Ang Akong Kard sa Pasko gikan sa Obregón
Robert Ramos, Oregon, USA
Samtang nagserbisyo ko sa akong misyon sa Mexico, ang akong kompanyon ug ako nakahimamat og usa ka tawo gikan sa Obregón, usa ka siyudad sa amihanang kasadpan sa Mexico duol sa Gulf sa California. Interesado siya sa among mensahe kabahin sa Pagpahiuli sa ebanghelyo, apan siya adunay 10 ka minutos lamang sa paghisgut kay kinahanglan na niyang mosakay og tren. Amo siyang gitudloan kutob sa among mahimo sulod nianang mubo nga higayon ug mihatag kaniya og kopya sa Basahon ni Mormon ug sa tanang mga tract nga anaa kanamo. Niining panahona, ang among misyon walay mga misyonaryo sa Obregón.
Mga pipila ka bulan ang milabay nakadawat ko og kard sa Pasko gikan sa usa ka tawo sa Obregón. Gitan-aw nako ang kard ug natingala kon si kinsa kaha ang mipadala niini. Dayon nakaamgo ko nga kini gipadala sa usa ka tawo nga among naistoryahan sulod sa 10 ka minutos. Akong gibitay ang kard sa among apartment kauban sa ubang mga kard sa Pasko nga nadawat nako ug sa ubang mga elder.
Human sa Pasko ako na untang ilabay ang kard sa dihang mibati ko og impresyon nga taguan kini. Ang impresyon dili usa ka madungog nga tingog apan usa ka pagbati sa akong kasingkasing. Imbis nga ilabay ang kard, ako kining gibutang sa akong malita.
Mga pipila ka bulan ang milabay samtang nagbasa ko sa binuwang sulat gikan sa mission home, nakabantay ko og pahibalo nga ang misyonaryo nga buhat pagasugdan sa Obregón. Sa makausa pa ako naghunahuna, “Unsa man ang kalabutan niana nga siyudad ngari kanako?” Dayon ako nakahinumdom sa tawo nga among nahimamat nga taga-didto. Akong giutingkay pag-ayo ang akong malita ug akong nakit-an ang kard sa Pasko. Gisulatan nako ang kard, “Kini nga mga elder mga higala nako, ug ako silang gipaanha dinha aron sa pagtudlo nimo og dugang kabahin sa ebanghelyo.” Dayon akong gipadala ngadto sa mga elder nga na-assign sa pagserbisyo sa Obregón ug miingon kanila sa pagdala niini ug pagbisita niining tawhana.
Sa wala madugay nakadawat ko og sulat gikan sa mga elder sa Obregón. Kini mabasa: “Pinalanggang Elder Ramos, ang buhat dinhi nahimong lisud kaayo nga ang presidente sa misyon nagplano sa pagbalhin kanamo hangtud nga among nadawat ang imong kard. Among giadto kini nga brother, ug siya mahinamon kaayo sa among mensahe nga iya kaming gidala aron sa pakighimamat sa tanan niyang mga pamilya ug mga higala. Tungod niini nga brother, kami nakasugod og usa ka branch.”
Mga katuigan ang milabay, ug karon aduna nay tulo ka mga stake nga naorganisar sa Obregón. Nakapahimo nakong mapainubsanon tungod kay ako naminaw sa mga aghat sa Espiritu, napanalanginan ako nga nakatabang og gamay sa akong mga kaigsoonan sa Obregón sa pagdawat sa ebanghelyo ni Jesukristo.