Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Ang Akong Pagserbisyo isip usa ka Dili Minyo nga Miyembro,” pahina 12: Human sa pagbasa sa istorya ni Sister Burdett, hunahunaa ang paghisgot sa mga panalangin nga moabut gikan sa pagserbisyo diha sa Simbahan. Makadapit ka og mga sakop sa pamilya sa pagpakigbahin og usa ka makahuluganong kasinatian nga sila aduna samtang nagserbisyo og usa ka calling.

“Ang Kalinaw ug Hingpit nga Kalipay nga Mahibalo nga ang Manluluwas Buhi,” pahina 18: Hunahunaa ang pagpangutana og mga sakop sa pamilya kon unsa ang ilang mabuhat sa sunod nga tuig alang sa Manluluwas. Basaha ang katapusan nga mga paragraph sa artikulo ubos sa “Ang Atong Gasa Kaniya.” Unsa ang giingon ni Elder Nelson nga labing importante nga gasa nga atong ikahatag ngadto sa Ginoo?

“Dali, Simbahon Siya,” pahina 42: Sa dili pa ang leksyon, sa mainampuon nga paagi pilia ang seksyon o mga seksyon nga labing magamit sa imong pamilya. Kon imong pilion ang seksyon mahitungod sa mga magbalantay sa karnero, mahimo nga imong ipakigbahin ang tambag ni Presidente Monson sa “dili maglangay sa pagsunod sa usa ka aghat” ug hisguti uban sa imong pamilya ang kamahinungdanon niini nga pahayag. Sa pagpakita niini nga punto uban sa mas batan-on nga mga bata, paghunghong og panudlo diha sa ilang mga dunggan ug awhaga sila sa pagsunod niini.

“Ila-ilaha si Brother Joseph,” pahina 58: Hunahunaa ang pagpakita og usa ka hulagway ni Joseph Smith samtang imong basahon ang lista sa mga kamatuoran mahitungod kaniya gikan sa artikulo. Mahimo nga ikaw magdula og usa ka dula human sa leksyon sa pagsuta kon unsa ka daghan nga mga kamatuoran ang mahinumduman sa imong pamilya.

“Kadto nga mga Pulong,” pahina 60: Human sa pagbasa sa istorya isip usa ka pamilya, hunahunaa ang paghisgot kon unsa ang ikasulti sa mga sakop sa pamilya kon usa ka tawo uban kanila naggamit og bulgar nga pulong. Mahimo usab nga ikaw mopasabut ngadto sa gagmay nga mga bata kon ngano nga kita gisugo diha sa Exodo 20:7 sa dili paggamit sa pangalan sa Ginoo sa pasipala (tan-awa usab sa D&P 63:60–64).

Pakigbahin sa mga Pagkakabig ug sa Espiritu

Sa panahon nga ako diha sa young adult ward, ako dihay family home evening kauban sa akong pamilya nga ward. Usa sa labing halandumon nga mga family home evening nga sukad akong natambungan mao ang usa ka gabii sa diha nga ang full-time nga mga misyonaryo mao ang nangulo.

Ang mga elder midapit og daghan nga mga kinabig sa among ward sa pagpakigbahin sa ilang mga istorya sa pagkakabig. Ang tanan nga mga kinabig misulti, ang presensya sa Espiritu dili ikalimud.

Human napakigbahin ang mga istorya, ang akong hunahuna mibalik ngadto sa akong kaugalingon nga misyonaryong mga kasinatian—isip usa ka full-time ug tibuok kinabuhi nga misyonaryo. Gitimbang-timbang nako pag-usab ang akong kaugalingon nga mga lihok sa pagpakigbahin sa ebanghelyo sa inadlaw-adlaw nga pagbase ug mipadayon sa pagpalandong niini sulod sa mga semana nga moabut. 

Sa diha nga ako gitawag sa wala madugay sa pagpangulo og family home evening diha sa ward, akong gisiguro nga ipadayon “ang gabii sa mga istorya sa pagkakabig” nga kalihokan matag karon ug unya, naghangyo og lainlaing mga kinabig diha sa among ward sa pag-apil.

Janna McFerson, California, USA