Kadto nga mga Pulong
“Dili kamo magpanumpa sa akong ngalan sa bakak, dili mo usab pagpasipalahan ang ngalan sa imong Dios” (Levitico 19:12).
Si Shelby dili ganahan nga makadungog og ngil-ad nga mga pulong, ilabi na kon ang iyang mga higala sa eskwela mopasipala sa ngalan sa Ginoo.
“Palihug ayaw lituka kana nga mga pulonga kon naa ko,” moingon siya sa iyang mga higala.
Apan usahay makalimot sila, ug siya kinahanglang mopahinumdom kanila.
Usa ka adlaw ang higala ni Shelby nga si Beth mipasulirat sa iyang mata ug miingon, “O, diay no, nakalimot ko. Wala nay molitok niana nga mga pulong sa atubangan ni Shelby. Naningkamot siya nga mahimo tang buotan sama niya.”
Ang ubang mga babaye nangatawa.
Naulaw si Shelby. Lain ang iyang gibati tungod sa kanunay nga paghangyo sa iyang mga higala sa dili paglitok niadto nga mga pulong kon naa siya—ilabi na kon magtuo sila nga dili ngil-ad ang mga pulong.
Dihang si Shelby nauli gikan sa eskwelahan, miligid siya sa iyang higdaanan. Ang iyang mama miabut pipila ka minuto wala madugay, ug gisultihan siya ni Shelby unsay nahitabo.
“Paningkamuti nga dili ka mahasol mahitungod niana,” si Mama miingon. “Buhata lamang kanunay ang husto nga butang, ug sa kadugayan ang imong mga higala dili na ganahang molitok nianang mga pulonga.”
“Nganong mahasol man ko kon ang akong mga higala molitok niini nga mga pulonga?” Nangutana si Shelby. “Dili man ako ang mipasipala.”
“Ang mga propeta mitudlo kanato nga kinahanglang takus kita kanunay nga mobati sa Espiritu. Ang ngil-ad nga mga pulong makasilo sa Espiritu,” miingon si Mama.
Si Shelby nahinumdom sa mga panahon nga siya mibati sa Espiritu: sa family home evening, dihang mihatag siya sa iyang pagpamatuod, dihang gipanalanginan siya sa iyang amahan. Si Shelby ganahan nga mobati sa Espiritu, ug dili siya gusto nga mohimo og bisan unsa nga mosilo niana nga mainit, malinawon nga kahupayan.
Mihukom siya nga kanunay siyang mahimong ehemplo ngadto sa iyang mga higala ug tabangan silang makasabut nga dili siya gusto nga makabati niadto nga mga pulong.
Sa sunod adlaw sa eskwelahan, nadungog na usab niya ang maong mga pulong.
“Palihug ayaw lituka kana nga mga pulonga kon naa ko,” si Shelby mihangyo kang Becca.
Si Becca mitutok kang Shelby ug dayon wala na siya panumbalinga. Nalipay si Shelby nga nakasulti siya apan nasubo nga nalain ang iyang higala.
Sa pag-recess si Shelby nakadungog na usab nga adunay militok sa mao nga mga pulong. Niining tungora si Beth kadto.
“Palihug ayaw lituka kana nga mga pulonga kon naa ko,” miingon si Shelby.
“Pasayloa ko,” si Beth miingon, mipasulirat sa mata.
Gibati na usab ni Shelby nga kataw-anan siya.
Sa practice sa softball human sa klase, si Shelby nakaigo sa bola. Miuntol kini ngadto sa una nga base ug mitugpa kini nga nag-una kang Shelby. Si Shelby nakadungog kang Bonnie, ang bag-o nga babaye sa team, nga mipasipala sa ngalan sa Ginoo.
Si Shelby nagpanuko. Naluya na siya sa paghangyo sa mga tawo sa dili pagsulti niadto nga matang sa mga pulong kon naa siya. Dili siya gusto nga kataw-an siya sa ubang mga babaye.
“Palihug ayaw lituka kana nga mga pulonga kon naa siya.”
Si Shelby milingi sa pagtan-aw kon si kinsa ang misulti.
Si Beth misulti kang Bonnie nga si Shelby usa ka Santos sa Ulahing Adlaw ug siya dili molitok og ingon niadto nga mga pulong ug dili usab komportable nga makabati niadto nga mga pulong.
Si Bonnie milingi ug mitan-aw kang Shelby. “Pasayloa ko, Shelby. Wala ko kahibalo.”
Si Beth mingisi kang Shelby. “Sa akong pagtuo kaming tanan nagkaparehas na nimo,” miingon si Beth.
Mipahiyom si Shelby. Nalipay siya nga mihukom siya nga mahimong maayo nga ehemplo sa iyang mga higala ug sa pagsunod sa tambag sa propeta sa pagbaton sa Espiritu uban kaniya.
Paghulagway pinaagi ni Ben Simonsen