Sama sa Paghupay ni Kristo Kanato
Angela Fallentine, New Zealand
Mao kadto ang among una nga Pasko sa Amihanang Isla sa New Zealand—usa ka matahum ug madanihon nga dapit. Hinoon bisan sa sanag nga adlaw ug kamabination sa mga miyembro sa Simbahan, akong gibati ang dako nga kamingaw sa akong mga ginikanan ug mga igsoon. Namalhin kami gikan sa Estados Unidos sayo nianang tuiga, ug gimingaw ako.
Sa bag-o namong area ang akong bana ug ako nahimong higala sa mga Wilson, usa ka bag-o nga pamilya nga taga-Ireland sa lahi nga Kristiyanong tinuohan kinsa bag-ohay lang usab nga nangabut sa New Zealand. Si Noleen Wilson kauban nako sa trabaho, ug wala madugay nahimo kaming suod nga managhigala, nga nag-inambitay og mga kasinatian sa pagpanglangyaw ug sa among gugma sa among bag-o nga panimalay. Sa nagkalambo ang among panaghigalaay, nakamatngon ako nga ang ilang pamilya nag-antus usab sa kamingaw ingon man sa mga pagbati nga nabug-atan. Duna silay tulo ka batan-ong mga anak ug ang ikaupat hapit na.
Usa ka gabii dihang akong gibati ang kamingaw ug nagmahay sa kaugalingon, aduna akoy impresyon nga ang pinakamaayong paagi sa pagbuntog sa kamingaw mao ang pagserbisyo sa lain—ilabi na sa mga Wilson. Ang akong bana ug ako nakahukom nianang gabhiona nga among sugdan sa pagsaulog ang 12 ka adlaw sa Pasko uban sa mga Wilson pinaagi sa pagbilin og mga mensahe ug ginagmayng mga gasa dapit sa ilang pultahan nga dili magpaila. Sa matag gabii ang akong kamingaw nailisan og kahinam ug pagpaabut samtang molighot kami og kadiyot adto sa ilang panimalay aron sa pagbilin og mensahe ug gasa, manuktok sa ilang pultahan, ug dayon managan nga may dagkong pahiyom sa among mga nawong.
Matag adlaw sa trabaho si Noleen mosulti kanako mahitungod sa misteryuso nga “mga dewende sa Pasko” nga mibisita sa milabayng gabii. Iyang isulti ang istorya sa mga bata nga naghinamhinam sa pag-abut sa ilang mga bisita, kinsa mihimo sa Pasko sa pamilya nga malipayon. Sa pipila ka gabii ang mga kabatan-onan sa ward miapil kanamo sa among kalingawan.
Sa katapusan nga gabii, bisperas sa Pasko, ang mga Wilson nagbilin og mensahe ug mga cookies dapit sa ilang pultahan, naghangyo nga sila unta makahimamat sa ilang mga dewende. Sa dihang nangabut kami kauban sa mga kabatan-onan sa pagkanta og mga daygon isip among katapusan nga gasa, ang mga bata napuno sa kalipay ug ang among mga higala migakos kanamo sa mga gakos nga hugot ug sa mga luha sa pasalamat. Ang kamingaw sa akong kasingkasing napulihan sa gugma ug hingpit nga kalipay, ug ang higot sa panaghigalaay tali sa among pamilya nalig-on.
Wala madugay nakadawat kami og e-mail gikan sa usa ka tawo sa simbahan sa mga Wilson kinsa miingon nga natandog siya sa unsay among nahimo alang sa pamilya diin siya nangutana mahitungod sa among Simbahan ug sa mga buhat sa pagserbisyo nga among gihatag alang sa uban. Ang kongregasyon wala pa gayud makadungog kabahin sa 12 ka adlaw sa Pasko ug karon kini nga tradisyon gihinumduman tungod sa mga Santos sa Ulahing mga Adlaw.
Dili gayud ako makalimot niadtong una nga Pasko didto sa New Zealand, diin nakakat-on ako sa wala damha nga paagi sa pagkalimot sa akong kaugalingon, moadto sa trabaho, ug “sa paghupay niadto nga nagkinahanglan sa kahupayan” (Mosiah 18:9)—sama nga si Jesukristo mihupay kanamo sa mga panahon sa among panginahanglan ug kamingaw.