Ila-ilaha si Brother Joseph

Kahibalo kamo nga si Joseph Smith mao ang unang propeta niining ulahing mga adlaw, apan kahibalo ba kamo nga siya ganahan kaayong mokatawa ug magpakatawa sa mga tawo? o nga siya ug ang iyang asawa, si Emma, misagop og kaluha? Ania ang pipila sa ubang mga butang nga wala ninyo mahibaloi kabahin ni Propetang Joseph:

Si Joseph Smith Jr. natawo niadtong Disyembre 23, 1805, sa Sharon, Vermont, USA, ug gipanganlan gikan sa iyang amahan. Ang mga igsoon ni Joseph, gikan sa kinamagulangan, mao sila si Alvin, Hyrum, Sophronia, Samuel Harrison, Ephraim, William, Katherine, Don Carlos, ug Lucy.
Sa dihang si Joseph syete anyos, siya gitipos. Siya naayo sa hilanat apan aduna pay impeksyon sa iyang wala nga paa. Siyam ka bukog ang gitangtang nga walay anesthesia (pangpawagtang sa sakit). Siya naglakaw nga kiang og gamay sa tibuok niyang kinabuhi.¹
Si Joseph 14 anyos sa dihang siya nag-ampo og kusog ug nakakita sa Langitnong Amahan ug ni Jesukristo (tan-awa sa Joseph Smith—Kasaysayan 1:17).
Ang magulang nga lalaki ni Joseph, si Alvin, namatay sa dihang si Joseph 17 anyos. Hapit 13 ka tuig ang milabay si Joseph nakakita ni Alvin sa usa ka panan-awon sa celestial nga gingharian (tan-awa sa D&P 137:5–7).
Si Isaac Hale, ang amahan ni Emma, wala ganahi ni Joseph ug dili gusto nga sila magminyo. Sila si Joseph ug Emma mihukom sa pagtaban ug nagminyo niadtong Enero 18, 1827.²
Sila si Emma ug Joseph naminyo sulod sa 17 ka tuig ug adunay 11 ka mga anak, ang 6 niini namatay sa bata pa.
Human ang iyang ngipon natipak sa dihang siya giatake sa manggugubot niadtong 1832, hungaw na mosulti si Joseph.³
Malingaw kaayong magdula si Joseph. Ang ingon nga mga dula naglakip sa pagdula og bola, layugay, labayanay og snowballs, pangisda, ug pulling sticks.⁴
Usa sa unang Santos sa Ulahing mga Adlaw mihulagway sa tingog ni Joseph nga sama sa “mga dalugdog sa Langit.”⁵
Si Joseph kusgan ug taas, mga 6′2″ (1.9 m) ug mitimbang og mga 200 pounds (91 kg).⁶
Si Joseph dili lamang ang Presidente sa Simbahan, apan siya usab midagan sa pagka-presidente sa Estados Unidos.⁷
Human sa pagkamatay ni Joseph, si Elder John Taylor (1808–87), nga sa una anaa sa Korum sa Napulog Duha ka mga Apostoles, misulat mahitungod kaniya, “si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi” (D&P 135:3).