Ang Christmas Tree

Ni Harriet R. Uchtdorf

Gikan sa Harriet R. Uchtdorf, “‘Der Weihnachtsbaum’: Memories Linger of Small Tree,” Church News, Dis. 12, 2009, 11.

Ang Ikaduhang Gubat sa Kalibutan bag-ohay lang nga nahuman, ug kadaghanan sa mga tawo sa Germany gamay lang kaayo og pagkaon o kwarta. Ang akong birthday duol na mga pipila na lamang ka semana sa dili pa ang Pasko. Wala ko magdahum nga makadawat og bisan unsang mga regalo sa Pasko o birthday, nasayud gayud—bisan nga gamay pa nga batang babaye—nga ang among mga ginikanan naningkamot sa pag-atiman sa among nag-unang mga panginahanglan. Sa among dako nga siyudad, ang kagutom anaa sa kanunay. Kini panahon sa kaguol ug kalisud.

Sa akong birthday, sa akong katingala ug kalipay, usa ka talagsaon nga regalo—alang lang gyud kanako—gibutang sa lamesa sa kusina. Kini mao ang labing nindot nga regalo nga akong mahunahuna: usa ka gamay nga Weihnachtsbaum, usa ka Christmas tree, mga usa lang ka pye (30 cm) kataas, gitabunan og tandugonon nga dekorasyon nga gikinamot sa paghimo gikan sa tinfoil. Ang tinfoil midan-ag sa kahayag sa among sala sa usa ka makapaingganyo nga paagi. Samtang akong gisusi ang mga dekorasyon nga hinimo sa tinfoil, ako nakaamgo uban sa katingala nga kini adunay sulod nga gagmayng mga piraso sa asukar nga gilatik. Kini sama sa usa ka milagro. Asa ang akong inahan nagkuha sa gamay kaayo nga kahoy sa evergreen, sa tinfoil, ug sa kanihit sa asukar?

Hangtud niining adlawa, wala ko masayud kon sa unsang paagi iyang nahimo kining milagro sa panahon diin wala niadtong talagsaon nga mga butang. Kini nagpabilin sa akong kasingkasing isip simbolo sa dakong gugma sa akong ginikanan alang kanako, isip simbolo sa paglaum, gugma, ug ang tinuod nga kahulugan sa Pasko.

Atol sa panahon sa Pasko, gihapon adunay Christmas tree sa among sala, karon giadornohan og mga suga ug daghang klase sa dekorasyon. Kon kami mag-uban sa among mga anak ug mga apo, ang kaanindot sa Christmas tree ug ang nagkidlap-kidlap nga mga suga miinit sa akong kasingkasing ug nagdala og tam-is nga mga panumduman sa panghitabo sa malipayong pamilya nga naggikan sa usa ka gamay nga Christmas tree uban sa mga dekorasyon sa sinaw nga tinfoil.

Mga Dekorasyon nga Gikinamot sa Paghimo

Isurprisa ang inyong pamilya pinaagi sa pagbuhat og pipila sa mga dekorasyon nga gikinamot sa paghimo ninyo mismo. Kini mao ang inyong gikinahanglan:

usa ka holiday-shaped cookie cutter o gamay nga baso

tuskig nga papel sama sa card stock o poster board

lapis

gunting

aluminum foil (opsyonal)

puti nga glue

mga igmamarka (o mga krayola o mga lapis nga de kolor)

yarn, laso, hilo

1. I-trace ang cookie cutter o ang baso diha sa tuskig nga papel.

2. Patabang sa inyong ginikanan sa paggunting sa porma.

3. Paggunting og gamay nga piraso sa foil ug gamita kini sa pagtabon sa porma. I-glue ang mga kilid sa foil ngadto sa luyo sa dekorasyon. (Kon kamo wala mogamit og foil, laktawi kini nga lakang ug sunda ang nabilin nga mga lakang.)

4. Butangi og ginagmay nga glue sa atubangan sa dekorasyon. Paugha gyud ang glue.

5. Gamita ang mga igmamarka sa pagkolor sa tunga-tunga sa mga linya sa glue. (Kon kamo wala maggamit og foil, mahimo usab mong mogamit og mga krayola o mga lapis nga de kolor.)

6. Patabang sa inyong ginikanan sa paglungag sa ibabaw sa dekorasyon. Butangi og gamay nga piraso sa yarn, ribbon, o hilo ngadto sa lungag ug ihigot kini sa ibabaw.

7. Ibitay ang inyong dekorasyon sa Weihnachtsbaum sa inyong pamilya o ihatag kini isip regalo.

Mga paghulagway pinaagi ni Taia Morley