Talagsaong mga Kinabuhi Gihinumduman
Presidente Lorenzo Snow (1814–1901)
Bisan tuod siya nahimong ikalima nga Presidente sa Simbahan sa wala madugay, si Lorenzo Snow gamay lamang og interes nga mabunyagan hangtud ang iyang igsoon nga babaye, si Eliza, midapit kaniya sa pagtambong sa mga klase nga Hebreohanon sa School of the Prophets sa Kirtland, Ohio. Nanambong usab diha sa eskwelahan mao sila si Joseph Smith ug ubang mga lider sa Simbahan. Si Lorenzo sa wala madugay nainteresado sa ebanghelyo ug nagpamiyembro sa Simbahan niadtong Hunyo 19, 1836. Si Elder Snow dayon nagmisyon sa Italy, sa Sandwich Islands (karon mao ang Hawaii), ug Great Britain, diin siya mipresentar og kopya sa Basahon ni Mormon ngadto kang Queen Victoria.
Si Elder Snow adunay talagsaong mga gasa nga iyang gigamit sa pagserbisyo sa Ginoo. Sa iyang patriyarkal nga panalangin siya gisaaran nga bisan tuod siya mabuhi hangtud nga matigulang, dili niya mabati ang mga sakit sa katigulangon. Ang iyang kalagsik nakapahimo kaniya nga magpabiling aktibo sa ulahi niyang mga katuigan isip usa ka apostol ug propeta. Gamit ang priesthood siya usab nakapabuhi og pipila ka mga tawo gikan sa kamatayon.
Atol sa panahon ni Presidente Snow isip propeta, ang mga Santos sa Ulahing mga Adlaw sa habagatang Utah nag-antus sa huwaw. Samtang namulong sa usa ka komperensya sa habagatang Utah sa lungsod sa St. George, si Presidente Snow nadasig sa pagsaad sa mga Santos nga moulan ug sila makatagamtam og mabungahon nga ani kon sila mobayad sa ikapulo. Bisan tuod ang mga miyembro mibayad sa ilang ikapulo, daghang bulan na ang milabay nga walay ulan. Si Presidente Snow mihangyo pag-ayo sa Langitnong Amahan nga moulan. Sa wala madugay siya nakadawat og usa ka telegrama nga nagpahibalo, “Nag-ulan sa St. George.”
Sa ibabaw: Litrato ni Lorenzo Snow sa mga 1865. Sa tunga: Presidente Snow (sa tunga) uban sa iyang mga magtatambag sa Unang Kapangulohan, George Q. Cannon (sa wala) ug Joseph F. Smith (sa tuo) mga 1900. Sa ubos: Ang mga Santos sa Ulahing mga Adlaw napanalanginan og ulan alang sa ilang mga tanom human nga mituman sa tambag ni Presidente Snow sa pagbayad og ikapulo.