Ang Katapusang Pasko ni Linda
J. Audrey Hammer, Utah, USA
Panahon sa akong pagka-sophomore sa Brigham Young University, ang bishopric sa among ward mipalista sa among ward alang sa usa ka Sub-for-Santa nga programa, diin kami mohatag og mga regalo sa Pasko ngadto sa pamilya nga nanginahanglan.
Ang ngalan sa among ward, hinoon, kanunay nga mawala gikan sa mga listahan sa mga bolunter. Sa nagkaduol na ang Pasko, kami wala gihapoy pamilya nga matabangan. Dayon usa sa mga magtatambag sa bishop mipahibalo kanamo kabahin sa usa ka pamilya nga tingali mahimo namong tabangan. Sa dihang among nahibaloan kini nga pamilya, kaming tanan mibati og kasiguroan nga kinahanglan kaming mo-focus kanila.
Si Linda (ang ngalan giusab), kinsa dunay pipila ka anak nga mga lalaki nga nanag-edad og 9 ngadto sa 15, nakigbatok sa kanser sa totoy. Panahon sa kahasol tungod sa maong sakit, ang iyang bana mibiya kaniya. Bag-o lamang siyang mibalhin gikan sa laing estado aron motrabaho sa Provo, Utah, apan nahunong ang trabaho, ug siya wala nay kinitaan.
Sa dihang nahimamat namo si Linda, diha dayon siya among gihigugma sa hilabihan. Napanalanginan kaming makakita kaniya sama sa pagtan-aw sa Manluluwas kaniya—isip usa ka mahinungdanon ug dungganan nga espiritu kinsa nakabuntog og daghang malisud nga mga hagit. Siya dili usa ka proyekto ngari kanamo; hinoon, siya usa ka mahangturon nga higala. Ang matag miyembro sa ward miamot sa pagtabang kaniya ug sa iyang mga anak. Kaming tanan mga batan-ong estudyante sa kolehiyo ug kami usab mga kabus, apan malipayon kaming mihatag tungod kay kami nahigugma kaniya.
Si Linda miadto sa among ward Christmas party, diin niana nga panahon pipila sa mga miyembro sa ward miadto sa iyang apartment ug mipuno sa iyang tukador ug refrigerator og mga pagkaon. Nagdekorasyon sila og usa ka Christmas tree ug gipalibutan kini og mga regalo alang sa tibuok pamilya. Nagbilin usab sila alang kaniya og upat ka bag-ong ligid sa sakyanan ug gibayaran ang abangan sa balay alang sa pipila ka bulan. Dili ako sigurado kon sa unsang paagi ang ginagmay namong kontribusyon nakahimo sa pagkab-ot niadto, apan nahibalo ako nga ang Langitnong Amahan migamit sa among mga pagsakripisyo aron sa pagpanalangin kaniya.
Usa ka tuig human niadto didto ko sa laing student ward, apan mibalik ako atol sa Pasko sa pagbisita sa akong kanhiay nga bishopric. Akong nahibaloan nga ang bana ni Linda mibalik sa pamilya ug ang ilang panalapi natunhay na. Apan ang iyang kanser mibalik ug mikutlo sa iyang kinabuhi. Akong naamgohan nga nakatabang kami paghatag kang Linda sa iyang katapusang Pasko.
Sa pagbati “sa tiunay nga gugma ni Kristo” (Moroni 7:47) nga labihan ka kusog tungod niadto nga kasinatian, akong nakat-onan nga ang tinuod nga gugmang putli usa ka dili mapalit nga espirituhanong gasa nga nagduso kanamo nga molihok sa dapit sa Manluluwas.