ina ia outou tutu ma le le pona i ou luma i le aso gataaga” (3 Nifae 27:20).

Lona tolu, Na Ia apoapoai mai ia i tatou e mulimuli i Ana faataitaiga: “Pe faapefea la outou amio e tatau ai?” Na Ia fesili ai faavaoli’a. O Lana tali: “E moni, ou te fai atu ia te outou e pei lava o a’u nei” (3 Nifae 27:27). E moni, e finagalo o Ia ina ia tatou avea atili ia faapei o Ia.

O nisi o faataitaiga sili ona musuia e uiga i le alofa o le Alii o loo tusia i le Tusi a Mamona. E mafai ona faatatau nei faataitaiga i o tatou lava olaga a o tatou taumafai e avea atili ia faapei o le Alii.

O Lona alofa mo Liae ma le aiga o Liae—ma lo latou alolofa ia te Ia—na avatu ai i latou i Amerika, i lo latou nuu folafolaina, ma latou manuia ai.¹

O le alofa o le Atua mo i tatou lea na musuia ai o Ia i seneturi ua mavae ina ia faatonuina perofeta sa Nifae e tausia ni faamaumauga paia o o latou tagata. Na fesootai lesona mai na faamaumauga i lo tatou faaolataga ma faaeaga. O loo maua i le taimi nei ia aoaoga i le Tusi a Mamona. O nei tusiga paia e avea o ni faamaoniga o le alofa o le Atua mo Ana fanau uma i le lalolagi atoa.²

O le alofa o le Faaola mo “isi [Ana] mamoe”, lea na Ia oo atu ai i le Lalolagi Fou.³ Ua tatou aoaoina mai le Tusi a Mamona o mala faanatura maoae ma aso e tolu o le pogisa na tutupu i le Lalolagi Fou ina ua mavae le maliu o le Faaola i le Lalolagi Tuai. Ona afio ifo ai lea mai le lagi o le Alii mamalu ua toetu ma auauna atu i tagata o le Lalolagi Fou.

“O A’u o le malamalama ma le ola o le lalolagi,” na Ia fetalai atu ai ia i latou, “ua ou inu foi i lena ipu oona na tuuina mai ia te au e le Tama, ma ua ou faamamaluina le Tama i le aveina i ou luga o agasala a le lalolagi” (3 Nifae 11:11).

Ona Ia tuuina mai lea o se tasi o aafiaga sili ona mafana e maua e soo se tasi lava mai ia te Ia. Na Ia valaauliaina i latou e pa’i atu i le manua i Lona itu ma faailoga o fao i Ona lima ma vae, ina ia latou mautinoa ai o Ia o le “Atua o Isaraelu, o le Atua foi o le lalolagi uma, ma ua fasia a’u mo agasala a le lalolagi” (3 Nifae 11:14).

Na tuuina atu e Iesu le mana i Ona soo e papatiso ai, e tuuina atu ai le meaalofa o le Agaga Paia, ma faatino ai le faamanatuga. Na Ia tuuina atu ia i latou le mana e faavae ai Lana Ekalesia, na taitaia e soo e toasefululua.

Na Ia tuuina atu ia i latou nisi o aoaoga faavae autu sa na Ia tuuina atu i Ona soo i le Lalolagi Tuai. Na ia faamaloloina o latou tagata mamai. Sa Ia tootuli ma tatalo i le Tama i upu sa matuai mamana lava ma paia na lē mafai ona tusi faamaumauina. O le mamana tele o Lana tatalo na lofituina ai i latou na faalogo ia te Ia i le fiafia. O le lofituina foi i Lona alofa mo i latou ma lo latou faatuatua ia te Ia, na tagi ai Iesu Lava Ia. Na Ia valoia le galuega a le Atua i seneturi e agai atu ai i le amataga folafolaina o Lona Afio Mai Faalua.⁴

Ona Ia fetalai atu lea ia i latou e aumai a latou fanau ia te Ia.

“Ua ave foi e ia o latou tamaiti taitoatasi ma faamanuia ia te i latou, ma ua tatalo i le Tama mo i latou.

“Ina ua uma ona faia e ia lenei mea, sa toe tagi o ia;

“Na ia fetalai atu foi i le motu o tagata, ua faapea atu ia te i latou: Vaai ia i o outou tamaiti.

“Ua latou vaai atu, ona tetepa ae ai lea o i latou i le lagi, ma ua latou iloa le lagi, ua avanoa, ua latou iloa foi agelu ua ifoifo mai le lagi, e peiseai ua i totonu o le afi; ua latou o ifo ma ua siosio i na tamaiti, ma ua siosiomia foi i latou, … ma ua auauna atu agelu ia te i latou” (3 Nifae 17:21–24).

O le tulaga lena o le mama a’ia’i ma le mana o le alofa o le Atua, e pei ona faaalia mai i le Tusi a Mamona.

I nei aso e gata ai o i tatou o e ua faamanuiaina i le mauaina o le Tusi a Mamona, ina ia avea ma tagata o le Ekalesia a le Alii, ina ia maua Lana talalelei, ma tausi i Ana poloaiga ua iloaina se mea e uiga i le alofa le iu o le Atua. Ua tatou iloa le auala e avea ai Lona alofa mo i tatou. Pe a avea i tatou ma Ona soo moni, ua tatou maua le mana e alofa atu ai e pei ona Ia alofa mai. Pe a tatou tausia Ana poloaiga, tatou te avea atili e faapei o Ia. Ua tatou faalauteleina lo tatou li’o o le alofa faaletagata lava ia i le aapa atu i tagata o soo se atunuu, ituaiga, ma gagana.

Faatasi ai ma le agaga faafetai loloto mo Lona soifua o faaa’oa’oga, ua mafai ai ona avea lenei mau ma a tatou tagavai: “Tatalo atu i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso, ina ia avea outou ma atalii [ma afafine] o le Atua, ina ia foliga i tatou ia te ia pe a faaalia mai o ia, aua tatou te iloa atu o ia e pei lava o i ai nei o ia” (Moronae 7:48).⁵

Faamatalaga

1. Tagai i le 1 Nifae 17:35–44; Mosaea 7:20; Alema 9:9–11; 3 Nifae 5:20–22.

2. Tagai i le Itulau autu o le Tusi a Mamona; 1 Nifae 13:35–41; 2 Nifae 33:4; Mosaea 1:2–7; Mamona 8:13–41.

3. Tagai i le Ioane 10:16; 3 Nifae 15:11–24.

4. Tagai i le 3 Nifae 11–14; 18–20.

5. Faatusatusa i le 1 Ioane 3:1–3.

Ua Molimau Mai Se Perofeta

“Ua oo mai le Tusi a Mamona i le mea foaifua ma le mana o le Atua. E tautala mai e pei o se leo mai le efuefu e molimau i le Alo o le Atua. E tautala mai e uiga i Lona soifua mai, o Lana misiona, o Lona Faasatauroga ma le Toetu, ma Lona afio atu i le au amiotonu i le laueleele o Nuumau i le konetineta o Amerika.

“O se mea faitino e mafai ona taulimaina, e mafai ona faitau i ai, e mafai ona tofotofoina. O loo tauavea i totonu o ona faavaa se folafolaga o lona amataga paia. Ua faitau miliona i latou ua tofotofoina le folafolaga ma ua iloa ai o se tusi moni ma le paia.”

Peresitene Gordon B. Hinckley (1910–2008), “O Mea Sili Ua Faaali Mai e le Atua,” O Le Liahona, Me 2005, 81–82.

O Le Iloa o le Iloa Lea o le Alofa

O au o se tagata fou o Le Ekalesia a Iesu Keriso o le Au Paia o Aso e Gata Ai, ma ia te au la o le Tusi a Mamona e le na o se tusi. O se faamaoniga mausali o le alofa o le Tama Faalelagi ia i tatou. O se faamaoniga o le alofa o Au Paia anamua ia i tatou ma e mananao ina ia tatou toe foi atu i le aiga. O se faamaoniga o le i ai o le ala sili o le fiafia a le Atua ma e atoatoa.

O le iloaina e moni lenei tusi o le a e iloaina ai foi o loo soifua le Tama Faalelagi ma Lona Alo. O le iloaina lea e matagofie ma faavavau le olaga. O le iloaina lea a e taumafai pea e faia le mea sili e te mafaia ma salamo pe a e pa’ū, o le a faamagaloina pea lava oe. O le iloaina lea o le uiga moni o le aiga. O le iloaina lea o le a lua le valavala lava ma se tasi e pele ia te oe, aua o le a ia faatali mai mo oe. O le iloaina lea o faamanuiaga a le Tama Faalelagi. O le iloaina lea o le mafanafana po o a lava ituaiga o afā e oo mai i lou ala, e mafai ona e taulimaina, aua e mo lou manuia. O le iloaina lea o le Agaga Paia o lau soa tumau. O lona uiga, o le iloaina lea o le alofa i ona faauigaga uma.

Emma Adesanya, Aialani

Iloaina o le Mana o Lona Alofa

Ina ua ou liliu i le Ekalesia i lo’u tausaga muamua i le kolisi, sa lelei ou lagona e uiga i suiga sa ou faia i lo’u olaga ma sa ou vaaia le tulaga sili atu o lo’u olaga ua faia e le talalelei. Ae peitai, sa vave ona ou lagonaina le faatuai o lo’u alualu i luma ona o lo’u olaga i aso ua mavae. Pe faapefea ona faaaogaina a’u e le Tama Faalelagi e fesoasoani e fausia Lona malo a o lea sa ou faia ni filifiliga le lelei?

Ona oo lea i se tasi aso, sa ou tatalaina lau Tusi a Mamona i le itulau mulimuli lava. Sa ou faitau i upu faaiu a Moronae: “Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea o lona alofa tunoa mo outou, ina ia atoatoa ai outou ia Keriso i lona alofa tunoa; afai foi ua atoatoa outou ia Keriso, i le alofa tunoa o le Atua, tou te le mafafai lava ona faafitia le mana o le Atua” (Moronae 10:32). Sa ou faataupupula atu i na upu. Sa ou lagona le ta’u mai e le Agaga ia te a’u o le moni. Sa ou iloa ua ou faatapulaaina le mana o le Atua e ala i le manatu faapea e le mafai ona Ia faaaogaina a’u i soo se auala e mafai ona Ia silafia.

Sa ou filifili loa mai lena lava taimi o le a ou le “teteeina le mana o le Atua” ae o le a ou taliaina lo’u olaga ua mavae ae tulimatai atu i lo’u lumanai. O le tele o lo’u tulimatai atu i lo’u lumanai nai lo lo’u olaga i aso ua mavae, ma faatuatua i le alofa tunoa faamama o Iesu Keriso, o le tele foi lea o lo’u lagonaina o le alofa o lo’u Faaola mo au ma le sili atu o lo’u fiafia ia te au lava ia.

Christy Pettey, Uosigitone, ISA

O Keriso ua Faaali Atu i le Itulagi i Sisifo, na saunia e Arnold Friberg© 1995 IRI

O Alema o loo Papatisoina i le Vai o Mamona, saunia e Arnold Friberg

Ua Asiasi Atu Iesu Keriso i Amerika, saunia e John Scott