Bag-ong mga Presidente sa Misyon Gipanalanginan tungod sa Pagbansay og Hugot nga Pagtuo
Niadtong Hunyo 128 ka bag-ong mga presidente sa misyon ug ang ilang mga asawa gidapit ngadto sa Missionary Training Center sa Provo, Utah, USA, sa pagdawat og mga panudlo sa dili pa mobiya paingon sa ilang mga misyon.
Si Presidente Thomas S. Monson misugod sa upat ka adlaw nga seminar, nga gihimo gikan sa Hunyo 22 ngadto sa 26, 2011, nag-ingon, “Kamo gipili gikan sa labing matinud-anon sa Simbahan, ug karon kamo adunay oportunidad sa pag-adto didto sa umahan sa Ginoo. … Wala akoy nahibaloan nga umahan nga mamunga og labaw kahumot ni ka daghang mga rosas kay sa natad sa misyon diin kamo gitawag.”
Ang mga magtiayon gikan sa tibuok kalibutan—sa 22 ka nagkalainlaing mga nasud—ug moalagad sa tibuok kalibutan sa 18 ka mga pinulongan. Ang ilang mga kaagi nagkalainlain, apan sila aduna nay usa ka butang nga parehas.
Samtang kining bag-ong gitawag nga mga presidente sa misyon ug ang ilang mga asawa naghimo og mga sakripisyo sa pag-andam sa temporal ug espirituhanon nga paagi, ilang nakita ang mga panalangin sa pagbansay og hugot nga pagtuo hapit diha-diha dayon.
Paghimo og mga Sakripisyo
Ang pagserbisyo isip usa ka presidente sa misyon usa ka mahagiton ug espirituhanong makadasig nga buluhaton sulod sa tulo ka tuig. Sa paghalad sa ilang mga kaugalingon ngadto niini nga call, daghan nga mga magtiayon sa tinuod mibiya sa ilang naandan nga mga kinabuhi, lakip ang ilang mga trabaho ug ang mga pamilya.
Ang paghunong sa propesyonal nga panarbaho sa pipila ka mga kahimtang nagpasabut og pinansyal nga kawad-on. Samtang ang Simbahan naghatag sa mga presidente sa misyon og dyutay nga adlaw-adlaw nga panggastos, ang mga magtiayon sa kasagaran adunay pinansyal nga kasarang sa pagdugang nianang adlaw-adlaw nga panggastos gikan sa ilang kaugalingon nga mga pundo.
Sa diha nga si Marcus Martins ug ang iyang asawa, si Miriam, midawat sa ilang call ngadto sa Brazil São Paulo North Mission, kining taga Laie, Hawaii, USA, nga mga lumulupyo gitambagan ni Elder Jeffrey R. Holland sa Korum sa Napulog Duha ka mga Apostoles nga kinahanglan adunay sakripisyo, apan gisultihan niya sila sa dili pagsakripisyo og maayo.
Ang mga Martins mipauli ug nag-ampo nga mahibalo kon sa unsa nga paagi sila makahimo sa pagdawat niini nga oportunidad. Gibaligya nila ang tanan. “Ang panalangin—among nabaligya ang tanan sulod sa usa ka adlaw,” miingon si Sister Martin. “Kini usa ka milagro alang kanamo.”
Dili tanan mahimong magsakripisyo sa pinansyal nga paagi, apan ang matag presidente sa misyon ug ang iyang asawa moatubang og sakripisyo sa pagsulay sa hugot nga pagtuo sakripisyo sa pipila ka matang.
Alang kang Gary ug Pamela Rasmussen sa Tucson, Arizona, USA, ang pagdawat sa call ngadto sa Japan Sendai Mission mipasabut sa pagbiya sa ilang unom ka mga anak ug 23 ka mga apo.
“Nasayud ako nga ang Langitnong Amahan makaamuma sa mga bata nga mas maayo pa kay kanako,” miingon si Sister Rasmussen. “Busa malipayon kami sa pagbuhat niini ug mibati nga ingon og kini mahimong usa ka dako nga panalangin ngadto kanila.”
Kadaghanan kinsa nagdawat og call sa pagserbisyo isip mga presidente sa misyon ug ang mga asawa sa mga presidente sa misyon nagpahayag niana nga kinaiya sa andam nga pagsakripisyo.
“Usahay ako namalandong kon unsa gayud ang gihunahuna nga sakripisyo, tungod kay ang usa ka butang nga malisud kaayo alang sa usa ka tawo tingali dili ingon kalisud alang sa lain,” miingon si Presidente Martins. “Daghan nga mga higayon sa atong mga kinabuhi … kita nag-ingon nga atong unahon ang Ginoo ug alang sa Ginoo mobuhat kita bisan unsa, moadto kita bisan asa. Busa sa tinuod kita wala gayud maghunahuna sa pulong nga sakripisyo. … Kini usa ka pribelihiyo; kini usa ka dungog ang pagsakripisyo.”
Ang Pagkaandam
Sa panahon nga dili pa ang mga presidente sa misyon ug ang ilang mga asawa magsugod sa ilang mga buluhaton sa misyon daghan nga espirituhanon ug temporal nga mga pagpangandam ang mahitabo. Ang mga presidente sa misyon sa kinatibuk-an tawagon sobra sa unom ka bulan og una, apan usahay kana nga panahon sa pagpangandam gimubo. Sila si Brent ug Anne Scott sa Eden, Utah, USA, gitawag sa pagdumala sa Canada Toronto Mission usa ka semana lamang sa wala pa ang seminar sa mga presidente sa misyon ug duha ka bulan sa dili pa sila magsugod sa ilang serbisyo.
Gawas sa pagsulti sa ilang mga kahigalaan ug pamilya ug sa pagpaninguha sa paghimo og mga kasabutan alang sa ilang panimalay, mituon sila og mga manwal, naminaw og mga CD, ug mihimo og uban nga espirituhanong mga pagpangandam. Apan miingon sila nga ang ilang labing importante nga pagpangandam mao ang seminar didto sa MTC.
“Kini usa lamang ka pagpatuhop sa espirituhanong kaalam,” miingon si Presidente Scott. “Ang pagkaanaa uban sa pundok sa mga tawo kinsa [misakripisyo sa pagserbisyo sa Ginoo] ug pagatudloan pinaagi sa mga propeta, mga manalagna, ug mga tigpadayag … sa hingpit mao ang usa sa labing importante nga mga kasinatian sa among mga kinabuhi.”
Pagkat-on og Kaalam
Sulod sa upat ka adlaw nga seminar niadtong Hunyo, ang mga presidente sa misyon ug ang ilang mga asawa gipakaon sa espirituhanong paagi sa mga mensahe gikan sa Unang Kapangulohan ug sa daghang mga sakop sa Korum sa Napulog Duha ka mga Apostoles.
“Samtang kami namati kanila, samtang gitudloan kami, [gibati namo] nga ang Ginoo diha, nga Siya nag-amuma, nga kini Iyang buhat, nga kini sila Iyang mga sulugoon, ug nga kami adunay pribelihiyo sa paglakaw ug pagrepresentar sa atong Manluluwas,” miingon si Sister Scott.
Si Elder Russell M. Nelson sa Korum sa Napulog Duha ka mga Apostoles mipahayag og pipila sa iyang mga paglaum alang sa lumargahay nga mga presidente sa misyon ug sa ilang mga asawa.
“Hinaut nga kamo adunay maayo nga kahimsog sa pisikal, emosyonal, ug espirituhanong [ug] kalampusan sa pagkat-on, pagtudlo, ug paggamit sa doktrina ni Jesukristo,” miingon siya. “Ang akong mga paglaum naglakip sa inyong abilidad sa paggamit sa tanang gahum sa mga miyembro; sa pagsentro diha sa mga ordinansa; [ug] sa pakighiusa diha sa Ginoo, sa mga miyembro sa Simbahan, ug ngadto sa minahal nga mga misyonaryo nga gisalig sa inyong pag-amuma.”
Ang bag-ong gitawag nga mga presidente sa misyon motambong og upat ka adlaw nga sesyon sa pagbansay didto sa Missionary Training Center sa Provo, Utah, USA, sa dili pa sila moadto sa natad sa misyon.
© IRI