Ang Dalan padulong sa Templo
Bisan og ang mga miyembro migamit og lain laing mga agianan, ang mga Santos sa Ulahing mga Adlaw sa Ukraine nakakaplag nga ang tanang dalan sa pagkamatarung nagpadulong ngadto sa templo.
Ang sayo sa kaadlawon nga biyahe subay sa Kiltseva Road sa Kyiv, Ukraine, nagtanyag sa mga nanagbiyahe og daw malinawon nga agianan padulong sa Templo sa Kyiv Ukraine. Diyutay lamang nga mga suga sa sakyanan ang nagsanag lapos sa gabon sa kabuntagon samtang ang mga sakyanan molikay sa gagmayng mga libaong.
Ang sanag sa templo nga anaa sa unahan nagsilbi nga banwag, naghatag og giya nga kahayag nga nagpakita niadtong mga nanagbiyahe ngadto templo sa tukma gayud kon asa sila moadto.
Samtang pipila ang napanalanginan sa pagsunod niining malinawon nga agianan padulong sa templo sukad sa pagpahinungod niini niadtong Agosto 2010, ang uban makapamatuod nga ang ilang mga agianan padulong sa templo dili ingon ka hapsay.
Sa pagsanag sa kabuntagon ug ang adlaw misaka na ibabaw sa kapunawpunawan, ang mga sakyanan ug mga bus mihugop na didto sa Kiltseva Road. Karon napuno sa mga sakyanan, ang kausa malinawon nga agianan nahimo nang usa ka alingug-ngog nga parkinganan.
Nahibalo nga ang trapik usa ka mapaabut nga bahin sa pagbiyahe, daghang mangadtoay sa templo nagpabilin sa karsada, mapailubon nga moirog og ginagmay sa matag higayon una pa ang lain na sad nga paghunong. Ang templo pabilin nga maoy destinasyon, bisan ang biyahe hinay.
Ang uban mopili og laing mga rota. Sa luyo sa templo mao ang pipila ka dili sementado nga mga dalan ug masigpit nga mga karsada. Ang dalan wala mamarkahi og klaro, ug ang mga driver dali rang masimang. Hinoon, kon ang driver mohangad, siya makakita sa tore sa templo, nagsilbi na usab nga giya, nagdapit sa tanan sa pag-adto sa templo.
Ang espirituhanong mga agianan nga gisubay sa mga miyembro sa Ukraine aron makaabut sa balay sa Ginoo daw sama sa mga dalan nga nagpalibut sa templo.
Samtang pipila ka batan-ong mga miyembro napanalanginan nga nagtubo sa Simbahan ug karon nakatambong na sa Templo sa Kyiv Ukraine sa paghimo sa kaugalingon nilang ordinansa, daghan ang nagbiyahe subay sa baga nga espirituhanong trapik aron makaabut didto.
Ang templo, gipahibalo niadtong 1998 ni Presidente Gordon B. Hinckley (1910–2008), nakompleto niadtong 2010. Sulod niadtong dose ka mga tuig, daghang miyembro sa Kyiv Ukraine Stake nagpabilin sa hagip-ot—bisan maingon og hinay—nga dagan, mapailubong naghulat sa templo nga mahuman. Ang uban miagi og laing mga agianan, may panahon nga mawala ang ilang panan-aw sa ilang mga tumong sa templo.
Bisan og ang espirituhanong mga agianan nga gilatas sa mga miyembro aron makaabut sa templo magkalahi, ang matinud-anong mga miyembro sa Ukraine nakakaplag nga ang tanang dalan sa pagkamatarung naggiya kanila og balik padulong sa templo.
Ang Tul-id nga Agianan
Daghang young adult nga mga miyembro sa Eastern Europe nagiyahan ngadto sa ebanghelyo sa batan-on pa. Kining sayo nga kahibalo sa ebanghelyo nagtugot kanila dili lang sa pag-ugmad og pagpamatuod gikan sa ilang kabatan-on apan usab sa pagtukod og lig-on nga desisyon nga maminyo sulod sa templo.
Sila si Nikolai Chemezov ug ang iyang asawa, si Asiya, sa Kharkivs’kyi Ward, gipaila sa ebanghelyo panahon sa ilang kabatan-on—si Nikolai pagka-otso anyos ug si Asiya pagka-tin-edyer.
“Sukad ako nabunyagan, nasayud ako nga ang plano sa Langitnong Amahan mao ang agianan sa kahimayaan,” miingon si Brother Chemezov. “Ang mga pagtulun-an sa Simbahan kabahin sa balaan nga misyon sa pamilya kanunay nga importante ngari kanako.”
Nakamatikod usab si Sister Chemezova sa importansya sa mahangturon nga pamilya sa batan-on pa siya. “Sa dihang misimba ako sa batan-on pa ako nga babaye, gitudloan ako kon unsa ka importante nga mohimo og sagrado nga mga pakigsaad sa templo,” miingon siya. “Kanunay nakong gipangandoy ang usa ka kaminyoon sa templo, ug kanunay akong naningkamot nga mahimong takus aron maminyo sa templo.”
Ang magtiayon nagsugod sa pag-date niadtong 2009. Samtang milambo ang gugma ug ang mga panag-istorya padulong na sa kaminyoon, ang duha nasayud na kon unsay sunod nila nga lakang. “Dihang gipahibalo nila nga ang Templo sa Kyiv ipahinungod inig ka Agosto 2010, nakahukom kami nga magpa-seal didto,” miingon si Sister Chemezova.
“Pagkanindot nga dili na kami magpaabut pa og dugay,” dugang pa ni Brother Chemezov.
Ang magtiayon na-seal sa ilang kaminyoon niadtong Septyembre 1, 2010.
“Kadto ang pinakatalagsaong adlaw sa akong kinabuhi,” miingon si Brother Chemezov. “Gibati nakong napanalanginan nga gunitan ang kamot sa pinalangga nakong si Asiya ug dalhon siya ngadto sa balay sa Ginoo. Luwas ra nga isulti nga nianang adlawa nahimong tinuod ang akong mga damgo—ang damgo nga magmugna og mahangturon nga pamilya.”
Ang Taas nga Dalan
Bisan og ang agianan padulong sa mahangturon nga kaminyoon ingon ka tul-id alang sa mga miyembro sa Vynohradars’kyi Ward nga sila si Petr ug Adalina Mikhailenko, ang dalan taas kaayo. Ang Mikhailenkos kauban sa unang mga pamilya nga mipasakop sa Simbahan sa Ukraine, nga nabunyagan niadtong 1993—duha lamang ka tuig human ang unang branch naestablisar didto sa Kyiv.
Bisan pa niini, ang gilay-on sa templo ug uban pang mga butang nakapugong sa magtiayon nga ma-seal sulod sa daghang katuigan. Wala mawad-i sa paglaum, nagpabilin silang masaligon sa usag usa ug sa ilang pangandoy sa usa ka mahangturon nga kaminyoon.
“Mapailubon nakong gihulat ang templo,” miingon si Brother Mikhailenko. “Wala gayud sa hunahuna ang pagbiya sa Simbahan. Ang agianan kanunay nga klaro.”
Human si Presidente Thomas S. Monson mipahinungod sa templo niadtong Agosto 2010, ang kamatinguhaon sa magtiayon nga ma-seal walay kasudlan. “Sayo kaayo kaming nangadto sa adlaw nga kami i-seal nga wala pa gani mangabli ang templo,” miingon si Sister Mikhailenko.
Ang magtiayon wala mag-inusara. Daghang kaubanan nga mga miyembro sa ward miadto sa templo niana usab nga adlaw, mahinamon nga makigbahin sa kalipay sa mga Mikhailenkos.
“Ang sealing talagsaon kaayo,” miingon si Sister Mikhailenko. “Adunay pagbati nga ikaw wala pa mohigugma sa imong kapikas sama sa imong paghigugma kaniya nianang higayona.”
Ang pagbati sa gugma nagpadayon sukad nianang adlawa. “Adunay tinuoray nga kalainan sa among relasyon,” miingon si Brother Mikhailenko. “Dugay na kaming naminyo, apan karon anaa ang lahi nga pagbati. Gusto kaming mobuhat pa og dugang alang sa usag usa, ug kini among gibuhat uban sa dugang nga paghigugma.”
Balik sa Agianan
Sila si Andrei ug Valentina Dudka sa Vynohradars’kyi Ward gipaila sa ebanghelyo pinaagi sa mga silingan niadtong 2003. Human makighimamat sa mga misyonaryo sulod sa pipila ka semana, ang magtiayon nakahukom nga magpasakop sa Simbahan.
Bisan og ang mga Dudkas mahinamon sa pagkat-on sa mga kamatuoran sa ebanghelyo sama sa panginahanglan og mga templo sa ulahing mga adlaw ug sa kalagmitan nga makabaton og mahangturon nga pamilya, anam-anam sila nga nahimong dili aktibo. “May nakit-an lamang kaming mga rason sa dili pagsimba,” miingon si Sister Dudka. “Among gipaundayunan ang mga butang—sama sa kapoy kaayo kami o dunay salida sa TV nga gusto namong tan-awon.”
Ang kakulang sa pagkaaktibo sa mga Dudka dili maayo og epekto sa ilang kalipay. “Nagsugod kami sa pagkakita sa tinuoray nga kalainan tali sa kinabuhi nga naa sa Simbahan ug sa kalibutanong kinabuhi human kami mibiya sa Simbahan,” miingon si Brother Dudka. “Dili kami malipayon.”
Human sa mga upat ka bulan nga wala magsimba, si Sister Dudka nakamatngon ra. “Usa ka Dominggo miingon ko, ‘Kon dili ko mosimba karon, basin dili ko makalahutay.’” Miingon siya, “Sama ako sa usa ka tawo nga mipalabay og mga adlaw nga wala moinom og tubig. Akong gikinahanglan kana nga tubig.”
Human maaktibo og balik, si Sister Dudka mapailubon nga nag-ampo alang sa iyang bana ug miawhag kaniya sa pagbalik sa simbahan uban kaniya. Mga tunga sa tuig human si Sister Dudka mibalik sa simbahan, mao usab ang iyang bana.
“Ang pag-ampo sa akong asawa nakaapektar kanako,” miingon si Brother Dudka. “Akong naamgohan nga isip tighupot sa Melchizedek Priesthood, ako adunay responsibilidad nga mahimong aktibo nga miyembro. Ako miangkon nga kon wala ang Dios, wala akoy mahimo.”
Human mobalik ang mga Dudka sa Simbahan, mibalik ang ilang mga hunahuna ngadto sa makaluwas nga mga ordinansa sa templo. Ang magtiayon nakigduyog sa ubang mga Santos sa Ulahing Adlaw nga Ukrainian sa paglipay atol sa groundbreaking sa templo niadtong 2007.
“Human nila gisugdan ang pagtukod sa templo, kanunay kaming moagi dito ug motan-aw sa buhat nga nahimo,” miingon si Brother Dudka.
“Milukso ako og taas sa dihang akong nakita sila nga mipahimutang sa unang bato,” dugang pa ni Sister Dudka.
Dihang ang estatuwa ni anghel Moroni gibutang na ibabaw sa templo, adunay daghan ang nagginaksanay ug nanghilak nga mga Santos ug ilabi na sa mga Dudka.
“Dihang sa katapusan nahuman na nila ang pagtukod sa templo, nahupay kami nga nasayud nga kami takus mosulod,” miingon si Brother Dudka.
Ang mga Dudka miingon nga ang pagka-seal sulod sa templo nagtukod diha kanila og mas lig-on nga panglantaw sa kahangturan sa kinabuhi. “Makasabut kamo nga ang inyong pamilya dili lamang diay ikaw ug ang imong bana—karon kabahin ang Ginoo niini,” miingon si Sister Dudka. “Nagtan-aw kami karon sa usag usa gamit ang mahangturong mga mata.”
Gikan sa ibabaw: Si Asiya ug si Nikolai Chemezov gi-seal sa Templo sa Kyiv Ukraine tulo ka adlaw human kini mapahinungod. Si Petr ug si Adalina Mikhailenko mapasalamaton nga ang ilang apo, si Masha, makapaabut nga makasulod sa templo sa iyang yutang natawhan. Si Andrei ug si Valentina Dudka mibisita sa dapit sa templo kanunay samtang ang templo gitukod pa.
Litrato pinaagi ni Marina Lukach
Ibabaw: litrato sa maayong kabubut-on sa pamilyang Chemezov; ubang mga litrato pinaagi ni Chad E. Phares