Kami Walay Makaon
Estilita Chacin Hart, Utah, USA
Sayo ko nga mibangon nianang adlaw sa dili pa ang Pasko nabalaka tungod kay kami walay bisan unsa nga ipanihapon sa Pasko nianang gabhiuna; ni kwarta para ipalit og pagkaon. Nagpuyo ko kauban sa akong igsoon nga babaye nga si Edicta sa Maracaibo, Venezuela.
Sa dihang mibangon ko, miluhod ko ug misugod sa pag-ampo. Mihangyo ko sa Langitnong Amahan sa paghinumdom kanamo. Mihangyo ko Kaniya sa paghatag kanamo bisan unsa lang nga pagkaon alang nianang espesyal kaayo nga adlaw, ang la Noche Buena (Bisperas sa Pasko).
Samtang nag-ampo ko, napuno ko sa kalinaw. Ingon og nakadungog ko og hinay nga tingog nga nagsulti kanako, “Ang tanan mamaayo ra. Ayaw og kabalaka.” Sa dihang natapos nako sa akong pag-ampo, nasayud ko nga adunay maayo nga mahitabo nianang adlawa.
Human nako og pukaw sa akong igsoon nga babaye, nanilhig ko sa atubangang balkon. Ang silingan sa atbang sa kalsada nakakita kanako ug miduol aron sa paghatag kanako og 1,000 bolívares nga wala niya mabayari kanako sa akong pagburda og usa ka mantel ug mga dekorasyon sa Pasko alang kaniya. Nasurprisa ko tungod kay wala ko makahinumdom nga naa siya’y bayranan kanako.
Midagan ko sa kwarto sa akong igsoon nga babaye ug mipakita kaniya sa kwarta nga akong nadawat. Nasurprisa, siya nangutana kon asa ko kini nakuha. “Sa Dios ang tanan mahimo” (Mateo 19:26), mitubag ko.
Mga pipila ka minuto ang milabay nakadungog kami og usa ka tawo nga nanawag sa akong igsoong babaye. Dihang among nasayran nga kini mao gihapon nga silingan, migawas kami aron sa pakig-istorya niya. Iya dayon gibayaran ang akong igsoong babaye og 1,000 bolívares nga iyang bayranan sa pagtahi. Ang akong igsoon nga babaye ug ako malipayon kaayo tungod kay kami makapalit na og pamahaw, paniudto, ug panihapon.
Sa among pag-abut gikan sa pagpangumpra, among nakit-an ang usa ka higala nga nagpaabut kanamo. Siya mihangyo kon mahimo ba nga siya mag-la Noche Buena uban kanamo tungod kay dili siya gusto nga mag-inusara sa Bisperas sa Pasko. Kami mipasabut nga yano lang ang among panihapon sa balay apan siya mahimo kaayong moapil kanamo. Siya mitampo og 2,000 bolívares aron makatabang sa pagbayad sa mga gastuhonon sa panihapon. Dili gyud kami makatuo kon sa unsa ka dako ang panalangin sa Dios kanamo.
Pagkataud-taud ang akong pag-umangkon nga babaye mitawag kanamo nga siya moabut inigka gabii ug magdala og 33 ka libras (15 kg) nga gi-marinate nga karne. Pagka-udto ang akong pag-umangkon nga lalaki miabut uban sa iyang asawa ug sa ilang mga anak. Sila mihangyo kon sila makabalik nianang gabhiuna magdala og mga pagkaon ug magsaulog sa Bisperas sa Pasko uban kanamo.
“Kami dili mag-andam og dako nga panihapon,” kami mitubag, “apan kami adunay paigo alang sa tanan.”
Nianang gabhiuna si Edicta ug ako nag-baked og chicken, nag-potato salad, nag-lemon dessert, ug nag-majarete, usa ka tradisyonal nga pudding dessert hinimo sa lubi, nga among gitagamtam uban sa among mga bisita. Apan kami unang nagpasalamat sa Langitnong Amahana sa talagsaong mga panalangin nga Iyang gihatag kanamo. Nianang adlawa kami gipahinumduman nga kon kami adunay hugot nga pagtuo ug dili magduha-duha, Siya mopanalangin kanamo kon kami mangayo sa Iyang panabang.