Pagdala sa Primary ngadto sa Panimalay
Ang mga Kasulatan Nagtudlo Kanako Mahitungod sa Pagkatawo sa Manluluwas ug sa Ikaduhang Pag-anhi
Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.
“Kay uban sa kahimayaan sa iyang Amahan moanhi ang Anak sa Tawo uban sa iyang mga manolunda; ug unya pagabalusan niya ang matag-usa sa tumbas sa iyang mga binuhatan” (Mateo 16:27).
Sulod sa liboan ka katuigan, ang mga propeta nagpamatuod nga si Jesukristo, ang Anak sa Dios, matawo dinhi sa yuta. Sa mga kasulatan, atong mabasa kon unsa ang giingon niini nga mga propeta. Sa Daang Tugon, si Isaias miingon nga si Jesus mamahimo nga Prinsipe sa Kalinaw ug siya mamahimo nga ulo sa matuod nga Simbahan. Sa Basahon ni Mormon, si Nephi nakakita sa inahan ni Jesus, nga si Maria, sa usa ka panan-awon, ug nakita niya si Jesus nga nanudlo sa mga tawo dinhi sa yuta. Si Haring Benjamin mitudlo sa iyang katawhan mahitungod sa mga milagro nga himoon ni Kristo kon siya moanhi na sa yuta.
Pipila ka tuig sa wala pa matawo ang Manluluwas, si propeta Samuel mipatong sa usa ka paril sa pagsulti sa mga Nephite mahitungod sa mga timailhan nga mopakita. Miingon siya nga kon ang Manluluwas matawo, usa ka bag-o nga bitoon mopakita sa langit. Sa Bag-ong Tugon atong mabasa ang mahitungod sa sama nga bitoon—ang mga Mago misunod niini aron sa pagpangita sa bata nga Kristo.
Sa mga kasulatan, ang mga propeta nagtudlo usab kabahin sa Ikaduhang Pag-anhi ni Jesukristo nganhi sa yuta. Sa Basahon ni Mormon, si Moroni nagpamatuod kabahin sa pagbalik sa Manluluwas. Sa Daang Tugon, si Malaquias namulong kabahin sa manghitabo sa katapusang mga adlaw sa dili pa ang Ikaduhang Pag-anhi.
Ang mga kasulatan naglangkob sa pagpamatuod sa mga propeta kabahin ni Jesukristo gikan sa nagkalain-laing kapanahunan sa kasaysayan. Sa mga kasulatan, usab atong mabasa ang mahitungod sa ehemplo ni Jesus. Atong gikinahanglan ang pagsunod sa Iyang ehemplo samtang mangandam kita kon Siya mobalik sa pagpuyo dinhi sa yuta pag-usab.
Kalihokan
Pwede kamong mohimo og kaugalingon ninyong libro sa mga litrato kabahin sa kinabuhi ni Jesukristo. Guntinga ang mga pahina nga naa sa pahina 65. Lungagi diha sa matag pahina nga gimarkahan ug ihapnig ang matag pahina nga sunod-sunod. Paggamit og hilo nga ihigut agi sa lungag sa mga pahina. Mahimo ninyong matan-aw kini nga libro uban sa inyong pamilya panahon sa family home evening ug hisgutan ang mahitungod sa kinabuhi sa Manluluwas.
Mga paghulagway pinaagi ni Paul Mann