“Unsaon nako nga maghupot og positibong kinaiya sa umaabut?”

Kitang tanan makasinati og mga panahon nga ingon og adunay mawad-an og kadasig kanunay ug dili maayong mga balita sa personal ug gani usahay sa tibuok kalibutan. Apan kinahanglan natong hinumduman nga kita adunay rason nga molaum tungod sa atong hugot nga pagtuo ni Ginoong Jesukristo.

Sa kinatibuk-ang komperensya sa Abril 2009, si Presidente Thomas S. Monson mipahinumdom kanato sa sugo sa Ginoo nga “maglipay” (D&P 68:6) ug mihatag kanato niining mga pulong sa pagdasig: “Bisan og ang unos nga mga mapanganud magpundok, bisan og ang ulan mobundak kanato, ang atong kahibalo sa ebanghelyo ug ang atong gugma sa Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw nga matarung ug mosunod sa mga sugo. Walay butang niini nga kalibutan nga makapildi kanato.”

Bisan kon ang mga butang ingon og hilabihan ka makalilisang, bisan gani walay gamay nga hayag diha sa unos sa kalangitan, ang atong pagsabut sa ebanghelyo makatabang kanato sa paghupot og positibo nga kinaiya kabahin sa umaabut. Sama sa giingon ni Presidente Monson sa mao gihapon nga pamulong: “Ang umaabut sama kahayag sa inyong hugot nga pagtuo” (“Pagmaya,” Liahona, Mayo 2009, 92).

Pagbasa, Pag-ampo, ug Pahiyum

Mga pipila ka tuig ang milabay, ang kinatibuk-ang kapangulohn sa Young Women mihatag kanamo og 100 porsyento nga hagit: pagbasa sa Basahon ni Mormon matag adlaw, pag-ampo matag adlaw, ug pahiyum. Akong gihunahuna nga ako kining sulayan ug buhaton kutob sa akong mahimo. Sa akong katingala, ang hagit nakahimo og talagsaong kausaban sa akong kinabuhi. Mas malipayon ko, anaa kanako ang Espiritu, ug ako adunay positibo nga kinaiya. Bisan tuod ako kinahanglan gihapong moatubang og pagsulay, ang kalig-on sa Espiritu mitabang kanako sa paglahutay nga malipayon.

Ariana G., 16 anyos, Virginia, USA

Pagbaton og Paglaum

Sa akong hunahuna ang labing maayo nga butang nga atong buhaton sa pagbaton og positibong kinaiya mao ang pagpahiyum ug pagbaton og paglaum! Ang paglaum nakatabang kanako sa akong tibuok kinabuhi sa daghang mga paagi. Kita kinahanglan usab nga maghunahuna nga kita napanalangin pag-ayo ug masayud giunsa kita paghigugma sa atong Langitnong Amahan. Kita makasalig Kaniya og kalinaw sa bisan unsa nga sitwasyon. Ang Iyang Anak miantus alang kanato, busa Siya nasayud sa atong mga kasakit. Pinaagi Kaniya kita makaangkon og paglaum, mamaayo, ug, siyempre, magmalipayon.

Corey D., 18 anyos, Utah, USA

Paghunahuna sa Pag-ula

Ang pagpamalandong sa Pag-ula sa Manluluwas sa kanunay makahatag og paglaum ug makatabang kanato nga malaumon. Kitang tanan makasinati og mga pagsulay niining kinabuhi. Apan pinaagi sa Pag-ula, ang tanang mga pagsulay ug mga problema, temporal ug espiritwal, adunay mga solusyon. Ang Pag-ula makapahimo kanato sa pagkakaplag niining mga solusyon. Ang Pag-ula mao ang dakong pagpakita sa gugma sa Dios alang sa Iyang mga anak. Kini walay kinutuban, ug mao usab ang Iyang gugma alang kanato. Kini makahatag kanato og kaisug ug kalig-on sa pag-atubang sa umaabut nga walay kahadlok.

Daryl A., 18 anyos, Laguna, Philippines

Pagpabiling Matinud-anon

Kining masamok nga mga panahon kabahin sa plano sa Ginoo ug gipanagna na sukad pa sa panahon sa Daang Tugon. Sa tibuok kasulatan, ang Ginoo nagsaad nga ang mga matarung mapanalanginan ug mapreserbar. Samtang kamo magpabilin nga matinud-anon, ang Espiritu Santo makagiya kaninyo sa tibuok panahon sa kalisud, sa paghupay kaninyo, ug sa pagpahinumdom kaninyo nga ang Ginoo adunay plano alang kaninyo. Kon kamo adunay inyong patriyarkal nga mga panalangin, tun-i kini aron makita unsa ang giandam sa Ginoo alang kaninyo.

Rae B., 17 anyos, Washington, D.C., USA

Paghunahuna sa Inyong mga Panalangin

Usa sa mga butang nga naghatag kanako og hingpit nga kalipay ug paglaum niining masamok nga mga panahon mao ang paghunong sa makadiyot ug paghunahuna sa akong mga panalangin ug sa akong kahibalo kabahin sa ebanghelyo. Usa ka butang sama ka yano sa pagbaton og labing suod nga higala o usa ka butang sama ka talagsaon sa plano sa kaluwasan naghatag kanako og hingpit nga kalipay ug nag-agni kanako sa pagpakigbahin sa hingpit nga kalipay. Kini mao ang nakapapositibo sa akong kinaiya.

Annette M., 15 anyos, Michigan, USA

Paghinumdom sa Templo

Kon ako mawad-an og kadasig, ako mamalandong sa mga pulong nga makita sa tema sa Young Women: “Kami nagtuo samtang kami makat-on sa pagdawat ug paghimo niini nga mga hiyas, kami makaandam sa paglig-on sa panimalay ug sa pamilya, makahimo ug makatuman sa sagrado nga mga pakigsaad, makadawat sa mga ordinansa sa templo, ug makatagamtam sa mga panalangin sa kahimayaan.” Ako makakaplag og kahupayan niining mga pulong, ug ako nasayud nga kini matuman sa akong kinabuhi ug sa kinabuhi sa tanang mahiyasong mga batan-ong babaye. Sa walay pagduha-duha, ako adunay paglaum niining sagrado nga mga ordinansa sa templo. Ang mga panalangin sa matarung nga kinabuhi walay kinutuban, ug samtang maghinumdom ko niining mga butanga, ang akong kasingkasing mapuno uban sa hingpit nga kalipay, paglaum, gugma, ug kaisug.

Nathalia M., 18 anyos, Mérida, Venezuela

Pag-apil sa Grupo nga Dumadaug

Aron magbaton og positibo nga kinaiya, kinahanglan kamong masayud niining yano nga kamatuoran: ang team sa Ginoo sa katapusan mao ang mananaug. Ana lang ka sayon. Si Satanas walay gahum batok sa Dios. Tungod kay kita nasayud na sa makadaug, kita kinahanglan nga mag-focus nga magpabilin sa team sa Ginoo. Kon kita magpuyo nga takus sa pagsulod sa templo, kita nagsul-ob sa atong uniporme nga nagpakita ngadto sa Ginoo nga kita anaa sa Iyang team. Pinaagi sa pagbasa sa atong mga kasulatan, sa atong mga pag-ampo, ug pagserbisyo sa atong mga kaigsoonan, kita makakaplag og tinuod nga kalipay nga makapasayon sa pagbaton og positibo nga kinaiya.

Brayden F., 17 anyos, Utah, USA

Pagpalambo og Positibo nga Kinaiya

Ayaw pag-focus niining masamok nga mga panahon. Naghupot ko og “Journal sa Pasalamat.” Matag adlaw ako mosulat bisan og usa lamang ka butang nga ako mapasalamaton nianang adlawa. Bisan unsa ka bati ang adlaw, ako sa kanunay makakita og usa ka butang nga pasalamatan. Ipha ang inyong mga panalangin. Pagpalambo og mapasalamatong kinaiya nga makatabang kaninyo sa pag-focus sa positibong mga butang sa inyong kinabuhi.

Ashlee H., 18 anyos, Oklahoma, USA