Usa ka Dako Kaayong Buluhaton

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana aron pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Ang Ginoo, Iyang Simbahan, mga pamilya, ug mga komunidad nagkinahanglan sa impluwensya sa matarung nga mga babaye. Sa pagkatinuod, si Elder M. Russell Ballard sa Korum sa Napulog Duha ka mga Apostoles mitudlo nga “ang matag sister niini nga Simbahan kinsa nakahimo og mga pakigsaad uban sa Ginoo adunay balaan nga sugo sa pagtabang sa pagluwas og mga kalag, sa paggiya sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios.”¹

Pipila sa mga sister matingala kon sila makabuhat ba sa ingon ka taas nga mga tumong. Apan sama sa gipasabut ni Eliza R. Snow (1804–87), ikaduhang kinatibuk-ang presidente sa Relief Society, “Walay sister nga nag-inusara, ug ang gidak-on sa iyang buluhaton hilabihan ka gamay apan siya makahimo og dako kaayo sa pag-establisar sa Gingharian sa Dios dinhi sa yuta.”² Si Sister Snow mitudlo usab nga ang Relief Society giorganisar “alang sa pagtuman sa tanang maayo ug halangdon nga buhat.”³

Ang pag-apil sa Relief Society makapadako sa atong buhat sa impluwensya pinaagi sa paghatag sa matag sister og oportunidad sa paglig-on sa pagtuo, sa paglig-on sa mga pamilya ug mga panimalay, ug sa paghatag og serbisyo diha sa panimalay ug sa tibuok kalibutan. Ug maayo kaayo, ang atong mga paningkamot isip mga indibidwal ug isip mga miyembro sa Relief Society dili kinahanglang dako ug makapakulbahinam, apan kini kinahanglan nga mapuslanon ug makanunayon. Ang matarung nga mga binuhatan sama sa matag adlaw nga personal nga pag-ampo ug sa pag-ampo sa pamilya, matag adlaw nga pagtuon sa kasulatan, ug makanunayon nga pagpalambo sa mga calling sa Simbahan makatabang sa pagpalig-on sa pagtuo ug sa pagtukod sa gingharian sa Ginoo.

Ngadto sa mga sister kinsa nagduha-duha kon kining hilum nga mga kontribusyon makahimo og kalainan, si Elder Ballard misiguro: “Ang matag sister kinsa nagbarug alang sa kamatuoran ug kamatarung makapakunhod sa impluwensya sa yawa. Ang matag sister kinsa naglig-on ug nagprotekta sa iyang pamilya naghimo sa buhat sa Dios. Ang matag sister kinsa nagpuyo isip usa ka babaye sa Dios nahimong usa ka sanag nga pagasundon sa uban ug nagtanom og mga liso sa matarung nga impluwensya nga pagaanihon sa umaabut nga mga dekada.”⁴

Gikan sa mga Kasulatan

1 Mga Taga-Corinto 12:4–18; 1 Timoteo 6:18–19; Mosiah 4:27; Mga Artikulo sa Hugot nga Pagtuo 1:13

Gikan sa Atong Kasaysayan

Si Eliza R. Snow, kinsa nakaserbisyo isip sekretarya sa dihang ang Relief Society giorganisar sa Nauvoo, gisugo ni Presidente Brigham Young (1801–77) sa pagbiyahe sa tibuok Simbahan, sa pagtabang sa mga bishop sa pag-organisar sa Relief Society sa ilang mga ward.

Si Sister Snow mitudlo: “Kon adunay anak nga mga babaye ug mga inahan sa Israel nga mobati nga gamay ra [limitado] ang kasamtangan nilang kalibutan, karon ilang makita ang igo nga gidak-on sa matag gahum ug kapabilidad sa paghimo og maayo nga mao gayud ang gituga kanila. … Si Presidente Young mihatag sa yawe ngadto sa usa ka halapad ug dako nga buluhaton ug pagkamapuslanon.”⁵

Paghulagway sa litrato pinaagi ni Jerry Garns