Nawala ug Nakit-an

Ni Adam C. Olson

Mga Magasin sa Simbahan

Ang pagkasaag sayon ra kon ang inadlaw natong mga desisyon dili konektado sa atong mahangturon nga destinasyon.

Sa hapit na mag-edad og 30, si Roberta Tuilimu nakaamgo nga dili siya malipayon. Duna siyay tulo ka matahum nga mga anak, ug siya nahigugma sa ilang amahan, si Daniel Nepia, apan si Roberta ug si Daniel wala makasal. Si Daniel dili miyembro sa Simbahan, ug dugay na kaayong panahon sukad si Roberta kanunay nga magsimbahan.

Layo pa kaayo ang iyang abtunon nga maminyo sa templo nga mao kanunay ang iyang gipangandoy isip usa ka batang babaye kinsa magsimba matag semana uban sa iyang mga ginikanan didto sa Auckland, New Zealand. Apan ang pagtalikod niya sa mahangturon niyang mga tumong dili usa ka higayon nga paghukom; anam-anam kini pinaagi sa ginagmayng mga desisyon nga iyang gihimo sa matag adlaw.

Mga Desisyon Dili Konektado

Alang kang Roberta usa ka desisyon ang tin-aw nga mipatigbabaw dihang mipalayo siya sa agianan sa ebanghelyo, bisan adunay ubang mga pagpili ang maingon og midala kaniya niana nga hitabo. Sa pagkatin-edyer si Roberta mipalta sa pagsimba sulod sa duha ka semana sa paghimo og homework. “Makapahunahuna nga masugdan diay kini sa butang nga magsugod sa ginagmay nga butang nianang higayuna,” miingon siya.

Human makapalta og duha sa semana mas sayon na kaniya ang dili pag-adto sa sunod nga semana. Ang mga semana nga panagsa ra ang pagsimba nahimong mga bulan. Sa iyang pag-edad og 18, ang iyang mga higala miagni kaniya nga mangadto og club nga gabii na kaayo matag Sabado, nga nakapalisud sa pagsimba ma-Dominggo. Didto usab nga nagsugod siya sa pag-inom.

“Nahibalo ko nga dili kadto husto, apan naghunahuna ako nga makahunong ra dayon kon akong gustohon,” miingon siya. “Akong gisulayan sa pagpangatarungan ang akong mga desisyon.”

Nagpuyo siya sa matang sa kinabuhi nga dili haum nga makasulod sa templo, hinoon human niya mahimamat si Daniel, iya siyang gidala ngadto sa mga nataran sa Templo sa Hamilton New Zealand ug giingnan si Daniel nga gusto siyang makasal didto.

“Nahibalo ako nga mao kadto ang gusto nakong adtoan,” miingon siya. Apan ang matag sayop nga desisyon nakapasayon sa paghimo og sunod nga sayop nga desisyon—nga nagdala pa gayud kaniya palayo sa gitinguha nga destinasyon. Wala madugay si Roberta ug Daniel nag-ipon na.

“Walay pagkatakdo tali sa unsa ang akong gusto—unsay akong nahibaloan nga husto—ug sa mga desisyon nga akong gihimo,” miingon siya. “Ang karon na lamang ang akong gihunahuna. Wala nako itakdo ang mga desisyon karon ngadto sa kon asa ako dad-on niini.”

Ang Ginoo Nangita sa Nawala

Bisan sa gilay-on niya gikan sa tuyo niya nga adtoan, si Roberta wala mawala alang sa Ginoo. Bisan og sila si Daniel ug Roberta wala makamatngon niini nianang panahona, ang Maayong Magbalantay, kinsa mianhi “sa pagpangita og pagluwas sa nawala” (Lucas 19:10), nagpangita kanila sa tanang panahon.

Ang Espiritu naglihok diha kang Daniel, sama sa dihang gidala siya ni Roberta didto sa mga nataran sa templo ug sa dihang gipanalanginan sa amahan ni Roberta ang ilang mga anak. Bisan og nabalhin-balhin sila sa daghang higayon, sa matag balhin sila makasugat—ug usahay magtuon uban—sa mga misyonaryo.

Dayon, dihang namalhin na usab sila niadtong 2006, nahimamat nila ang pipila sa daan nilang mga kaeskwela, sila si Dan ug Lisa Nathan, kinsa aktibong mga miyembro sa Simbahan. Sila si Daniel ug Roberta bag-o lang namalhin ngadto sa mga utlanan sa ward sa mga Nathan.

Sulod sa tulo ka semana wala panumbalinga ang imbitasyon ni Lisa nga mosimba kuyog niya. “Dili ko gusto nga mohatag og pasabut sa akong sitwasyon,” miingon siya. “Apan nakahukom ako nga gusto nako nga adto sa Primary ang akong mga anak.”

Sa wala madugay sila si Daniel ug Roberta nakighimamat pag-usab sa mga misyonaryo. Si Daniel nagsugod sa pagsimba, diin ang maayo nga magtutudlo sa Mga Baruganan sa Ebanghelyo mihimo og kalainan. Ang mga visiting teacher mibisita matag bulan. Ang mga magtiayon nakigkita gani ni Elder David A. Bednar sa Korum sa Napulog Duha ka mga Apostoles atol sa usa ka espesyal nga debosyonal.

Nakita ni Roberta diha sa ilang mga kasinatian ang ebidensya nga ang Langitnong Amahan miandam og “daghang mga maayong mga tawo nga mitabang kanamo.”

Hunahunaa ang Inyong mga Dalan

Pinaagi sa lain-laing mga kasinatian ug mga katawhan, ang Langitnong Amahan misangkap kang Daniel ug ni Roberta og mga oportunidad nga “mamalandong sa [ilang] mga dalan” (Haggeo 1:7). Apan kinahanglan nga “itugyan [nila] ang ilang dalan ngadto sa Ginoo” (Salmo 37:5) sa dili pa sila makahimo og bisan unsang kalamboan.

“Nahibalo ako nga ang akong mga dalan dili Iyang mga dalan,” miingon si Roberta (tan-awa sa Isaias 55:8–9), “apan wala ako masayud kon unsaon sa pagsumpay ang duha.”

Ang kausaban miabut dihang ang mga misyonaryo nangutana kang Daniel ug ni Roberta sa paghukom kon asa sila gusto nga moadto, sa espirituhanong pagkasulti, ug unsay angay nilang buhaton aron makaadto didto.

Sa dihang mihukom kami sa katapusan nga ang among gusto mao ang mahasubay asa Iyang dalan paingon,” miingon siya, “among gisugdan ang pagpangita kon unsay gikinahanglan aron mahasubay sa Iyang dalan didto.”

Sa mga bulan nga misunod, gisugdan sa pagbiya ni Roberta ang dili maayo niyang mga desisyon sa nangagi ug mobalik sa agianan nga iyang gibiyaan kapin sa dekada kaniadto. Sama sa iyang pagbiya sa agianan sa ebanghelyo isip usa ka tin-edyer nagsugod tungod sa gagmayng mga desisyon, ang pagbalik ni Roberta sa agianan nagsugod sa paghimo sa maingon og gagmayng mga butang matag adlaw.

“Sa diha nga akong gisugdan ang paghimo sa unang mga butang matag adlaw—indibidwal ug pamilya nga mga pag-ampo, pagbasa sa mga kasulatan, pagdala sa mga bata ngadto sa simbahan, pagtabang sa uban kon akong mahimo—akong nabatyagan nga ang Langitnong Amahan nagtan-aw kanamo ug naminaw sa among mga pag-ampo,” miingon si Roberta. “Mas malipayon ang among pamilya.”

Kadtong ginagmay nga mga desisyon nakatabang sa paglig-on nila ni Daniel ug Roberta dihang miabut ang panahon sa paghimo og dagkong mga desisyon. Mihukom sila nga magpakasal. Dayon, dul-an sa usa ka tuig human sila si Daniel ug Roberta nagsugod sa pagpakighimamat sa mga misyonaryo, ang ilang tinguha nga magkauban sa ilang pamilya sa kahangturan maoy hinungdan nga nabunyagan si Daniel.

Sa katapusan, human sa duha ka tuig nga paningkamot sa pagpahaum sa unsay gibuhat nila sa matag adlaw ngadto sa unsay ilang gusto sa umaabut, sila si Daniel ug Roberta na-seal sa templo—nga katumanan sa pangandoy ni Roberta sa pagkabata.

Pagkinabuhi Karon alang sa Kahangturan

Isip kabahin sa plano sa Langitnong Amahan, sila si Daniel ug Roberta adunay oportunidad sa pagdesisyon matag adlaw kon asa nga dalan ang ilang pilion—ang ila o Iya. Ang magtiayon karon mas naghunahuna na sa direksyon nga ilang padulngan tungod sa ilang inadlaw nga mga pagpili.

Gikan sa personal nga kasinatian ilang nasabtan kon unsa ka sayon ang pagkahisalaag kon ang inadlaw nga mga desisyon buhaton nga walay paghunahuna sa mga epekto niini kabahin sa mahangturon nga mga destinasyon. Apan mapasalamaton usab sila nga nakakat-on sa ilang kaugalingon nga adunay paagi sa pagbalik.

“Nahibalo ako nga gihigugma ako sa Ginoo ug gusto nga ako mobalik tungod kay gipanalanginan Niya ang among kinabuhi uban sa mga tawo nga among nahimamat panahon sa among panaw kinsa mitabang kanamo nga makabalik,” miingon si Roberta. “Wala gayud Siya makalimot kanako atol sa akong mga panahon nga layo ako sa Simbahan.”

Salamat sa gugma—ug sa maulaon nga sakripisyo—sa Maayo nga Magbalantay, “[Pabiyai] sa dautan ang iyang dalan, ug … pabalika siya kang Jehova, ug siya malooy kaniya … , kay siya mopasaylo sa madagayaon gayud ” (Isaias 55:7).

Karon ang mga Nepias naningkamot nga maka-focus kon asa ang gusto nilang adtoan. “Kon kamo makaamgo nga adunay mas labaw pa niining kinabuhia kay sa unsay ania karon,” miingon si Daniel, “makausab kini inyong mga pagpili.”

Gilitratohan ni Adam C. Olson