Giunsa Nako sa Pagkasayud
Ang Ginoo Mibubu og mga Panalangin
Naghunahuna ako, “Kinsa ang Dios? Si Buddha ba, Jesukristo, o ubang lain nga dios?”
Natawo ako sa Cambodia, diin kadaghanan sa mga tawo mga Buddhist. Human nga ang rehimen nga Khmer Rouge mipatay og daghan kaayong mga tawo, daghan sa mga naluwas wala makasabut kon ngano, nga kon duna may Dios, Siya motugot man nga mahitabo kini sa among katawhan. Sa edad nga 14, naghunahuna usab ako sa samang butang.
Pagkatapos sa rehimen, daghang mga relihiyon ang gisugdan sa pagdawat sa Cambodia. Nalibug ako tungod kay ang mga simbahan nagtudlo og labihan ka daghang lahi-lahi nga mga butang. Ang akong pamilya nagpabiling mga Buddhist, apan gusto ako og mga tubag sa mga pangutana sa akong kalag: diin kita gikan, nganong nia kita dinhi, ug asa man kita padulong human niining kinabuhia?
Usa ka adlaw samtang miuli ko gikan sa eskwela, ang akong tiya miingon kanako nga duha ka batan-ong lalaki nagsul-ob og puti nga mga polo ug kurbata miadto kaniya naghisgot mahitungod kang Jesukristo. Natingala siya tungod kay maayo silang manulti og Cambodian. Gusto kong makakat-on mahitungod kang Kristo. Gusto kong masayud si kinsa ang naghimo kanato. Naghunaha ako, “Kinsa ang Dios? Si Buddha ba, Jesukristo, o ubang lain nga dios?”
Ang akong tiya ug ako midawat sa mga misyonaryo. Atol sa una nga diskusyon, among gibati ang Espiritu nagsulti kanamo nga unsay ilang gisulti matuod. Mihatag sila kanamo og Basahon ni Mormon ug misaad nga kon kami mobasa niini, mamalandong, ug mangutana sa Dios uban sa sinsero nga kasingkasing, may hugot nga pagtuo Kaniya, Siya mopakita sa kamatuoran ngari kanamo. Kini may dakong kahulugan ngari kanako. Midawat ako sa ebanghelyo, kauban sa akong tiya ug sa iyang mga anak. Mga usa ka bulan human niadto, kaming tanan nabunyagan ug nakumpirmahan.
Mitambong ako og seminary sulod sa upat ka tuig ug institute sa usa ka tuig ug nagserbisyo isip magtutudlo sa seminary. Sa nag-edad ako og 19, akong gibati nga kinahanglan kong magmisyon. Gipakigsultihan nako ang akong mga ginikanan, ug miingon sila nga tingali maayo kana nga ideya, mao nga gihatag nako ang akong application. Usa ka bulan ang milabay akong nadawat ang akong tawag sa pagserbisyo ngadto sa Sacramento California Mission, Iningles ug Cambodian nga pinulongan.
Tungod kay akong gidawat ang akong tawag, ang Dios mihatag kanako og daghang panalangin. Ang manghod nakong lalaki wala maghimo og pinakamaayong mga desisyon. Nagpuasa ako ug nag-ampo alang kaniya, ug ang milagro nahitabo sa wala pa ko moadto sa akong misyon. Siya akong gibunyagan, ug aktibo na siya karon sa Simbahan ug nagtambong sa seminary. Ang akong pamilya nakadawat og daghan pang uban nga mga panalangin, ug ang Ginoo mibubu usab og mga panalangin ngari kanako panahon sa akong misyon.
Si Jesus mao ang Kristo. Buhi Siya. Siya nahigugma sa matag usa kanato ug nakaila kanato sa pangalan. Nasayud siya sa atong mga hagit ug mga kalisdanan, ug ako nahibalo nga Siya manalangin kanato samtang maningkamot kita sa pagsunod sa Iyang mga sugo.
Litrato sa maayong kabubut-on ni Kim Koung