Mabinationg mga Gasa

Nganong ang mga Mago mihatag kang Jose ug Maria og bulawan, incienso, ug mirra?

Daghang mga tawo ang nagtuo nga ang paghunahuna mao ang mahinungdanon nga kabahin sa paghatag og gasa. Tingali tungod kay ang panghunahuna uban sa regalo makapahimo niini nga sobra pa sa usa ka mapuslanon o makapainteres nga butang—kini makapahimo sa regalo nga simbolo sa gugma o konsiderasyon sa tighatag alang sa dumadawat. Ang ubang mga regalo nagpasabut usab nga labaw pa sa panghunahuna sa regalo; kini nga matang sa mga regalo adunay simbolo nga nadawat sa tanan nga nagdugang og kahulugan. Kon ang usa ka regalo aduna niining tulo —praktikal nga gamit, personal nga bili, ug makahuluganon nga simbolo—kini mahimong mao ang labing mabination ug dinayeg nga regalo sa tanan.

Ikonsiderar ang panghunahuna sa mga regalo nga bulawan, incensio, ug mirra nga gihatag sa mga Mago ngadto sa batang Kristo (tan-awa sa Mateo 2:11). Ang Biblia wala maghisgut nganong ang mga Mago midala niining piho nga mga regalo, apan kining tanang tulo ka mga regalo adunay praktikal nga bili ug tingali may makahulugan nga simbolo alang sa Anak sa Dios ug sa Iyang yutan-ong mga ginikanan.

Bulawan

Praktikal nga gamit: Alang sa batan-ong magtiayon kinsa sa dili madugay makagasto sa pagbiyahe ngadto sa Ehipto aron sa paglikay sa kasuko ni Herodes, ang bulawan mahimong bililhon kaayo nga regalo.

Makahuluganon nga simbolo: Ang bulawan mao ang sagad nga regalo alang sa mga hari (tan-awa sa 1 Mga Hari 9:14, 28) tungod kay kini nagsimbolo sa pagkaharianon ug kahalangdon—angay nga regalo alang sa “Hari sa mga hari” (1 Timoteo 6:15).

Incensio

Praktikal nga gamit: Gawas nga kini dako og kantidad, ang incensio gigamit alang sa mahumot nga alimyun ug pahumot.

Makahuluganon nga simbolo: Ang incensio hinimo gikan sa kahoy sa tam-is nga pasas ug gigamit sa mga ordinansa sa priesthood, sa halad nga sinunog (tan-awa sa Levitico 2:1), ug sa lana nga idihog sa mga pari. Busa, kini nagrepresentar sa priesthood sa Ginoo ug sa Iyang tahas isip Kordero sa Dios nga isakripisyo alang kanato (tan-awa sa Juan 1:29).

Mirra

Praktikal nga gamit: Ang mirra, pait nga lana gikan sa kahoy sa pasas, bililhon usab sa ekonomikanhon nga paagi apan mas makatabang kang Maria ug Jose alang sa mga gamit niini sa medisina.

Makahuluganon nga simbolo: Sa Bag-ong Tugon, ang mirra sa kasagaran may kalabutan sa pag-embalsamar ug paglubong tungod sa kalidad niini sa pag-preserbar (tan-awa sa Juan 19:39–40). Ang gamit sa medisina sa mirra mahimong magsimbolo sa tahas [role] ni Kristo isip Gamhanan nga Tig-ayo, ug ang gamit niini sa mga lubong mahimong magsimbolo sa “pait nga kopa” nga Iyang imnon sa dihang Siya nag-antus alang sa atong mga sala (tan-awa sa D&P 19:18–19).

Paghulagway pinaagi ni Scott Greer